Indian Army : ભારતીય સેનાના જવાનો માટે 'ભારત રાઈસ'ની શરૂઆત, લદ્દાખ અને પૂર્વોત્તર વિસ્તારોમાં મળશે સીધો પુરવઠો

Indian Army : ભારતીય સેનાના જવાનોને ઉચ્ચ ગુણવત્તાવાળા ચોખા ઉપલબ્ધ કરાવવા માટે 'ભારત રાઈસ' પહેલની શરૂઆત કરવામાં આવી છે. 12 ઓક્ટોબર, 2026ના રોજ નવી દિલ્હીમાં યોજાયેલા કાર્યક્રમમાં રક્ષામંત્રી રાજનાથ સિંહ અને કેન્દ્રીય ગ્રાહક બાબતો, ખાદ્ય અને જાહેર વિતરણ મંત્રી પ્રહલાદ જોશીની ઉપસ્થિતિમાં આ પહેલનો પ્રારંભ થયો હતો. આ અંતર્ગત લદ્દાખ અને પૂર્વોત્તરના દૂરના વિસ્તારોમાં આવેલા સેનાના સપ્લાય ડેપો સુધી ચોખાનો સીધો પુરવઠો પહોંચાડવામાં આવશે.

જવાનોને મળશે ગુણવત્તાયુક્ત ચોખા

'ભારત રાઈસ' પહેલનો મુખ્ય ઉદ્દેશ સેનાના જવાનોને વધુ સારી ગુણવત્તાવાળું અનાજ પૂરું પાડવાનો છે. આ ચોખા સંરક્ષણ ક્ષેત્ર માટે નક્કી કરાયેલા માપદંડો અનુસાર તૈયાર કરવામાં આવશે. તેમાં બાહ્ય અશુદ્ધિઓ અને ભેળસેળ નહીં હોય તથા તૂટેલા, નુકસાન પામેલા અને રંગ બદલાયેલા દાણાનું પ્રમાણ ઓછું રાખવામાં આવશે. ચોખા 10 અને 30 કિલોની બેગમાં ઉપલબ્ધ કરાવવામાં આવશે, જેથી મુશ્કેલ ભૌગોલિક વિસ્તારોમાં તેનું પરિવહન અને સંચાલન સરળ બને. નાણાકીય વર્ષ 2026-27 દરમિયાન NAFED મારફતે ચોખાનો પુરવઠો કરવામાં આવશે.

FCI સાથે પાંચ વર્ષ માટે કરાર

આ કાર્યક્રમ દરમિયાન ભારતીય સેના અને ફૂડ કોર્પોરેશન ઑફ ઈન્ડિયા (FCI) વચ્ચે સમજૂતી કરાર (MoU) પર હસ્તાક્ષર કરવામાં આવ્યા હતા. આ કરાર હેઠળ જરૂરિયાત ઊભી થાય ત્યારે સેના FCIના ગોડાઉન, સંગ્રહ સુવિધાઓ, કર્મચારીઓ અને માલસામાન હેન્ડલિંગનાં સાધનોનો ઉપયોગ કરી શકશે. આ વ્યવસ્થા પાંચ વર્ષ માટે અમલમાં રહેશે અને પરસ્પર સંમતિથી તેની મુદત વધારી શકાશે.

ઓપરેશન સિંદૂરથી મળ્યો લોજિસ્ટિક્સનો બોધપાઠ

રક્ષામંત્રી રાજનાથ સિંહે જણાવ્યું કે આધુનિક યુદ્ધમાં માત્ર હથિયારો અને ટેક્નોલોજી જ નહીં, પરંતુ મજબૂત પુરવઠા વ્યવસ્થા પણ નિર્ણાયક ભૂમિકા ભજવે છે. ઓપરેશન સિંદૂરના અનુભવો દર્શાવે છે કે ભવિષ્યમાં કોઈ પણ કટોકટીની સ્થિતિમાં ટૂંકી ચેતવણી સાથે સૈન્ય કાર્યવાહી કરવાની જરૂર પડી શકે છે. આવી સ્થિતિમાં ખાદ્ય સામગ્રી અને જરૂરી સાધનોનો સમયસર પુરવઠો જાળવવા મજબૂત લોજિસ્ટિક્સ વ્યવસ્થા અનિવાર્ય છે.

રાષ્ટ્રીય સુરક્ષાને મજબૂત બનાવવાની દિશામાં મહત્વપૂર્ણ પગલું

તેમણે વધુમાં કહ્યું કે 'ભારત રાઈસ' ખેડૂતોની મહેનતને સૈનિકોની શક્તિ સાથે જોડતી પહેલ છે. 'જય જવાન, જય કિસાન'ની ભાવનાને સાકાર કરતી આ યોજના જવાનોના સ્વાસ્થ્ય, મનોબળ અને કાર્યક્ષમતામાં વધારો કરશે. સરકારનું લક્ષ્ય દેશની ઉપલબ્ધ માળખાકીય સુવિધાઓનો અસરકારક ઉપયોગ કરીને સરહદો પર તૈનાત જવાનોને સમયસર અને ગુણવત્તાયુક્ત રાશન પહોંચાડવાનું છે. આ પહેલ ભારતીય સેના, FCI, NAFED અને ખાદ્ય વિભાગ વચ્ચે લગભગ 18 મહિનાના સંકલન બાદ અમલમાં આવી છે. તે દેશની નાગરિક અને સૈન્ય જરૂરિયાતો વચ્ચે વધુ સારા સંકલન સાથે રાષ્ટ્રીય સુરક્ષાને મજબૂત બનાવવાની દિશામાં મહત્વપૂર્ણ પગલું માનવામાં આવે છે.

આ પણ વાંચો : Delhiથી ચેન્નાઈ જતી ઈન્ડિગોની ફ્લાઈટમાં પાવર બેંકમાં લાગી આગ, હૈદરાબાદમાં કર્યું ઈમરજન્સી લેન્ડિંગ