Fly dubai હુમલામાં મોટો ખુલાસો: કેપ્ટન સ્મિત મચ્છાર પર હુમલો કરનાર કોપાઈલટની ઓળખ જાહેર

Fly dubai : દુબઈથી તેલ અવીવ જઈ રહેલી ફ્લાઈદુબઈની ફ્લાઈટમાં ભારતીય કેપ્ટન સ્મિત મચ્છાર પર થયેલા હુમલાના કેસમાં તપાસ આગળ વધતાં આરોપી કોપાઈલટની ઓળખ સામે આવી છે. અલ અરેબિયા, CNN સહિતના અહેવાલો અનુસાર આરોપીનું નામ હમામ અલ-હમામી છે અને તે ઓમાનનો નાગરિક હોવાનું જણાવાયું છે. આ ઘટનાની તપાસમાં તેના અગાઉના એરલાઇન રેકોર્ડ અને કથિત ઉગ્રવાદી વિચારો અંગે પણ તપાસ કરવામાં આવી રહી છે.

કોણ છે હમામ અલ-હમામી?

રિપોર્ટ્સ અનુસાર હમામ અલ-હમામીનો જન્મ UAEમાં થયો હતો. તેના પિતા ઓમાનના અને માતા સીરિયન મૂળના હોવાનું જણાવાયું છે. તેણે અગાઉ ઓમાનની રાષ્ટ્રીય એરલાઇન Oman Air સાથે પણ કામ કર્યું હતું. કેટલાક અહેવાલોમાં દાવો કરવામાં આવ્યો છે કે સુરક્ષા સંબંધિત ચિંતાઓને કારણે તેને ફ્લાઈંગ ડ્યૂટીમાંથી હટાવીને અન્ય ભૂમિકામાં મૂકવામાં આવ્યો હતો.

સીરિયામાં રહેવા દરમિયાન કથિત રીતે બદલાયા વિચારો

અલ અરેબિયા દ્વારા ટાંકવામાં આવેલા સૂત્રોના જણાવ્યા મુજબ હમામ અલ-હમામીએ સીરિયામાં લાંબો સમય વિતાવ્યો હતો અને ત્યાં તેના વિચારોમાં કથિત રીતે ઉગ્રવાદી પ્રભાવ આવ્યો હતો. જોકે આ દાવાઓની સત્તાવાર તપાસ હજુ ચાલી રહી છે અને આરોપીના કથિત મોટિવ અંગે અંતિમ નિષ્કર્ષ સામે આવ્યો નથી.

ફ્લાઈટમાં શું થયું હતું?

30 સપ્ટેમ્બરે દુબઈથી તેલ અવીવ જતી ફ્લાઈટ FZ1073માં કોપાઈલટે કોકપિટમાં કેપ્ટન સ્મિત મચ્છાર પર કથિત રીતે હુમલો કર્યો હતો. ગંભીર ઈજાઓ છતાં કેપ્ટન મચ્છારે કોકપિટનો દરવાજો ખોલવામાં સફળતા મેળવી. ત્યારબાદ મુસાફરો અને ક્રૂએ આરોપીને કાબૂમાં લીધો અને ફ્લાઈટમાં હાજર બે ઓફ-ડ્યૂટી પાઈલટોએ વિમાનને સંભાળવામાં મદદ કરી. વિમાનનું સાઉદી અરેબિયાના તબુકમાં ઈમરજન્સી લેન્ડિંગ કરાવવામાં આવ્યું હતું.

શું વિમાન ક્રેશ કરવાનો ઈરાદો હતો?

આ મુદ્દે તપાસ એજન્સીઓ અલગ-અલગ સંભાવનાઓની તપાસ કરી રહી છે. કેટલાક ઈઝરાયેલી અધિકારીઓ અને મીડિયા અહેવાલોમાં આરોપી દ્વારા વિમાનને ક્રેશ કરવાનો પ્રયાસ કરવામાં આવ્યો હોવાનો દાવો કરવામાં આવ્યો છે. જોકે હુમલાનો ચોક્કસ હેતુ અને કોઈ આતંકવાદી નેટવર્ક સાથે તેનો સંબંધ હતો કે નહીં તે અંગે તપાસ ચાલુ છે.

કેપ્ટન સ્મિત મચ્છારની ભૂમિકા

આ સમગ્ર ઘટનામાં કેપ્ટન સ્મિત મચ્છારે ગંભીર ઈજાઓ છતાં પરિસ્થિતિનો સામનો કર્યો અને મદદ પહોંચે તે માટે કોકપિટનો દરવાજો ખોલવામાં સફળતા મેળવી. તેમની કાર્યવાહી બાદ મુસાફરો અને અન્ય પાઈલટોને દરમિયાનગીરી કરવાની તક મળી. વડાપ્રધાન નરેન્દ્ર મોદીએ પણ કેપ્ટન મચ્છારની હિંમત અને હાજરજવાબી માટે તેમની પ્રશંસા કરી છે.

તપાસમાં હવે શું?

હમામ અલ-હમામીના અગાઉના એરલાઇન રેકોર્ડ, સુરક્ષા તપાસ, સોશિયલ મીડિયા પ્રવૃત્તિઓ, સંભવિત સંપર્કો અને હુમલાના હેતુ સહિતના મુદ્દાઓની તપાસ થઈ રહી છે. ફ્લાઈદુબાઈ તરફથી તપાસ પૂર્ણ થાય ત્યાં સુધી આ મામલે વિગતવાર ટિપ્પણી કરવામાં આવી નથી.

આ પણ વાંચો : PM Modi સાથે આજે દિલ્હીમાં CM નાયબ સૈની અને હરિયાણાના તમામ BJP ધારાસભ્યોની મુલાકાત