Bihar : ભાગલપુરમાં મોટી દુર્ઘટના, પૂરના પાણીમાં ડૂબી જતાં 6 બાળકોના મોત
Bihar
Bihar : ભાગલપુરમાં મોટી દુર્ઘટના, પૂરના પાણીમાં ડૂબી જતાં 6 બાળકોના મોત
Bihar
Bihar : બિહારના ભાગલપુર જિલ્લામાં સોમવારે એક દુર્ઘટના સર્જાઈ છે. પૂરના પાણીમાં ડૂબી જવાથી 6 બાળકોના મોત થયા છે. આ અકસ્માત સુલ્તાનગંજ પોલીસ સ્ટેશન વિસ્તારના નારાયણપુર ગામમાં બન્યો હતો. મૃતકોમાં ચાર છોકરા અને બે છોકરીઓનો સમાવેશ થાય છે. ઘટનાને પગલે ગામ અને આસપાસના વિસ્તારમાં શોકની લાગણી ફેલાઈ ગઈ છે.
સ્થાનિક લોકોએ બાળકોને બચાવવાનો પ્રયાસ કર્યો
મળતી માહિતી મુજબ, તમામ બાળકો રસ્તાની બાજુમાં આવેલા એક ખાડામાં ભરાયેલા પૂરના પાણીમાં સ્નાન કરવા ગયા હતા. બાળકોને ખાડાની ઊંડાઈનો અંદાજ ન હોવાથી સ્નાન દરમિયાન તેઓ અચાનક ઊંડા પાણીમાં પહોંચી ગયા હતા અને ડૂબવા લાગ્યા હતા. ઘટનાની જાણ થતાં આસપાસના સ્થાનિક લોકોએ બાળકોને બચાવવાનો પ્રયાસ કર્યો હતો. ત્યારબાદ પોલીસને પણ જાણ કરવામાં આવી હતી.
બાળકો કરમા પર્વને લઈને ત્યાં સ્નાન કરવા ગયા હતા
માહિતી મળતા જ સુલ્તાનગંજ પોલીસ ઘટનાસ્થળે પહોંચી હતી. સ્થાનિક લોકોની મદદથી પોલીસે બાળકોની શોધખોળ શરૂ કરી હતી અને તમામ 6 બાળકોના મૃતદેહો પાણીમાંથી બહાર કાઢવામાં આવ્યા હતા. મૃતદેહોને જરૂરી કાયદેસરની કાર્યવાહી માટે મોકલી આપવામાં આવ્યા છે. પોલીસના જણાવ્યા અનુસાર, મૃતકોમાંથી પાંચ બાળકો સુલ્તાનગંજ પોલીસ સ્ટેશન વિસ્તારના વોર્ડ નંબર-27ના રહેવાસી હતા, જ્યારે એક બાળક સબૌર પોલીસ સ્ટેશન વિસ્તારનો રહેવાસી હતો. સુલ્તાનગંજના થાણા પ્રભારી ધનંજય કુમારે જણાવ્યું કે રસ્તાની બાજુમાં આવેલા ખાડામાં પૂરનું પાણી ભરાયેલું હતું અને બાળકો કરમા પર્વને લઈને ત્યાં સ્નાન કરવા ગયા હતા. પાણીની ઊંડાઈનો અંદાજ ન આવતાં આ દુર્ઘટના બની હતી.
સમગ્ર ગામમાં માતમ છવાયો
આકસ્મિક ઘટનાની જાણ થતાં મૃતક બાળકોના પરિવારજનોમાં શોકની લાગણી ફેલાઈ ગઈ છે. પરિવારજનોનો રડી-રડીને બેહાલ હાલ છે અને સમગ્ર ગામમાં માતમ છવાયો છે. ભાગલપુર સહિત બિહારના અનેક વિસ્તારોમાં હાલ પૂર જેવી સ્થિતિ સર્જાઈ છે. આવી સ્થિતિમાં પાણી ભરાયેલા ખાડા, તળાવ અને અન્ય જળસ્રોતોની નજીક જતા સમયે વિશેષ સાવચેતી રાખવી જરૂરી છે. ખાસ કરીને બાળકોને આવા જોખમી સ્થળોથી દૂર રાખવા તંત્ર દ્વારા પણ અપીલ કરવામાં આવી રહી છે.
