ભૂટાનમાં અદાણી પાવર અને ડ્રુક ગ્રીન પાવર સ્થાપશે 770 મેગાવોટનો ચમ્ખારચુ-I જળવિદ્યુત પ્રોજેક્ટ

Chamkharchhu-I Hydropower Project: ભૂટાનમાં 770 મેગાવોટ ક્ષમતાના ચમ્ખારચુ-I જળવિદ્યુત પ્રોજેક્ટના નિર્માણ માટે ભારતની અગ્રણી ખાનગી વીજ ઉત્પાદક કંપની અદાણી પાવર અને ભૂટાનની સરકારી વીજ ઉત્પાદક કંપની ડ્રુક ગ્રીન પાવર કોર્પોરેશન લિમિટેડ વચ્ચે શેરહોલ્ડર્સ એગ્રીમેન્ટ પર હસ્તાક્ષર કરવામાં આવ્યા છે. આ સમારોહમાં ભૂટાનના વડાપ્રધાન લ્યોનચેન ડાશો શેરિંગ તોબગે સહિત ભૂટાન સરકારના મંત્રીઓ, ડ્રુક હોલ્ડિંગ એન્ડ ઇન્વેસ્ટમેન્ટ્સ, ભૂટાન પાવર કોર્પોરેશન અને અદાણી પાવરના પ્રતિનિધિઓ હાજર રહ્યા હતા.

770 મેગાવોટનો પીકિંગ રન-ઓફ-રિવર પ્રોજેક્ટ

ચમ્ખારચુ-I પ્રોજેક્ટ મધ્ય ભૂટાનના ઝેમગાંગ જિલ્લામાં ચમ્ખારચુ નદી પર વિકસાવવામાં આવશે. આ પ્રોજેક્ટ ‘પીકિંગ રન-ઓફ-રિવર’ પ્રકારનો હશે અને તેનું અમલીકરણ બિલ્ડ, ઓન, ઓપરેટ એન્ડ ટ્રાન્સફર (BOOT) મોડલ હેઠળ કરવામાં આવશે. અદાણી પાવર અને ડ્રુક ગ્રીન પાવર વચ્ચે પ્રોજેક્ટમાં 49:51ની ઇક્વિટી ભાગીદારી રહેશે. કોમર્શિયલ કામગીરી શરૂ થયા બાદ 30 વર્ષની છૂટછાટ હેઠળ પ્રોજેક્ટનું સંચાલન કરવામાં આવશે.

2027ના પ્રથમ છ મહિનામાં બાંધકામ શરૂ કરવાનો લક્ષ્યાંક

પ્રોજેક્ટનું બાંધકામ 2027ના પ્રથમ છ મહિનામાં શરૂ કરવાનો લક્ષ્યાંક રાખવામાં આવ્યો છે. ભૂમિપૂજન બાદ છ વર્ષમાં પ્રોજેક્ટને કાર્યરત કરવાનો લક્ષ્યાંક નક્કી કરવામાં આવ્યો છે. આ પ્રોજેક્ટથી ભૂટાનની સ્વચ્છ ઊર્જા ઉત્પાદન ક્ષમતાને મજબૂતી મળવાની સાથે ભારત અને ભૂટાન વચ્ચે પ્રાદેશિક ઊર્જા સહયોગને પણ વેગ મળવાની અપેક્ષા છે.

બંને દેશો વચ્ચે ઊર્જા સહયોગ વધુ મજબૂત બનશે

સપ્ટેમ્બર 2025માં 570 મેગાવોટના વાંગછુ જળવિદ્યુત પ્રોજેક્ટ અંગે કરાર થયા બાદ અદાણી પાવર અને ડ્રુક ગ્રીન પાવર વચ્ચે જળવિદ્યુત ક્ષેત્રમાં આ બીજો મોટો કરાર છે. મે 2025માં અદાણી ગ્રુપ અને ડ્રુક ગ્રીન પાવર વચ્ચે 5,000 મેગાવોટની ક્ષમતાના જળવિદ્યુત પ્રોજેક્ટના વિકાસ અંગે સમજૂતી કરાર થયો હતો. ચમ્ખારચુ-I પ્રોજેક્ટ આ વ્યાપક વિકાસ કાર્યક્રમનો એક ભાગ છે.

શિયાળામાં ભૂટાનની જરૂરિયાત અને ભારતમાં ગ્રીન પાવરની નિકાસ

અદાણી પાવરના મેનેજિંગ ડિરેક્ટર અનિલ સરદાનાએ જણાવ્યું હતું કે જળવિદ્યુત દક્ષિણ એશિયાના ઊર્જા સંક્રમણમાં મહત્વની ભૂમિકા ભજવી શકે છે. ચમ્ખારચુ-I પ્રોજેક્ટથી ભૂટાનની ઊર્જા સુરક્ષા મજબૂત થવાની સાથે કાર્બન ઉત્સર્જનની તીવ્રતા ઘટાડવા અને ટકાઉ વિકાસના લક્ષ્યોને આગળ વધારવામાં મદદ મળશે. તેમણે આશા વ્યક્ત કરી કે પ્રોજેક્ટ શિયાળામાં ભૂટાનની ટોચની વીજળીની જરૂરિયાતોને પૂર્ણ કરવામાં મદદ કરશે અને ઉનાળા દરમિયાન ભારતમાં વધારાની સ્વચ્છ ઊર્જાની નિકાસને સક્ષમ બનાવશે. ડ્રુક ગ્રીન પાવરના મેનેજિંગ ડિરેક્ટર દાશો છેવાંગ રિનઝિને પણ આ પ્રોજેક્ટને ભૂટાનની હાઇડ્રોપાવર વિકાસ યાત્રામાં મહત્વપૂર્ણ સીમાચિહ્ન ગણાવ્યો હતો. તેમણે કહ્યું કે આ પ્રોજેક્ટ ભૂટાનની ઊર્જા સુરક્ષાને મજબૂત કરવાની સાથે ભારત-ભૂટાન વચ્ચેની લાંબા ગાળાની ઊર્જા ભાગીદારીને વધુ ગાઢ બનાવશે.