PM મોદીના આગમન પહેલાં વડોદરામાં ‘નમો ફોર વિકસિત ભારત’ પદયાત્રા, સુરસાગર ખાતે ભવ્ય સાંસ્કૃતિક કાર્યક્રમ

Namo for Viksit Bharat Vadodara: વડાપ્રધાન નરેન્દ્ર મોદી વડોદરા શહેરમાં વિવિધ વિકાસ કાર્યોના લોકાર્પણ અને ખાતમુહૂર્ત માટે આવી રહ્યા છે ત્યારે તેમના આગમનને વધાવવા શહેરમાં ભવ્ય કાર્યક્રમોનું આયોજન કરવામાં આવ્યું છે. આ અંતર્ગત નાયબ મુખ્યમંત્રી હર્ષભાઈ સંઘવીના નેતૃત્વમાં ‘નમો ફોર વિકસિત ભારત @ વડોદરા’ પદયાત્રા યોજાઈ હતી.

દાંડિયા બજારથી સુરસાગર સુધી પદયાત્રા

દાંડિયા બજાર સ્થિત ફેકલ્ટી ઓફ ટેકનોલોજીથી કીર્તિસ્તંભ થઈને સુરસાગર તળાવ સુધી વિશાળ પદયાત્રા યોજાઈ હતી. વડોદરા મહાનગરપાલિકા સાથે મોટી સંખ્યામાં નગરજનો પણ આ પદયાત્રામાં ઉત્સાહભેર જોડાયા હતા. નાયબ મુખ્યમંત્રી હર્ષભાઈ સંઘવીએ જણાવ્યું કે વડોદરાની જનતામાં વડાપ્રધાનના કાર્યક્રમને લઈને અનેરો ઉત્સાહ જોવા મળી રહ્યો છે.

એક કલાકમાં તમામ બેઠકો બુક

હર્ષ સંઘવીએ જણાવ્યું કે વડાપ્રધાનના કાર્યક્રમ માટે પ્રથમ વખત ઓનલાઈન ટિકિટિંગ વ્યવસ્થા કરવામાં આવી હતી. જેમાં માત્ર એક કલાકમાં તમામ બેઠકો બુક થઈ ગઈ હતી. ઉપલબ્ધ ક્ષમતા કરતાં ત્રણ ગણી વધુ ટિકિટની માંગ નોંધાતા વહીવટી તંત્ર દ્વારા વિશેષ ફેન ઝોન પણ ઊભા કરવામાં આવ્યા છે.

યુવાનો, NCC કેડેટ્સ સહિત મોટી સંખ્યામાં લોકો જોડાયા

પદયાત્રામાં વિધાનસભાના મુખ્ય દંડક બાળકૃષ્ણ શુક્લ, રાજ્યમંત્રી મનીષાબેન વકીલ, સાંસદ ડો. હેમાંગ જોષી સહિતના પદાધિકારીઓ અને વડોદરા મહાનગરપાલિકાના કમિશનર સહિતના ઉચ્ચ અધિકારીઓ ઉપસ્થિત રહ્યા હતા. આ ઉપરાંત યુવાનો, NCC કેડેટ્સ અને વડોદરાના નગરજનો પણ મોટી સંખ્યામાં જોડાયા હતા.

કૈલાશ ખેરની હાજરીમાં ભવ્ય સાંસ્કૃતિક કાર્યક્રમ

પદયાત્રા બાદ સુરસાગર તળાવ ખાતે ભવ્ય સાંસ્કૃતિક કાર્યક્રમનું આયોજન કરવામાં આવ્યું હતું. આ કાર્યક્રમમાં જાણીતા ગાયક કૈલાશ ખેર વિશેષ ઉપસ્થિત રહ્યા હતા. આ પ્રસંગે વડોદરા શહેરને સ્વચ્છ બનાવવામાં વિશેષ યોગદાન આપનાર ‘સ્વચ્છતા દૂતો’નું ભવ્ય સન્માન પણ કરવામાં આવ્યું હતું.

PM મોદીના આગમનને લઈને વડોદરામાં ઉત્સાહ

વડાપ્રધાન નરેન્દ્ર મોદીના વડોદરા આગમનને લઈને શહેરમાં ઉત્સાહનો માહોલ જોવા મળી રહ્યો છે. ‘નમો ફોર વિકસિત ભારત @ વડોદરા’ અંતર્ગત યોજાયેલી પદયાત્રા અને સાંસ્કૃતિક કાર્યક્રમમાં મોટી સંખ્યામાં લોકો જોડાતા વડોદરામાં PM મોદીના કાર્યક્રમનો માહોલ વધુ ભવ્ય બન્યો છે.