Khel Mahakumbh 2026: વડોદરાથી ખેલ મહાકુંભ-2026નો ભવ્ય પ્રારંભ, 76 લાખથી વધુ ખેલાડીઓ જોડાવાની અપેક્ષા

Khel Mahakumbh 2026 Gujarat: ગુજરાતમાં રમતગમતને પ્રોત્સાહન આપવા માટે આયોજિત ખેલ મહાકુંભ-2026નો મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીના હસ્તે વડોદરાથી રંગારંગ પ્રારંભ કરવામાં આવ્યો છે. ‘ખેલે તે ખીલે’ના મંત્ર સાથે શરૂ થયેલા આ આયોજનમાં આ વર્ષે 76 લાખથી વધુ રમતવીરો જોડાય તેવી અપેક્ષા વ્યક્ત કરવામાં આવી છે. આ પ્રસંગે ખેલ મહાકુંભ-2025માં શ્રેષ્ઠ પ્રદર્શન કરનાર શાળાઓ, જિલ્લાઓ અને મહાનગરપાલિકાઓને રોકડ પુરસ્કાર અને ટ્રોફી આપીને સન્માનિત કરવામાં આવ્યાં હતાં.

ખેલ મહાકુંભે ગુજરાતમાં રમતગમતની નવી સંસ્કૃતિ ઊભી કરી: મુખ્યમંત્રી

સમારોહને સંબોધતાં મુખ્યમંત્રી ભૂપેન્દ્ર પટેલે જણાવ્યું હતું કે ખેલ મહાકુંભે રાજ્યના યુવાનોને પોતાની રમતગમતની પ્રતિભા દર્શાવવા માટે વિશાળ પ્લેટફોર્મ પૂરું પાડ્યું છે. વર્ષ 2010માં શરૂ થયેલી આ રમતયાત્રામાં પ્રથમ વર્ષે આશરે 16.5 લાખ ખેલાડીઓ જોડાયા હતા, જ્યારે વર્ષ 2026માં 76 લાખથી વધુ ખેલાડીઓની ભાગીદારીની અપેક્ષા છે. તેમણે જણાવ્યું કે ગુજરાતમાં પ્રતિભાશાળી ખેલાડીઓની ક્યારેય કમી નહોતી, પરંતુ તેમને યોગ્ય તક, તાલીમ અને માળખાકીય સુવિધાઓની જરૂર હતી. ખેલ મહાકુંભ દ્વારા રાજ્યમાં રમતગમત પ્રત્યે જાગૃતિ વધી છે અને યુવાનોને આગળ વધવાની તક મળી છે.

શ્રેષ્ઠ શાળાઓને ₹5 લાખ સુધીના પુરસ્કાર

ખેલ મહાકુંભ-2025માં ઉત્કૃષ્ટ પ્રદર્શન કરનાર શાળાઓને પુરસ્કાર આપી સન્માનિત કરવામાં આવી હતી.

• પ્રથમ ક્રમે: નોલેજ હાઇસ્કૂલ, નડિયાદ — ₹5 લાખ અને ટ્રોફી

• બીજા ક્રમે: ઊર્મિ સ્કૂલ, વડોદરા — ₹3 લાખ

• ત્રીજા ક્રમે: એસ.આર. હાઇસ્કૂલ, દેવગઢ બારિયા, દાહોદ — ₹2 લાખ

આ ઉપરાંત શ્રેષ્ઠ જિલ્લાઓની શ્રેણીમાં મહેસાણા ઓવરઓલ સ્ટેટ ચેમ્પિયન બન્યું હતું. ખેડાએ સ્ટેટ રનર્સ-અપ અને અમદાવાદે સ્ટેટ સેકન્ડ રનર્સ-અપનું સ્થાન મેળવ્યું હતું. શ્રેષ્ઠ મહાનગરપાલિકાઓમાં સુરત મહાનગરપાલિકા ઓવરઓલ સ્ટેટ ચેમ્પિયન બની હતી, જ્યારે અમદાવાદ મહાનગરપાલિકા સ્ટેટ રનર્સ-અપ અને વડોદરા મહાનગરપાલિકા સ્ટેટ સેકન્ડ રનર્સ-અપ રહી હતી.

મહિલા ખેલાડીઓ અને પ્રતિભાશાળી રમતવીરોને પ્રોત્સાહન

મુખ્યમંત્રીએ મહિલા રમતવીરોની ભાગીદારીનો ઉલ્લેખ કરતાં જણાવ્યું હતું કે ‘ખેલો ઇન્ડિયા વુમન્સ લીગ’ અને ‘અસ્મિતા’ જેવી પહેલથી મહિલાઓને રમતગમત ક્ષેત્રે આગળ વધવાની વધુ તકો મળી છે. અસ્મિતા યોજના હેઠળ પાંચ કરોડ રૂપિયાથી વધુના બજેટ સાથે 212 સ્પર્ધાઓને મંજૂરી આપવામાં આવી છે, જેમાં 33 હજારથી વધુ મહિલા રમતવીરોએ ભાગ લીધો છે. તેમણે વધુમાં જણાવ્યું હતું કે ગુજરાત સરકાર પ્રતિભાશાળી ખેલાડીઓની ઓળખ, તેમની ક્ષમતા પ્રમાણે તાલીમ અને આંતરરાષ્ટ્રીય કક્ષાની તૈયારી માટે પ્રતિબદ્ધ છે. રાજ્યમાં ટેલેન્ટ હન્ટ અભિયાન દ્વારા બાળકો અને યુવાનોમાં રહેલી રમતગમતની પ્રતિભાને ઓળખીને તેમને યોગ્ય માર્ગદર્શન આપવાની દિશામાં પણ પ્રયાસો કરવામાં આવશે.

શક્તિદૂત યોજના હેઠળ 500 ખેલાડીઓને લાભ આપવાનો નિર્ણય

નાયબ મુખ્યમંત્રી હર્ષ સંઘવીએ જણાવ્યું હતું કે ખેલ મહાકુંભનો હેતુ રાજ્યના યુવાનોને મોબાઇલ અને ડિજિટલ માધ્યમો સુધી સીમિત રાખવાને બદલે રમતના મેદાન તરફ પ્રેરિત કરવાનો છે. રમતગમતથી યુવાનોમાં શિસ્ત, ટીમભાવના અને હાર-જીતને સ્વીકારવાની ક્ષમતા વિકસે છે. તેમણે જણાવ્યું હતું કે રાજ્યમાં ખેલાડીઓની તાલીમ અને સુવિધાઓ માટે બજેટમાં ચાર ગણો વધારો કરવામાં આવ્યો છે. ઉપરાંત, શક્તિદૂત યોજના હેઠળ અગાઉ 50 ખેલાડીઓની પસંદગી કરવામાં આવતી હતી, જે વધારીને હવે 500 ખેલાડીઓને સીધો લાભ આપવાનો નિર્ણય લેવામાં આવ્યો છે.

2036ના ઓલિમ્પિકને ધ્યાનમાં રાખીને તૈયારી

મુખ્યમંત્રીએ વર્ષ 2036ના ઓલિમ્પિકમાં ભારતનું પ્રતિનિધિત્વ વધુ વ્યાપક બને તે માટે પ્રતિભાશાળી ખેલાડીઓને નાની ઉંમરથી તાલીમ આપવાની જરૂરિયાત પર ભાર મૂક્યો હતો. ગુજરાતમાં વર્ષ 2030માં કોમનવેલ્થ ગેમ્સના આયોજનની દિશામાં તૈયારીઓ અને 2036ના ઓલિમ્પિકની યજમાની મેળવવાની સંભાવનાઓને ધ્યાનમાં રાખીને રમતગમતનું માળખું વધુ મજબૂત બનાવવાના પ્રયાસો થઈ રહ્યા હોવાનું તેમણે જણાવ્યું હતું. આ પ્રસંગે રમતગમત વિભાગના સચિવ રાહુલ ગુપ્તાએ સ્વાગત પ્રવચન કર્યું હતું. કાર્યક્રમમાં વડોદરા અને સુરતના મેયર, ધારાસભ્યો, વિવિધ પદાધિકારીઓ, ઉચ્ચ અધિકારીઓ, ખેલાડીઓ અને વાલીઓ ઉપસ્થિત રહ્યા હતા. ખેલ મહાકુંભ-2026 દ્વારા રાજ્યના વધુ યુવાનો રમતગમત સાથે જોડાય, પોતાની પ્રતિભા નિખારે અને રાષ્ટ્રીય તથા આંતરરાષ્ટ્રીય સ્તરે ગુજરાતનું નામ રોશન કરે તેવો આશાવાદ વ્યક્ત કરવામાં આવ્યો હતો.