Gujaratના એકતાનગરમાં 5-6 ઓક્ટોબરે હાઈવે વિકાસ પર ચિંતન શિબિર, નીતિન ગડકરી કરશે ઉદ્ઘાટન

Highway Infrastructure Chintan Shivir Gujarat: દેશભરમાં હાઈવે અને માર્ગ માળખાકીય સુવિધાઓના વિકાસને વધુ અસરકારક, સુરક્ષિત અને સમયબદ્ધ બનાવવા માટે કેન્દ્રીય માર્ગ પરિવહન અને રાજમાર્ગ મંત્રાલય દ્વારા ગુજરાતના એકતાનગરમાં બે દિવસીય ‘ચિંતન શિબિર’નું આયોજન કરવામાં આવ્યું છે. નર્મદા જિલ્લામાં 5 અને 6 ઓક્ટોબર, 2026ના રોજ યોજાનારા આ કાર્યક્રમમાં હાઈવે પ્રોજેક્ટના અમલીકરણમાં આવતી મુશ્કેલીઓ અને તેના વ્યવહારુ ઉકેલો અંગે ચર્ચા કરવામાં આવશે.

નીતિન ગડકરી કરશે ઉદ્ઘાટન

આ ચિંતન શિબિરનું ઉદ્ઘાટન કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી કરશે. આ પ્રસંગે કેન્દ્રીય રાજ્યમંત્રી અજય ટમ્ટા અને હર્ષ મલ્હોત્રા પણ ઉપસ્થિત રહેશે. કાર્યક્રમમાં કેન્દ્ર અને રાજ્ય સરકારોના વરિષ્ઠ અધિકારીઓ, માર્ગ પરિવહન અને જાહેર બાંધકામ વિભાગના મંત્રીઓ, પ્રોજેક્ટ અમલીકરણ એજન્સીઓના પ્રતિનિધિઓ તથા નિષ્ણાતો ભાગ લેશે.

હાઈવે પ્રોજેક્ટની મુશ્કેલીઓ અને ઉકેલો પર ચર્ચા

મંત્રાલયના જણાવ્યા અનુસાર, શિબિરનો મુખ્ય ઉદ્દેશ હાઈવે પ્રોજેક્ટના અમલીકરણમાં આવતી અડચણો ઓળખવાનો, કેન્દ્ર અને રાજ્યો વચ્ચે સંકલન વધારવાનો અને નવીન ઉકેલો શોધવાનો છે. આ ઉપરાંત વિવિધ રાજ્યોના અનુભવો અને શ્રેષ્ઠ કામગીરીની પદ્ધતિઓની આપ-લે પણ કરવામાં આવશે.

બે દિવસીય કાર્યક્રમમાં પાંચ મુખ્ય વિષયો પર સત્રો યોજાશે. તેમાં પીએમ ગતિશક્તિ અને સંકલિત માળખાકીય આયોજન, જમીન સંપાદન અને ભૂમિ રાશિ પ્લેટફોર્મ, મોડલ કન્સેશન એગ્રીમેન્ટ અને રેટિંગ્સ, હાઈવે સુરક્ષા તેમજ ગુણવત્તા ખાતરી અને પ્રોજેક્ટ મોનિટરિંગનો સમાવેશ થાય છે.

ગુણવત્તા અને માર્ગ સુરક્ષા પર વિશેષ ભાર

ચિંતન શિબિરમાં હાઈવે નિર્માણની ગુણવત્તા સુધારવા, પ્રોજેક્ટની દેખરેખ મજબૂત બનાવવા અને માર્ગ અકસ્માતો ઘટાડવા માટે સુરક્ષિત ડિઝાઇન અપનાવવા જેવા મુદ્દાઓ પર પણ ચર્ચા થશે. જમીન સંપાદન સંબંધિત અવરોધો દૂર કરવા અને કરાર સંબંધિત સમસ્યાઓના ઉકેલ પર પણ વિચારવિમર્શ કરવામાં આવશે.

મંત્રાલયને આશા છે કે આ શિબિરથી કેન્દ્ર અને રાજ્ય સરકારો વચ્ચે સહયોગ વધશે અને દેશના માર્ગ તથા રાજમાર્ગ પ્રોજેક્ટને વધુ ઝડપથી પૂર્ણ કરવા માટે અસરકારક નીતિ અને અમલીકરણનું માળખું તૈયાર કરવામાં મદદ મળશે.