Surat : અંજની બુટભવાની BRTS રોડ પર આવેલા અંજની ખાડી બ્રિજ ઉપર પુણાગામ હોટ ફિક્સ તરફના પ્લાસ્ટિકના કચરામાં ફરી એક વખત આગ લાગવાની ઘટના સામે આવી છે. પ્લાસ્ટિકના કચરામાં અચાનક આગ લાગતા આસપાસના વિસ્તારમાં ધુમાડાના ગોટેગોટા જોવા મળ્યા હતા.

આગની ઘટનાને પગલે બ્રિજ પરથી પસાર થતા લોકો તેમજ આસપાસના સ્થાનિકોમાં પણ ચિંતા જોવા મળી હતી. પ્લાસ્ટિક સહિતના કચરામાં આગ લાગવાથી ધુમાડો ફેલાતો હોવાના કારણે વાહનચાલકોને પણ મુશ્કેલીનો સામનો કરવો પડ્યો હતો.

પુણાગામમાં કચરાના ઢગલામાં આગ

સ્થાનિકોના જણાવ્યા મુજબ, પુણાગામ વિસ્તારમાં કચરાના ઢગલામાં વારંવાર આગ લાગવાની ઘટનાઓ બની રહી છે. દર બે દિવસે આગ લાગતી હોવાનો સ્થાનિકોનો આક્ષેપ છે. વારંવાર આગની ઘટનાઓ બનતી હોવા છતાં સમસ્યાનો કાયમી ઉકેલ ન આવતાં લોકોમાં રોષ અને ચિંતા બંને જોવા મળી રહ્યા છે.

ખાસ કરીને પ્લાસ્ટિકના કચરામાં આગ લાગતી હોવાથી પરિસ્થિતિ વધુ ગંભીર બની શકે છે. પ્લાસ્ટિક સળગવાથી ધુમાડો ફેલાવાની સાથે આગ નજીકના વિસ્તારમાં પ્રસરી જવાની પણ શક્યતા રહે છે. અંજની ખાડી બ્રિજ અને BRTS રોડ જેવા જાહેર માર્ગ નજીક આવી ઘટના બનતી હોવાથી વાહનવ્યવહાર અને લોકોની સુરક્ષા અંગે પણ સવાલો ઊભા થઈ રહ્યા છે.

સ્થાનિકોનું કહેવું છે કે જો કચરાના ઢગલામાં વારંવાર આગ લાગતી રહેશે અને તેના પર સમયસર નિયંત્રણ નહીં આવે તો ભવિષ્યમાં મોટી દુર્ઘટના સર્જાઈ શકે છે. આગ નજીકના વાહનો, આસપાસની મિલકતો અથવા અન્ય વિસ્તારો સુધી પહોંચે તો જાનમાલનું નુકસાન થવાની શક્યતા પણ નકારી શકાય નહીં.

આ ઘટનાને પગલે સ્થાનિકો દ્વારા જવાબદાર તંત્ર દ્વારા કચરાના ઢગલાનો યોગ્ય નિકાલ કરવામાં આવે અને વારંવાર આગ લાગવાની સમસ્યાનું કાયમી નિરાકરણ લાવવામાં આવે તેવી માંગ ઉઠી રહી છે. હાલ પુણાગામ વિસ્તારમાં કચરામાં લાગેલી આગની ઘટનાને પગલે લોકોમાં ફરી ચિંતા ફેલાઈ છે. વારંવાર બનતી આવી ઘટનાઓને રોકવા માટે તંત્ર દ્વારા યોગ્ય કાર્યવાહી ક્યારે કરવામાં આવશે તે હવે જોવાનું રહેશે.