Gram Panchayat: ઓલપાડમાં ફરી મહિલા સરપંચ સસ્પેન્ડ! રૂચિકા પટેલને હોદ્દા પરથી દૂર કરાયા

Olpad Sarpanch Ruchika Patel Suspended: સુરત જિલ્લાના ઓલપાડ ગ્રામ પંચાયતમાં સરપંચ અને ડેપ્યુટી સરપંચ વચ્ચેનો વિવાદ હવે નવા વળાંક પર પહોંચ્યો છે. ગ્રામ પંચાયતનાં સરપંચ રૂચિકા પટેલને હોદ્દા પરથી દૂર કરવામાં આવ્યાં છે. ડેપ્યુટી સરપંચ દ્વારા કરવામાં આવેલી ફરિયાદના આધારે તપાસ હાથ ધર્યા બાદ સુરત જિલ્લા વિકાસ અધિકારીએ આ કાર્યવાહી કરી હોવાનું જાણવા મળ્યું છે.

મળતી માહિતી મુજબ, રૂચિકા પટેલ સામે માત્ર 16 દિવસમાં આશરે રૂ. 41 લાખનાં કામો અને ચુકવણીઓ કરી દેવા અંગે ફરિયાદ કરવામાં આવી હતી. આ મુદ્દે સરપંચ અને ડેપ્યુટી સરપંચ વચ્ચે વિવાદ વકર્યો હતો. બંને પક્ષોએ એકબીજા સામે ભ્રષ્ટાચારના આક્ષેપો કર્યા હતા. મામલો એટલો ઉગ્ર બન્યો હતો કે ભ્રષ્ટાચારના આરોપોને લઈને કોર્ટમાં પણ ફરિયાદ કરવામાં આવી હતી. હવે જિલ્લા વિકાસ અધિકારીની કાર્યવાહી બાદ રૂચિકા પટેલને સરપંચપદેથી દૂર કરવામાં આવતાં ઓલપાડના સ્થાનિક રાજકારણમાં ફરી ગરમાવો આવ્યો છે. હાલ ગ્રામ પંચાયતના સરપંચ તરીકે આનંદભાઈ કહારને ચાર્જ સોંપવામાં આવ્યો હોવાનું જાણવા મળ્યું છે.

ઉલ્લેખનીય છે કે ઓલપાડ ગ્રામ પંચાયતમાં મહિલા સરપંચ સામે કાર્યવાહી થવાની આ પહેલી ઘટના નથી. વર્ષ 2023માં મહિલા સરપંચ રવીના પટેલને પણ સસ્પેન્ડ કરવામાં આવ્યાં હતાં. હવે વર્ષ 2026માં રૂચિકા પટેલ સામે કાર્યવાહી થતાં ઓલપાડ ગ્રામ પંચાયત ફરી ચર્ચામાં આવી છે. એક તરફ સરપંચ અને ડેપ્યુટી સરપંચ વચ્ચેના આક્ષેપ-પ્રતિઆક્ષેપો અને બીજી તરફ વહીવટી કાર્યવાહીથી ઓલપાડનું સ્થાનિક રાજકારણ ગરમાયું છે. જોકે, ભ્રષ્ટાચાર સંબંધિત આક્ષેપો અંગે અંતિમ નિષ્કર્ષ માટે સત્તાવાર તપાસના તારણો અને સંબંધિત આદેશની વિગતો મહત્વપૂર્ણ રહેશે.