Gujaratના તમામ CCTV કેમેરા એક જ ડેશબોર્ડ સાથે જોડવાનું લક્ષ્ય, સુરતમાં ઈ-રક્ષક હેકેથોનમાં હર્ષ સંઘવીનું નિવેદન

E-Rakshak Hackathon Surat: સાયબર ક્રાઇમ પર નિયંત્રણ મેળવવા અને ડિજિટલ સુરક્ષાને વધુ મજબૂત બનાવવા માટે ટેકનોલોજી આધારિત ઉકેલો વિકસાવવાની દિશામાં ગુજરાત સરકાર આગળ વધી રહી છે. સુરતના સરદાર વલ્લભભાઈ નેશનલ ઇન્સ્ટિટ્યૂટ ઑફ ટેકનોલોજી (SVNIT) ખાતે યોજાયેલા ‘ઈ-રક્ષક હેકેથોન’ના ગ્રાન્ડ ફિનાલેમાં નાયબ મુખ્યમંત્રી હર્ષ સંઘવીએ ગુજરાતના તમામ CCTV કેમેરાને એક જ ડેશબોર્ડ સાથે જોડવાનું સ્વપ્ન વ્યક્ત કર્યું હતું. સુરત શહેર પોલીસ અને SVNITના NEXUS યુનિટ દ્વારા આયોજિત આ હેકેથોનમાં છ રાજ્યોની 13થી વધુ યુનિવર્સિટીઓ સાથે સંકળાયેલી કોલેજોની 31 ટીમોના 150થી વધુ વિદ્યાર્થીઓએ ભાગ લીધો હતો. વિદ્યાર્થીઓએ સાયબર સુરક્ષા, ડિજિટલ પડકારો અને પોલીસની કામગીરીમાં ઉપયોગી થઈ શકે તેવા ટેકનોલોજીકલ ઉકેલોના પ્રોટોટાઇપ રજૂ કર્યા હતા.

હાર્ડવેર નહીં, સોફ્ટવેર આધારિત ઉકેલો પર ભાર

વિદ્યાર્થીઓનાં મોડેલ્સ નિહાળ્યા બાદ હર્ષ સંઘવીએ જણાવ્યું હતું કે ટેકનોલોજી જેટલી ઉપયોગી છે, એટલા જ તેના કારણે નવા પડકારો પણ ઊભા થાય છે. વારંવાર હાર્ડવેર અને કેમેરા બદલવાને બદલે સોફ્ટવેર આધારિત ટકાઉ ઉકેલો વિકસાવવા પર ભાર મૂકવાની જરૂર છે. તેમણે જણાવ્યું હતું કે આર્ટિફિશિયલ ઇન્ટેલિજન્સ (AI) અને કેમેરા ઇન્ટિગ્રેશનનો યોગ્ય ઉપયોગ ટ્રાફિક વ્યવસ્થામાં પણ મદદરૂપ થઈ શકે છે. ટ્રાફિક સિગ્નલ પર નાગરિકોના થોડા સેકન્ડ બચાવવાથી મોટા પાયે સમય અને ઈંધણની બચત થઈ શકે છે.

યુવાનોના ટેક સોલ્યુશન્સનો પોલીસ કામગીરીમાં થશે ઉપયોગ

નાયબ મુખ્યમંત્રીએ જણાવ્યું હતું કે હેકેથોનમાં યુવાનો દ્વારા વિકસાવવામાં આવતા ટેકનોલોજીકલ ઉકેલોનો આગામી સમયમાં FIR અને સાયબર ક્રાઇમના કેસોના નિરાકરણ જેવી સરકારી પ્રક્રિયાઓમાં ઉપયોગ કરવાની દિશામાં વિચારણા છે. તેમણે યુવાનોને માત્ર સોશિયલ મીડિયા અને રોજિંદી ચર્ચાઓ સુધી મર્યાદિત ન રહેતાં સરકારી યોજનાઓ, સ્ટાર્ટઅપ નીતિઓ અને ટેકનોલોજીના ક્ષેત્રમાં ઉપલબ્ધ તકોનો અભ્યાસ કરવા પણ અનુરોધ કર્યો હતો.

સ્ટાર્ટઅપ માટે સરકાર ‘રિસ્ક પાર્ટનર’ બનવા તૈયાર

હર્ષ સંઘવીએ જણાવ્યું હતું કે ગુજરાત સરકારની સ્ટાર્ટઅપ, MSME તથા વિજ્ઞાન અને ટેકનોલોજી સંબંધિત યોજનાઓ હેઠળ યુવા ઉદ્યોગસાહસિકોને વિવિધ પ્રકારની સહાય ઉપલબ્ધ છે. તેમાં સીડ ફંડ, ઓપરેશનલ ખર્ચ, ઓફિસ ભાડું, માર્કેટિંગ અને ક્લાઉડ સેવાઓ સંબંધિત સહાયનો સમાવેશ થઈ શકે છે. યુવાનોના નવીન વિચારોને વ્યવસાયિક સ્વરૂપ આપવા માટે રાજ્ય સરકાર સહયોગી બનવા તૈયાર હોવાનું તેમણે જણાવ્યું હતું. ખાસ કરીને મહિલાઓના સ્ટાર્ટઅપને પ્રોત્સાહન આપવા માટે પણ વિવિધ જોગવાઈઓ કરવામાં આવી હોવાનું તેમણે ઉમેર્યું હતું.

458 વિદ્યાર્થીઓનાં રજિસ્ટ્રેશન, 31 ટીમો ગ્રાન્ડ ફિનાલેમાં

DCP સાયબર ક્રાઇમ વિશાખા જૈને જણાવ્યું હતું કે હેકેથોન માટે પોલીસ સ્ટેશનોમાં કરવામાં આવેલા સર્વે અને નાગરિકોને રોજિંદા જીવનમાં પડતી મુશ્કેલીઓના આધારે 9થી 10 સમસ્યાઓને કેન્દ્રમાં રાખીને પ્રોબ્લેમ સ્ટેટમેન્ટ તૈયાર કરવામાં આવ્યાં હતાં. આ હેકેથોન માટે દેશભરની કોલેજોમાંથી 458 વિદ્યાર્થીઓએ રજિસ્ટ્રેશન કરાવ્યું હતું. તેમાંથી પસંદ થયેલી 31 ટીમોના 150 વિદ્યાર્થીઓ ગ્રાન્ડ ફિનાલેમાં પહોંચ્યા હતા. પોલીસ કમિશનર વાબાંગ જમીરે જણાવ્યું હતું કે આ આયોજનનો મુખ્ય હેતુ વિદ્યાર્થીઓની નવીન ટેકનોલોજીકલ પ્રતિભાનો ઉપયોગ કરીને ડિજિટલ સુરક્ષા મજબૂત બનાવવાનો અને સાયબર ગુનાઓને રોકવા માટે અસરકારક ઉકેલો મેળવવાનો છે. ઈ-રક્ષક હેકેથોન દ્વારા પોલીસ અને ટેકનોલોજી ક્ષેત્રના યુવાનો વચ્ચે સહયોગ વધારવાનો પ્રયાસ કરવામાં આવ્યો છે. હવે વિદ્યાર્થીઓ દ્વારા રજૂ કરાયેલા પ્રોટોટાઇપમાંથી કયા ઉકેલોનો વાસ્તવિક પોલીસ કામગીરીમાં ઉપયોગ થાય છે તેના પર નજર રહેશે.