Surat Crime : શોરૂમના પૂર્વ ગોડાઉન મેનેજરે જ વિશ્વાસઘાત કરીને 9 એક્ટિવા અને 1 શાઈન બાઈક ગાયબ કરી હોવાનો મામલો સામે આવ્યો છે. સરથાણા પોલીસે તાત્કાલિક કાર્યવાહી કરીને આરોપી દિપુલ માણીયાને ગણતરીના કલાકોમાં ઝડપી લીધો છે.

મળતી માહિતી મુજબ, શોરૂમમાં ગોડાઉનનો સ્ટોક ચેક કરવામાં આવતા વાહનોની સંખ્યામાં તફાવત જોવા મળ્યો હતો. સ્ટોક વેરિફિકેશન દરમિયાન 9 એક્ટિવા અને 1 શાઈન બાઈક ગોડાઉનમાં ન હોવાનું સામે આવ્યું હતું. ત્યારબાદ શોરૂમ મેનેજમેન્ટ દ્વારા સમગ્ર મામલે તપાસ હાથ ધરવામાં આવી હતી.

પૂર્વ ગોડાઉન મેનેજરે કર્યો વિશ્વાસઘાત

તપાસ દરમિયાન શંકાની સોય શોરૂમના પૂર્વ ગોડાઉન મેનેજર દિપુલ માણીયા તરફ ગઈ હતી. મળતી માહિતી પ્રમાણે, સ્ટાફ સાથે થયેલા ઝઘડા બાદ દિપુલને નોકરીમાંથી કાઢી મૂકવામાં આવ્યો હતો. ત્યારબાદ તેણે શોરૂમ સાથે વિશ્વાસઘાત કરી ગોડાઉનમાંથી નવી નક્કોર ગાડીઓ બારોબાર સગેવગે કરી હોવાનું પોલીસ ફરિયાદમાં સામે આવ્યું છે.

આરોપીએ ગાડીઓ વેચવા માટે કોઈપણ પ્રકારનું પાસિંગ કે બિલ વગર પોતાના પરિચિતોને માત્ર રૂ. 50થી 60 હજારમાં વાહનો પધરાવી દીધા હોવાની વિગતો સામે આવી છે. નવી નક્કોર ગાડીઓ આટલી ઓછી કિંમતમાં વેચવામાં આવતા સમગ્ર મામલો વધુ ગંભીર બન્યો હતો.

શોરૂમમાંથી 10 વાહનોની ચોરી

ઘટનાની જાણ થતાં સરથાણા પોલીસે તપાસ તેજ કરી હતી. પોલીસે આરોપી દિપુલ માણીયાને ગણતરીના કલાકોમાં ઝડપી લીધો હતો. ત્યારબાદ તેની પૂછપરછમાં વાહનો ક્યાં અને કોને વેચવામાં આવ્યા હતા તે અંગે મહત્વની માહિતી મળી હતી. પોલીસે તપાસને આગળ વધારી રાજકોટ, અમરેલી અને ભાવનગર સહિતના વિસ્તારોમાં દરોડા પાડ્યા હતા.

આ કાર્યવાહી દરમિયાન બારોબાર વેચી દેવામાં આવેલા તમામ 10 વાહનો સફળતાપૂર્વક રિકવર કરવામાં આવ્યા હતા. આ ઘટનામાં પોલીસની ઝડપી કાર્યવાહીથી શોરૂમમાંથી ગાયબ થયેલા તમામ વાહનો પરત મેળવવામાં સફળતા મળી છે. હવે પોલીસ આરોપી દ્વારા અન્ય કોઈ વાહન અથવા મિલકત સાથે પણ આવી રીતે છેતરપિંડી કરવામાં આવી હતી કે કેમ તે અંગે તપાસ કરી રહી છે.

પોલીસે તમામ ગાડીઓ પરત મેળવી

આ સમગ્ર ઘટનાએ શોરૂમ અને ગોડાઉનમાં સ્ટોક મેનેજમેન્ટ તથા કર્મચારીઓની જવાબદારી અંગે પણ સવાલો ઉભા કર્યા છે. નિયમિત સ્ટોક વેરિફિકેશન દરમિયાન ગાડીઓ ગાયબ હોવાનો ભેદ ખુલ્યો હતો. હાલ સરથાણા પોલીસે આરોપી દિપુલ માણીયા સામે ગુનો નોંધી કાયદેસરની કાર્યવાહી હાથ ધરી છે. 10 વાહનોની રિકવરી બાદ હવે પોલીસ સમગ્ર કેસમાં અન્ય કોઈ વ્યક્તિની સંડોવણી છે કે નહીં અને વાહનોની ખરીદી-વેચાણમાં કોણ-કોણ સામેલ હતું તે અંગે વધુ તપાસ કરી રહી છે.

આ પણ વાંચો : Jonty Sidhu નો સિક્સર-ચોગ્ગાનો વરસાદ, સેન્ટ્રલ દિલ્હીની ફાઇનલમાં એન્ટ્રી

View post on Instagram