Rajkotમાં પ્રથમ ઈ-સાયબર FIRનો ચોંકાવનારો કેસ! ‘વિંગ કમાન્ડર’ બની મહિલાને એરફોર્સમાં નોકરીની લાલચ, ₹1.95 લાખની ઠગાઈ
Rajkot
Rajkotમાં પ્રથમ ઈ-સાયબર FIRનો ચોંકાવનારો કેસ! ‘વિંગ કમાન્ડર’ બની મહિલાને એરફોર્સમાં નોકરીની લાલચ, ₹1.95 લાખની ઠગાઈ
Rajkot
Rajkot: રાજકોટ શહેરમાં સાઇબર ક્રાઇમનો ચોંકાવનારો કિસ્સો સામે આવ્યો છે. યુનિવર્સિટી પોલીસ સ્ટેશન વિસ્તારમાં રાજકોટ શહેરની પ્રથમ ઈ-સાયબર FIR નોંધાઈ હોવાનું સામે આવ્યું છે. ગત 31 ઓગસ્ટે ગૃહમંત્રી દ્વારા ઈ-સાયબર FIR પોર્ટલની જાહેરાત કરવામાં આવ્યા બાદ 4 સપ્ટેમ્બરના રોજ એક મહિલાએ આ પોર્ટલ પર સાઇબર છેતરપિંડી અંગે ફરિયાદ નોંધાવી હતી. ફરિયાદના આધારે ગાંધીગ્રામ-2 પોલીસે કાર્યવાહી કરી આરોપી પ્રતીક મહેશભાઈ ભારદ્વાજની અટકાયત કરી હોવાનું સામે આવ્યું છે. રાજકોટમાં એરફોર્સમાં નોકરી અપાવવાના બહાને Instagram મારફતે ₹1.95 લાખની છેતરપિંડીનો કેસ પણ નોંધાયો હોવાનું અહેવાલોમાં સામે આવ્યું છે.
Instagram પર ‘વિંગ કમાન્ડર’ બની ઓળખ આપી
ફરિયાદ મુજબ, પ્રતીક મહેશભાઈ ભારદ્વાજે Instagram પર ફેક આઈડી બનાવી પોતાની ઓળખ ભારતીય વાયુસેનાના વિંગ કમાન્ડર તરીકે આપી હતી. એટલું જ નહીં, તેણે પોતે પ્રખ્યાત સૂર્યકિરણ એરોબેટિક ટીમ સાથે સંકળાયેલો હોવાનો દાવો કર્યો હતો. આરોપીએ વાયુસેનાના ગણવેશમાં પોતાના ફોટા અને વીડિયો સોશિયલ મીડિયા પર અપલોડ કર્યા હતા, જેના કારણે મહિલાને તેની ઓળખ સાચી હોવાનો વિશ્વાસ થયો હતો. મીડિયા અહેવાલમાં પણ આરોપીએ પોતાને એરફોર્સનો અધિકારી ગણાવી મહિલાને નોકરી અપાવવાની લાલચ આપી હોવાનું જણાવાયું છે.
એરફોર્સમાં નોકરીની લાલચ આપી ₹1.95 લાખ પડાવ્યા
આરોપીએ મહિલાને એરફોર્સમાં નોકરી અપાવવાની લાલચ આપી અલગ-અલગ કારણો જણાવી પૈસાની માગણી કરી હતી. મહિલાએ આરોપીના કહેવા પર ટુકડે-ટુકડે કરીને કુલ ₹1.95 લાખ ચૂકવ્યા હતા. શરૂઆતમાં વિશ્વાસમાં આવી ગયેલી મહિલાને બાદમાં નોકરીનો કોઈ લેટર ન મળ્યો અને આરોપી તરફથી વધુ પૈસાની માગણી કરવામાં આવતા સમગ્ર મામલે શંકા ગઈ હતી. અહેવાલ મુજબ મહિલાએ આરોપીને પોતાના જરૂરી દસ્તાવેજો પણ આપ્યા હતા.
શંકા જતા ઈ-સાયબર પોર્ટલ પર કરી ફરિયાદ
આરોપીની વાતો પર શંકા જતા મહિલાએ 4 સપ્ટેમ્બરના રોજ ઈ-સાયબર પોર્ટલ પર ફરિયાદ નોંધાવી હતી. નોંધનીય છે કે નેશનલ સાયબર ક્રાઇમ રિપોર્ટિંગ પોર્ટલ પર નાગરિકો ઓનલાઈન સાઇબર ક્રાઇમની ફરિયાદ નોંધાવી શકે છે અને શંકાસ્પદ મોબાઇલ નંબર, ઈ-મેલ, બેંક એકાઉન્ટ, સોશિયલ મીડિયા તથા અન્ય ઓળખ અંગે પણ તપાસની સુવિધા ઉપલબ્ધ છે.
ગાંધીગ્રામ-2 પોલીસે આરોપીની અટકાયત કરી
ફરિયાદ મળ્યા બાદ ગાંધીગ્રામ-2 પોલીસે તપાસ હાથ ધરી અને આરોપી પ્રતીક ભારદ્વાજને ઝડપી લીધો હોવાનું સામે આવ્યું છે. હાલ આરોપીના રિમાન્ડ મેળવવાની તજવીજ હાથ ધરવામાં આવી છે. પોલીસ તપાસમાં આરોપી અગાઉ પ્રોહિબિશનના બે ગુનામાં પણ સંડોવાયેલો હોવાનું સામે આવ્યું હોવાનું ફરિયાદમાં જણાવાયું છે.
અન્ય લોકો પણ ભોગ બન્યા હોય તો પોલીસનો સંપર્ક કરવા અપીલ
પોલીસ દ્વારા નાગરિકોને અપીલ કરવામાં આવી છે કે જો અન્ય કોઈ વ્યક્તિ પણ આ શખ્સ દ્વારા કરવામાં આવેલી છેતરપિંડી, ધાકધમકી કે અન્ય કોઈ પ્રકારની છેતરપિંડીનો ભોગ બની હોય તો નિઃસંકોચ પોલીસનો સંપર્ક કરે. સોશિયલ મીડિયા પર કોઈ વ્યક્તિ પોતાની ઓળખ સરકારી અધિકારી, સૈનિક કે અન્ય પ્રતિષ્ઠિત વ્યક્તિ તરીકે આપે ત્યારે માત્ર ફોટા અને યુનિફોર્મના આધારે વિશ્વાસ ન કરવા અને પૈસાની લેવડદેવડ પહેલાં તેની સત્તાવાર ઓળખની ખરાઈ કરવાની જરૂર છે.
