Vansdaમાં દીપડાની અવરજવરથી વન વિભાગ એલર્ટ, એલઈડી સ્ક્રીન દ્વારા ગ્રામજનોને કરાયા જાગૃત

Vansda Leopard Awareness Campaign: નવસારી જિલ્લાના વાંસદા તાલુકામાં છેલ્લા કેટલાક સમયથી દીપડા દેખાવાની ઘટનાઓ સામે આવતાં વન વિભાગ દ્વારા જનજાગૃતિ અભિયાન હાથ ધરવામાં આવ્યું છે. માનવ અને વન્યપ્રાણી વચ્ચેના ઘર્ષણને અટકાવવા માટે વન વિભાગ ગામડાંઓથી લઈને જાહેર સ્થળો સુધી લોકોને સાવચેતીનાં પગલાં અંગે માહિતગાર કરી રહ્યો છે.

ગામડાંઓ અને જાહેર સ્થળોએ જાગૃતિ અભિયાન

વન વિભાગ દ્વારા આ અભિયાન અંતર્ગત ગામડાંઓ, શાળાઓ, દૂધ મંડળીઓ, ચાર રસ્તાઓ અને લોકોની વધુ અવરજવર રહેતી જગ્યાઓ પર એલઈડી સ્ક્રીનના માધ્યમથી જાગૃતિ ફેલાવવામાં આવી રહી છે. એલઈડી સ્ક્રીન પર દીપડો દેખાય ત્યારે કઈ સાવચેતી રાખવી, વન્યપ્રાણીથી સુરક્ષિત કેવી રીતે રહેવું અને માનવ-વન્યપ્રાણી વચ્ચેનો સંઘર્ષ ટાળવા શું કરવું તે અંગેના વીડિયો દર્શાવવામાં આવી રહ્યા છે.

દીપડો દેખાય તો શું કરવું?

વન વિભાગનો મુખ્ય ઉદ્દેશ નાગરિકોમાં વન્યપ્રાણીઓ અંગે જાગૃતિ વધારવાનો, અફવાઓથી દૂર રહેવા સમજાવવાનો અને સાવચેતી રાખવા પ્રેરિત કરવાનો છે. દીપડાની હાજરી જણાય ત્યારે ગભરાટ ફેલાવવાને બદલે યોગ્ય પગલાં લેવાં જરૂરી છે. વન વિભાગે નાગરિકોને અપીલ કરી છે કે દીપડો દેખાય તો તેની નજીક જવાનો કે તેને ઉશ્કેરવાનો પ્રયાસ ન કરવો. સુરક્ષિત અંતર જાળવી રાખવું અને તાત્કાલિક વન વિભાગને જાણ કરવી.

માનવજીવન અને વન્યજીવોની સુરક્ષા પર ભાર

વન વિભાગ દ્વારા હાથ ધરવામાં આવેલી આ પહેલનો હેતુ માનવજીવનની સાથે વન્યજીવોની સુરક્ષા જાળવવાનો પણ છે. નાગરિકો સાવચેતી અને જવાબદારીપૂર્વક વર્તે તથા વન વિભાગને સહયોગ આપે તો માનવ અને વન્યપ્રાણી વચ્ચેના ઘર્ષણની શક્યતાઓ ઘટાડી શકાય છે.