Navsariમાં પાણી માટે વલખાં! 150 કરોડના ખર્ચ છતાં દાંડીવાડના 70 પરિવારો છ મહિનાથી તરસ્યા

Navsari Water Crisis: નવસારી મહાનગરપાલિકા દ્વારા પાણી પુરવઠા યોજના પાછળ રૂ. 150 કરોડથી વધુનો ખર્ચ કરવામાં આવ્યો હોવા છતાં શહેરના અનેક વિસ્તારોમાં પાણીની સમસ્યા યથાવત હોવાની ફરિયાદો સામે આવી રહી છે. નવી પાઇપલાઇનો નાખ્યા બાદ પણ ઓછા દબાણે પાણી આવવું અને દૂષિત પાણી મળવાની સમસ્યાઓ વચ્ચે વોર્ડ નંબર 4ના દાંડીવાડ વિસ્તારમાં સ્થિતિ વધુ ગંભીર બની છે. સ્થાનિકોના જણાવ્યા અનુસાર, અહીં 70થી વધુ ગરીબ અને શ્રમિક પરિવારો છેલ્લા છ મહિનાથી નળમાં પાણી ન આવવાની સમસ્યાનો સામનો કરી રહ્યા છે.

ત્રણ-ચાર ઘરના પાણી પર આખા વિસ્તારનો મદાર

દાંડીવાડના રહીશો મોહલ્લાના માત્ર ત્રણ-ચાર ઘરોમાં આવતું અડધાથી પોણો કલાકનું પાણી મેળવીને રોજિંદી જરૂરિયાતો પૂરી કરવા મજબૂર બન્યા છે. પીવાના પાણી માટે અગાઉથી જ ખર્ચ કરવો પડતો હતો, પરંતુ હવે ઘરવપરાશનું પાણી પણ ન મળતાં મુશ્કેલીઓ વધી છે. ખાસ કરીને શ્રમિક મહિલાઓને પાણી ભરવા માટે સમય ફાળવવો પડતાં તેમની રોજીરોટી પર પણ અસર થઈ રહી છે.

રજૂઆતો છતાં સમસ્યાનો ઉકેલ નહીં

સ્થાનિકોના જણાવ્યા મુજબ, વિસ્તારમાં ભાજપ અને કોંગ્રેસ બંને પક્ષના કોર્પોરેટરો હોવા છતાં પાણીની સમસ્યાનો ઉકેલ આવ્યો નથી. કોંગ્રેસનાં નગરસેવિકા પ્રભા વલસાડિયાએ મહિલાઓ સાથે બે વખત મહાનગરપાલિકા કમિશનર સમક્ષ રજૂઆત કરી હોવા છતાં સમસ્યા યથાવત હોવાનો આક્ષેપ કર્યો છે.

રહીશોનો આક્ષેપ છે કે વિપક્ષને મત આપ્યો હોવાથી તેમની સાથે અન્યાય થઈ રહ્યો છે. જોકે, આ આક્ષેપ અંગે તંત્રનો પક્ષ સામે આવવો જરૂરી છે. બીજી તરફ, સમારકામ માટે ખોદવામાં આવેલા ખાડાઓ અધૂરા છોડી દેવાતાં અકસ્માતનો ભય પણ ઊભો થયો હોવાની ફરિયાદ છે.

કમિશનરની ખાતરી, હવે ઉકેલની રાહ

સ્થાનિકોનો સવાલ છે કે રૂ. 1,200 કરોડનું બજેટ ધરાવતી મહાનગરપાલિકા રૂ. 2 લાખના ખર્ચે ઉકેલી શકાય તેવી નાની સમસ્યાનો પણ ઉકેલ કેમ લાવી શકતી નથી. ઓક્ટોબર મહિનાની શરૂઆત સાથે જ દાંડીવાડના રહીશો માટે પાણી વિના સાતમો મહિનો શરૂ થયો છે. આ મામલે મહાનગરપાલિકાના કમિશનરે જણાવ્યું હતું કે સમગ્ર શહેર માટેની પાણી પુરવઠા યોજનાનો ડીપીઆર તૈયાર કરીને સરકારની મંજૂરી માટે મોકલવામાં આવ્યો છે. દાંડીવાડની સ્થાનિક સમસ્યાના ઉકેલ માટે વોટર વર્ક્સ વિભાગના અધિકારીઓ સાથે બેઠક યોજીને વહેલી તકે યોગ્ય કાર્યવાહી કરવાની ખાતરી પણ તેમણે આપી છે. હવે સવાલ એ છે કે મહાનગરપાલિકા તાત્કાલિક ધોરણે પાણીની સમસ્યા દૂર કરીને 70થી વધુ પરિવારોને રાહત ક્યારે આપશે? નિયમિત વેરો ચૂકવતા નાગરિકોને પાણી જેવી પાયાની સુવિધા માટે હજુ કેટલો સમય રાહ જોવી પડશે?