નવસારીમાં ગણપતિ બાપા માટે 75 કિલોનું મહા-સમોસું, 10 કલાકની મહેનતથી તૈયાર થયું નજરાણું

Navsari 75 Kg Maha Samosa Ganesh Festival: ગણેશોત્સવ દરમિયાન ભક્તો દ્વારા બાપાને વિવિધ પ્રકારના અનોખા ભોગ ધરાવવામાં આવે છે, પરંતુ નવસારીમાં આ વર્ષે ગણેશભક્તિ સાથે કલાત્મકતાનો અનોખો સંગમ જોવા મળ્યો છે. શહેરમાં પ્રથમ વખત ગણપતિ બાપા માટે 75 કિલોગ્રામ વજનનું વિશાળ મહા-સમોસું તૈયાર કરવામાં આવ્યું છે. આ અનોખું નજરાણું હાલ નવસારીમાં આકર્ષણનું કેન્દ્ર બન્યું છે.

માવાના પૂરણથી તૈયાર કરાયું મહા-સમોસું

આ કોઈ સામાન્ય મસાલેદાર સમોસું નથી. ગણપતિ બાપાને અર્પણ કરવા માટે તૈયાર કરાયેલા આ વિશાળ સમોસામાં શુદ્ધ માવાનું મીઠું પૂરણ ભરવામાં આવ્યું છે. તેને વિશેષ પ્રસાદીરૂપે તૈયાર કરવામાં આવ્યું છે. આણંદ ભુવન ચા રાજા ગણેશ મંડળની સ્થાપનાના 75 વર્ષ પૂર્ણ થઈ રહ્યા છે. મંડળના અમૃત મહોત્સવની ઉજવણીના ભાગરૂપે 75 કિલોગ્રામ વજનનું સમોસું તૈયાર કરવાનો સંકલ્પ લેવામાં આવ્યો હતો.

10 કલાક સુધી કારીગરોની મહેનત

આટલા મોટા કદનું સમોસું તૈયાર કરવું કારીગરો માટે પડકારરૂપ હતું. જય યોગેશ્વર નાસ્તા સેન્ટરના લક્ષ્મીકાંત પાંડે અને સુરેશ પાંડે તેમજ તેમની ટીમે આ મહા-સમોસું તૈયાર કર્યું છે. સમોસું તૈયાર કરવાની સમગ્ર પ્રક્રિયામાં ટીમે આશરે 10 કલાક સુધી મહેનત કરી હતી. લોટ તૈયાર કરવાથી લઈને માવાનું પૂરણ ભરવા અને ત્યારબાદ તેને યોગ્ય રીતે તળવા સુધીની પ્રક્રિયા ચીવટપૂર્વક કરવામાં આવી હતી.

22 ડબ્બા તેલ અને ખાસ મોટી કડાઈનો ઉપયોગ

75 કિલોગ્રામના વિશાળ સમોસાને તળવા માટે ખાસ મોટી કડાઈની વ્યવસ્થા કરવામાં આવી હતી. તેને તળવા માટે 15 લિટરની ક્ષમતાવાળા કુલ 22 તેલના ડબ્બાનો ઉપયોગ કરવામાં આવ્યો હતો. યોગ્ય તાપમાન અને માપસરની આંચ પર લાંબી પ્રક્રિયા બાદ સમોસું સોનેરી રંગમાં તૈયાર થયું હતું. મહા-સમોસું તૈયાર થતાં કારીગરોમાં પણ આનંદ જોવા મળ્યો હતો.

ગણપતિ બાપાના ચરણોમાં અર્પણ કરાશે

10 કલાકની મહેનત બાદ તૈયાર થયેલું આ મહા-સમોસું આણંદ ભુવન ખાતે બિરાજમાન ‘આણંદ ભુવન ચા રાજા’ને ભક્તિભાવપૂર્વક અર્પણ કરવામાં આવશે. બાપાને ભોગ ધરાવ્યા બાદ આ મહાપ્રસાદ દર્શનાર્થે આવતા શ્રદ્ધાળુઓમાં વહેંચવામાં આવશે. દર વર્ષે ઓર્ડર મુજબ વિવિધ પ્રકારની વિશેષ વાનગીઓ તૈયાર કરતા પાંડે ભાઈઓ અને તેમની ટીમે આ વર્ષે 75 કિલોગ્રામનું મહા-સમોસું તૈયાર કરીને નવસારીના ગણેશોત્સવમાં અનોખી ભક્તિનું ઉદાહરણ રજૂ કર્યું છે.