Bharat Parv 2026: PM મોદીએ કર્યું એકતા નગરમાં ‘ભારત પર્વ 2026’નું ભવ્ય ઉદ્ઘાટન, 15 નવેમ્બર સુધી યોજાશે મહોત્સવ

Bharat Parv 2026: વડાપ્રધાન નરેન્દ્ર મોદીએ શુક્રવારે ગુજરાતના નર્મદા જિલ્લાના એકતા નગરમાં ‘ભારત પર્વ 2026’નું ઉદ્ઘાટન કર્યું. રાષ્ટ્રીય એકતા દિવસના કાર્યક્રમ અંતર્ગત આયોજિત આ સાંસ્કૃતિક મહોત્સવ 15 નવેમ્બર સુધી ચાલશે. આ મહોત્સવમાં દેશની વિવિધ સંસ્કૃતિઓ, લોકકલા, પરંપરાગત વાનગીઓ, હસ્તકલા અને પ્રવાસન સ્થળોની ભવ્ય ઝલક જોવા મળશે.

‘એક ભારત શ્રેષ્ઠ ભારત’ અને રાષ્ટ્રીય એકતાની ભાવનાને પ્રોત્સાહન આપવા માટે આ આયોજન કરવામાં આવ્યું છે. આ મહોત્સવ દ્વારા દેશનાં વિવિધ રાજ્યો અને કેન્દ્રશાસિત પ્રદેશોને પોતાની સાંસ્કૃતિક ઓળખ રજૂ કરવાની તક મળશે. આ સાથે જ એકતા નગર અને આસપાસના વિસ્તારોમાં પ્રવાસનને પણ વેગ મળવાની આશા છે.

1.5 કરોડ LED લાઈટ્સથી ઝળહળશે એકતા નગર

‘ભારત પર્વ 2026’નું મુખ્ય આકર્ષણ વેલી ઓફ ફ્લાવર્સ રોડ પર તૈયાર કરવામાં આવેલો 530 મીટર લાંબો રોશનીથી સજ્જ માર્ગ છે. ‘પ્રાચીન ભારતથી આધુનિક ભારત સુધી’ની થીમ પર તૈયાર કરવામાં આવેલા આ માર્ગ પર આકર્ષક લાઈટિંગ કરવામાં આવ્યું છે.

આ સિવાય 180 મીટર લાંબી ગ્લો ટનલ પણ બનાવવામાં આવી છે. તેમાં ભારતના ચારેય પ્રદેશોની સંસ્કૃતિ, સ્થાપત્ય, લોકનૃત્ય, હસ્તકલા અને જીવનશૈલીને રજૂ કરવામાં આવી છે. આ સમગ્ર આયોજનમાં 1.5 કરોડથી વધુ LED લાઈટ્સનો ઉપયોગ કરવામાં આવ્યો છે. દેશભરના કલાકારોએ વિવિધ કલાત્મક કૃતિઓ પણ તૈયાર કરી છે.

શૂલપાણેશ્વર નર્મદા ઘાટ પર PM મોદી કરશે આરતી

વડાપ્રધાન નરેન્દ્ર મોદી રાત્રે આશરે 8:15 વાગ્યે શૂલપાણેશ્વર નર્મદા ઘાટ પર નર્મદા આરતીમાં પણ ભાગ લેશે. સ્ટેચ્યૂ ઓફ યુનિટી વિસ્તાર વિકાસ અને પ્રવાસન નિયમન સત્તામંડળ દ્વારા 15.10 કરોડ રૂપિયાના ખર્ચે આ ઘાટનો વિકાસ કરવામાં આવ્યો છે.

ઘાટ પર એકસાથે શ્રદ્ધાળુઓ અને પ્રવાસીઓની ક્ષમતા 4,000થી વધારીને 6,000 કરવામાં આવી છે. આ સિવાય આશરે 2,000 લોકો માટે બેસવાની વ્યવસ્થા પણ કરવામાં આવી છે. અહીં વિસ્તૃત પગથિયાંવાળો ઘાટ, 190 મીટર લાંબો ઓલ-વેધર રસ્તો, એમ્ફિથિયેટર સ્ટાઈલની બેઠક વ્યવસ્થા, લાલ રેતીના પથ્થરની સજાવટ, ભીંતચિત્રો અને શિલ્પો તૈયાર કરવામાં આવ્યાં છે.

31 પ્રવાસન અને માળખાકીય પ્રોજેક્ટ્સનું લોકાર્પણ-ખાતમુહૂર્ત

31 ઓક્ટોબરે સરદાર વલ્લભભાઈ પટેલની 151મી જન્મજયંતી નિમિત્તે વડાપ્રધાન સ્ટેચ્યૂ ઓફ યુનિટી ખાતે પુષ્પાંજલિ અર્પણ કરશે. ત્યારબાદ કુલ 426.71 કરોડ રૂપિયાના ખર્ચે તૈયાર થનારા 31 પ્રવાસન અને માળખાકીય પ્રોજેક્ટ્સનું લોકાર્પણ તથા ખાતમુહૂર્ત કરશે. આ પૈકી 307.83 કરોડ રૂપિયાના ખર્ચે તૈયાર થયેલા 23 પ્રોજેક્ટ્સનું લોકાર્પણ કરવામાં આવશે, જ્યારે 118.88 કરોડ રૂપિયાના 8 પ્રોજેક્ટ્સનું ખાતમુહૂર્ત થશે.

મુખ્ય પ્રવાસન પ્રોજેક્ટ્સમાં 50 કરોડ રૂપિયાની IRCTC હોટેલ, 16 કરોડ રૂપિયાનો એકતા ક્રૂઝ, 14.30 કરોડ રૂપિયાનો રેન ફોરેસ્ટ પ્રોજેક્ટ અને 3.67 કરોડ રૂપિયાની ઈકો ટ્રેલનો સમાવેશ થાય છે. આ સિવાય સીવેજ ટ્રીટમેન્ટ પ્લાન્ટ, વોટર ટ્રીટમેન્ટ પ્લાન્ટ, ટ્રાવેલેટર, પરેડ ટ્રેક, કર્મચારીઓ માટે આવાસ અને રસ્તાઓના વિકાસ જેવા કામો પણ કરવામાં આવશે.

રાષ્ટ્રીય એકતા દિવસની ભવ્ય પરેડનું આયોજન

વડાપ્રધાન પોતાના પ્રવાસ દરમિયાન રેન ફોરેસ્ટ અને વામન વૃક્ષ વાટિકાની મુલાકાત પણ લેશે. ત્યારબાદ સાંજે આશરે 5:30 વાગ્યે રાષ્ટ્રીય એકતા દિવસના સમારોહમાં ભાગ લેશે. આ પ્રસંગે કેન્દ્રીય સશસ્ત્ર પોલીસ દળો, રાજ્ય પોલીસ દળો અને કેન્દ્રીય પોલીસ સંગઠનોની ભાગીદારીથી એકતા પરેડ યોજાશે. પરેડમાં નક્સલવાદ અને વામપંથી ઉગ્રવાદ સામે સુરક્ષા દળો દ્વારા કરવામાં આવેલા પ્રયાસો પણ રજૂ કરવામાં આવશે.

રાષ્ટ્રીય નાટ્ય વિદ્યાલય (NSD) દ્વારા ‘નક્સલ મુક્ત ભારત’ વિષય પર નાટ્ય પ્રસ્તુતિ કરવામાં આવશે. તેમાં વામપંથી ઉગ્રવાદથી પ્રભાવિત રહેલા 126 જિલ્લાઓના આશરે 2,000 કલાકારો ભાગ લેશે. આ વર્ષની ઝાંખીઓ અને સાંસ્કૃતિક કાર્યક્રમોની થીમ ‘વંદે માતરમ્’ રાખવામાં આવી છે. દેશભરના આશરે 5,000 કલાકારોની ભાગીદારીથી ભવ્ય સાંસ્કૃતિક કાર્યક્રમ પણ યોજાશે. આમ ‘ભારત પર્વ 2026’ દ્વારા એકતા નગરમાં દેશની સાંસ્કૃતિક વિવિધતા, રાષ્ટ્રીય એકતા અને પ્રવાસન વિકાસનો અનોખો સંગમ જોવા મળશે.

આ પણ વાંચો: Rajkot Unseasonal Rain: જેતપુરમાં ગાજવીજ અને ભારે પવન સાથે ધોધમાર વરસાદ, કપાસ-મગફળીના પાકને નુકસાનની ભીતિ