Mehsana News: પાટીદાર મહાસંમેલનમાં ગણપત પટેલનું વિવાદાસ્પદ નિવેદન, કહ્યું 'પાટીદારના છોકરા દારૂડિયા થઈ ગયા છે'

Mehsana News: મહેસાણામાં યોજાયેલા પાટીદાર મહાસંમેલનમાં ગણપત યુનિવર્સિટીના ચેરમેન ગણપત પટેલે આપેલા નિવેદનથી સમાજમાં ચર્ચા જાગી છે. મહાસંમેલનને સંબોધિત કરતી વખતે તેમણે પાટીદાર સમાજના યુવાનોમાં વધી રહેલા દારૂ અને ડ્રગ્સના વ્યસન અંગે ચિંતા વ્યક્ત કરી હતી. તેમના નિવેદનના કેટલાક શબ્દોને લઈને હવે ચર્ચાઓ શરૂ થઈ છે.

વ્યસનના દુષણ સામે ચિંતા વ્યક્ત કરી

ગણપત પટેલે સંબોધન દરમિયાન જણાવ્યું હતું કે, પાટીદાર સમાજના કેટલાક યુવાનો દારૂના વ્યસન તરફ વળી રહ્યા છે. તેમણે કહ્યું કે, "મને તો એક જ ચિંતા છે કે પેઢી બચાવો." સમાજની આવનારી પેઢીને બચાવવાની જરૂરિયાત પર ભાર મૂકતાં તેમણે યુવાનોમાં વધી રહેલા વ્યસનના દુષણ સામે ચિંતા વ્યક્ત કરી હતી. તેમણે વધુમાં જણાવ્યું હતું કે, સમાજના દીકરાઓ દારૂ અને ડ્રગ્સ જેવા નશાના વ્યસનમાં સપડાઈ રહ્યા છે, જે સમાજના ભવિષ્ય માટે ચિંતાજનક બાબત છે. માત્ર આર્થિક અને સામાજિક પ્રગતિ પૂરતી નથી, પરંતુ નવી પેઢીને યોગ્ય દિશામાં આગળ વધારવી પણ એટલી જ જરૂરી છે.

યુવાનોને વ્યસનથી દૂર રહેવા સમજાવો

ગણપત પટેલે સમાજના આગેવાનોને પણ અપીલ કરી હતી કે તેઓ માત્ર મોટા મંચ પરથી ભાષણો આપવાને બદલે સમાજના એક-એક વ્યક્તિ સુધી પહોંચે અને યુવાનોને વ્યસનથી દૂર રહેવા સમજાવે. દરેક પરિવાર અને સમાજના આગેવાને આ દિશામાં પોતાની જવાબદારી નિભાવવાની જરૂરિયાત તેમણે વ્યક્ત કરી હતી. તેમણે સ્વીકાર્યું હતું કે પાટીદાર સમાજ આર્થિક રીતે સધ્ધર અને પ્રગતિશીલ બન્યો છે, પરંતુ તેની સાથે કેટલાક સામાજિક દુષણો પણ પ્રવેશ્યા છે. ખાસ કરીને દારૂ અને ડ્રગ્સનું વધતું વ્યસન આવનારી પેઢી માટે જોખમરૂપ બની શકે છે. આમ, મહેસાણાના પાટીદાર મહાસંમેલનમાં ગણપત પટેલે સમાજની પ્રગતિની સાથે નવી પેઢીના ભવિષ્ય અને યુવાનોને વ્યસનમુક્ત બનાવવાનો મુદ્દો ઉઠાવી સામાજિક જવાબદારી નિભાવવાનો સંદેશ આપ્યો હતો.

આ પણ વાંચો: Ahmedabad Diwali Shopping: દિવાળીની ખરીદી માટે અમદાવાદના બજારોમાં ભીડ, મોંઘવારીથી વેપારીઓમાં નિરાશા