Kutchને અછતગ્રસ્ત જાહેર કરતાં ખેડૂતોમાં નારાજગી, ₹8,500ની સહાયને ગણાવી ‘લોલીપોપ’

Kutch: રાજ્ય સરકારે કચ્છને અછતગ્રસ્ત જાહેર કરી ખેડૂતો માટે હેક્ટર દીઠ ₹8,500ની સહાયની જાહેરાત કરી છે. જોકે, સરકારની આ જાહેરાત સામે કચ્છના ખેડૂતોમાં નારાજગી જોવા મળી રહી છે. ખેડૂતોના મતે, ખેતીના સતત વધી રહેલા ખર્ચની સરખામણીએ આ સહાય ખૂબ ઓછી છે. પરિણામે ખેડૂતો દ્વારા વધુ આર્થિક સહાય અને પાક ધિરાણના વ્યાજમાં માફીની માંગ કરવામાં આવી રહી છે.

મોડેથી અછતગ્રસ્ત જાહેર કરાતાં ખેડૂતોમાં રોષ

ચાલુ વર્ષે ઓછા વરસાદના કારણે કચ્છ સહિત ગુજરાતના અનેક વિસ્તારોમાં અછત જેવી સ્થિતિ સર્જાઈ હતી. આ પરિસ્થિતિને ધ્યાનમાં રાખીને રાજ્ય સરકારે કચ્છ સહિત ચાર જિલ્લાઓને અસરગ્રસ્ત જાહેર કર્યા છે. જોકે, ખેડૂતોનું કહેવું છે કે અછતની સ્થિતિમાં ખેતીના નુકસાનને પહોંચી વળવા માટે જાહેર કરાયેલી સહાય પૂરતી નથી.

ખેતીનો ખર્ચ વધ્યો, સહાય ઓછી હોવાનો આક્ષેપ

ખેડૂતોના જણાવ્યા અનુસાર, દવા, બિયારણ અને ખાતરના ભાવમાં સતત વધારો થઈ રહ્યો છે. ખેતી કરવા માટેનો ખર્ચ વધ્યો છે, જ્યારે ઓછા વરસાદના કારણે પાક પર પણ અસર પડી છે. આવી સ્થિતિમાં હેક્ટર દીઠ ₹8,500ની સહાયથી ખેડૂતોને મોટો આર્થિક ટેકો નહીં મળે તેવી નારાજગી વ્યક્ત કરવામાં આવી રહી છે.

પાક ધિરાણના વ્યાજમાં માફીની માંગ

કચ્છમાં ખેતીની સાથે પશુપાલન પણ મુખ્ય વ્યવસાય છે. ઓછા વરસાદની અસરને કારણે ખેડૂતોની સાથે પશુપાલકોની મુશ્કેલીઓ પણ વધી છે. ખેડૂતોની માંગ છે કે પાક ધિરાણના વ્યાજમાં માફી આપવામાં આવે. આ ઉપરાંત, જેમણે લોન લીધી નથી તેવા ખેડૂતોને પણ સીધી આર્થિક સહાય તેમના બેંક ખાતામાં જમા કરવામાં આવે.

સરકાર પાસે વધુ સહાયની અપેક્ષા

ખેડૂતોનું માનવું છે કે અછતની સ્થિતિમાં ખેતી અને પશુપાલન સાથે સંકળાયેલા પરિવારોને રાહત આપવા માટે વધુ અસરકારક સહાયની જરૂર છે. હવે ખેડૂતોની માંગણીઓ અંગે રાજ્ય સરકાર શું નિર્ણય લે છે અને સહાયમાં કોઈ ફેરફાર થાય છે કે નહીં તેના પર સૌની નજર છે.

આ પણ વાંચો : Surat News: સિંગણપોર-ડભોલી લિંક રોડ પર દબાણોનો આક્ષેપ, શિવાન એવન્યુના રહીશોમાં રોષ