Gandhidham News: પૂર્વ કચ્છમાં SOGની કાર્યવાહી, ગાંધીધામમાંથી 26 ગ્રામ MD ડ્રગ્સ સાથે એક આરોપી ઝડપાયો

Gandhidham News: પૂર્વ કચ્છમાં નશીલા પદાર્થોના ગેરકાયદે વેચાણ અને હેરાફેરી સામે પોલીસ દ્વારા કાર્યવાહી તેજ કરવામાં આવી છે. ‘NO DRUGS IN EAST KUTCH’ અભિયાન અંતર્ગત સ્પેશિયલ ઓપરેશન ગ્રુપ (SOG)એ ગાંધીધામમાંથી 26 ગ્રામ મેફેડ્રોન (MD) ડ્રગ્સ સાથે એક આરોપીની ધરપકડ કરી છે. આ કાર્યવાહી દરમિયાન MD ડ્રગ્સ, કાર, મોબાઈલ અને રોકડ સહિત કુલ રૂપિયા 5.88 લાખનો મુદ્દામાલ જપ્ત કરવામાં આવ્યો છે.

પોલીસે કિશનકુમાર બીજલારામ મકવાણાની ધરપકડ કરી

મળતી માહિતી મુજબ, પૂર્વ કચ્છ SOGની ટીમે બાતમીના આધારે ગાંધીધામ વિસ્તારમાં તપાસ હાથ ધરી હતી. આ દરમિયાન એક બલેનો કારમાંથી શંકાસ્પદ નશીલો પદાર્થ મળી આવ્યો હતો. તપાસ કરતાં તે મેફેડ્રોન (MD) ડ્રગ્સ હોવાનું સામે આવ્યું હતું. પોલીસે કારમાંથી કુલ 26 ગ્રામ MD ડ્રગ્સ જપ્ત કર્યું હતું, જેની કિંમત અંદાજે રૂપિયા 78,000 હોવાનું જણાવાયું છે. આ મામલે પોલીસે કિશનકુમાર બીજલારામ મકવાણાની ધરપકડ કરી છે. આરોપી પાસેથી MD ડ્રગ્સ ઉપરાંત મોબાઇલ ફોન, રોકડ રકમ અને બલેનો કાર પણ કબજે કરવામાં આવી છે. આમ, તમામ મુદ્દામાલની કુલ કિંમત રૂપિયા 5.88 લાખ આંકવામાં આવી છે.

નેટવર્ક અંગે વધુ વિગતો સામે આવે તેવી શક્યતા

પોલીસ દ્વારા નશીલા પદાર્થો સામે ચલાવવામાં આવી રહેલા ‘NO DRUGS IN EAST KUTCH’ અભિયાનના ભાગરૂપે આ કાર્યવાહી કરવામાં આવી હોવાનું જાણવા મળ્યું છે. જપ્ત કરાયેલા નશીલા પદાર્થનો જથ્થો ક્યાંથી લાવવામાં આવ્યો હતો અને તેની હેરાફેરીમાં અન્ય કોઈ વ્યક્તિ સંડોવાયેલી છે કે કેમ તે અંગે તપાસ હાથ ધરવામાં આવી છે. ધરપકડ કરાયેલા આરોપીને વધુ કાયદેસરની કાર્યવાહી માટે અંજાર પોલીસને સોંપવામાં આવ્યો છે. હવે પોલીસ તપાસમાં MD ડ્રગ્સના સ્ત્રોત અને તેના નેટવર્ક અંગે વધુ વિગતો સામે આવે તેવી શક્યતા છે. પૂર્વ કચ્છમાં નશાના કારોબારને અટકાવવા પોલીસની કામગીરી પર સૌની નજર છે.

આ પણ વાંચો: Navsari SMC Raid: નવસારીમાં SMCની મોટી કાર્યવાહી, 4,224 દારૂની બોટલ સહિત રૂપિયા 21.84 લાખનો મુદ્દામાલ જપ્ત