જામનગરમાં સ્વચ્છતા અને ટ્રાફિક વ્યવસ્થાને લઈને મનપા એક્શન મોડમાં, દબાણ સામે કાર્યવાહી

Jamnagar Municipal Corporation Action: જામનગર શહેરમાં સ્વચ્છતા અને ટ્રાફિક વ્યવસ્થાને વધુ સુદૃઢ બનાવવા માટે મહાનગરપાલિકા દ્વારા કાર્યવાહી તેજ કરવામાં આવી છે. રસ્તા પર કચરો ફેંકનાર તેમજ જાહેર માર્ગો પર દબાણ કરનાર સામે હવે મનપા દ્વારા કાર્યવાહી કરવામાં આવી રહી છે. મ્યુનિસિપલ કમિશનર દિપેશ કેડિયા સ્વચ્છતા અને જાહેર માર્ગોની વ્યવસ્થાને લઈને મેદાનમાં ઉતર્યા છે. ગઈકાલે રાત્રે કમિશનર દ્વારા જૂની જયશ્રી ટોકીઝ આસપાસના વિસ્તારમાં સરપ્રાઈઝ નિરીક્ષણ કરવામાં આવ્યું હતું.

પંચેશ્વર ટાવર આસપાસ દબાણ સામે કાર્યવાહી

કમિશનરના રાત્રિના નિરીક્ષણ બાદ આજે સવારથી જ મનપાની ટીમ દ્વારા કાર્યવાહી શરૂ કરવામાં આવી હતી. પંચેશ્વર ટાવર અને આસપાસના વિસ્તારોમાં જાહેર માર્ગો પરના વધારાના દબાણો સામે કાર્યવાહી હાથ ધરવામાં આવી. જાહેર રસ્તાઓ અને માર્ગો પર વાહનચાલકો તથા રાહદારીઓને અવરજવરમાં મુશ્કેલી ન પડે અને રસ્તાઓ ખુલ્લા રહે તે માટે મનપા દ્વારા દબાણ દૂર કરવાની કામગીરી કરવામાં આવી રહી છે.

રસ્તા પર કચરો ફેંકનાર પર પણ નજર

સ્વચ્છતા ઝુંબેશ અંતર્ગત રસ્તા પર કચરો ફેંકતા લોકો અને વેપારીઓ સામે પણ મનપાની નજર છે. શહેરમાં સ્વચ્છતા જળવાઈ રહે તે માટે વેપારીઓ અને શહેરીજનોને જાહેર સ્થળોએ કચરો ન ફેંકવા તેમજ મનપાની કચરા વ્યવસ્થાની સુવિધાનો ઉપયોગ કરવા સૂચના આપવામાં આવી રહી છે.

જાહેર માર્ગ પર દબાણ કરશો તો કાર્યવાહીનો સંદેશ

મનપાની કાર્યવાહીથી સ્પષ્ટ સંદેશ આપવામાં આવી રહ્યો છે કે જાહેર માર્ગો પર વધારાનું દબાણ કરવું અથવા રસ્તા પર કચરો ફેંકવો હવે સ્વીકારવામાં આવશે નહીં. કમિશનરના રાત્રિના નિરીક્ષણ બાદ બીજા જ દિવસે મનપાની ટીમ દ્વારા કાર્યવાહી શરૂ કરવામાં આવતા શહેરમાં સ્વચ્છતા અને ટ્રાફિક વ્યવસ્થાને લઈને તંત્રની કામગીરી વધુ સક્રિય બની છે.

સ્વચ્છ અને દબાણમુક્ત જામનગર માટે કવાયત

જામનગરને વધુ સ્વચ્છ અને વ્યવસ્થિત બનાવવા માટે મનપા દ્વારા સ્વચ્છતા અભિયાન સાથે જાહેર માર્ગો પરથી દબાણ દૂર કરવાની કામગીરી પર પણ ભાર મૂકવામાં આવી રહ્યો છે. આગામી દિવસોમાં પણ શહેરના વિવિધ વિસ્તારોમાં આવી કામગીરી ચાલુ રહેવાની શક્યતા છે.