Jamnagar News: મનપામાં રૂપિયા 34.70 કરોડના વિકાસકામો રજૂ, 27 એજન્ડા પર કરાઈ ચર્ચા

Jamnagar News: જામનગર મહાનગરપાલિકાની સ્ટેન્ડિંગ કમિટીની બેઠકમાં શહેરના વિકાસને લગતા મહત્વના મુદ્દાઓ પર ચર્ચા કરવામાં આવી હતી. સ્ટેન્ડિંગ કમિટીના ચેરમેનના અધ્યક્ષસ્થાને યોજાયેલી આ બેઠકમાં કુલ 27 એજન્ડા રજૂ કરવામાં આવ્યા હતા. જેમાં અંદાજે રૂપિયા 34.70 કરોડના વિવિધ વિકાસકામોનો સમાવેશ કરવામાં આવ્યો હતો. બેઠકમાં સફાઈ વ્યવસ્થાને વધુ સુદૃઢ બનાવવા, આરોગ્ય સુવિધાઓમાં વધારો કરવા, રસ્તાઓના વિકાસ તેમજ નાગમતી નદી પર નવા ફોરલેન રિવરબ્રિજના નિર્માણ સહિતના પ્રસ્તાવો રજૂ થયા હતા.

11.25 કરોડના કામને મંજૂરી આપવામાં આવી

બેઠકમાં કમિટીના કુલ 11 સભ્યો ઉપસ્થિત રહ્યા હતા. રજૂ થયેલા વિકાસકામોમાંથી રૂપિયા 21.15 કરોડના કામોને સૈદ્ધાંતિક સ્વીકૃતિ આપવામાં આવી હતી, જ્યારે રૂપિયા 11.25 કરોડના કામોને ખર્ચની મંજૂરી આપવામાં આવી હતી. આ નિર્ણયોથી શહેરના વિવિધ વિસ્તારોમાં માળખાકીય સુવિધાઓને નવી દિશા મળવાની શક્યતા છે. શહેરની સફાઈ વ્યવસ્થાને લઈને ઈસ્ટ, વેસ્ટ, સેન્ટ્રલ અને સાઉથ ઝોનમાં ગટર સફાઈ તથા અન્ય સફાઈ કામગીરી માટેના પ્રસ્તાવો રજૂ કરવામાં આવ્યા હતા. આ ઉપરાંત સફાઈ કામગીરીને વધુ અસરકારક બનાવવા માટે 1000 લિટરની જેટિંગ મશીન ખરીદવાની દરખાસ્ત પણ રજૂ થઈ હતી. આરોગ્ય ક્ષેત્રે નાગરિકોને વધુ સારી સુવિધાઓ મળી રહે તે માટે આરોગ્ય કેન્દ્રોમાં માઈક્રોસ્કોપ અને ઓક્સિજન કોન્સન્ટ્રેટર ખરીદવાના મુદ્દાઓનો સમાવેશ કરવામાં આવ્યો હતો.

બ્રિજના નિર્માણથી વાહનવ્યવહાર વધુ સુગમ બનવાની આશા

બીજી તરફ, મોરકંડા તરફ નાગમતી નદી પર આવેલા જૂના કોઝવેના સ્થાને ફોરલેન રિવરબ્રિજ બનાવવાનો મહત્વપૂર્ણ પ્રસ્તાવ ચર્ચામાં રહ્યો હતો. આ બ્રિજના નિર્માણથી વાહનવ્યવહાર વધુ સુગમ બનવાની આશા છે. સાથે જ શહેરમાં ખાનગી બસોના પાર્કિંગ માટે પ્લોટની વ્યવસ્થા કરવાના મુદ્દે પણ ચર્ચા કરવામાં આવી હતી. આમ, સ્ટેન્ડિંગ કમિટીની બેઠકમાં રજૂ થયેલા વિવિધ પ્રસ્તાવો શહેરના વિકાસ, સફાઈ, આરોગ્ય અને ટ્રાફિક વ્યવસ્થાને વધુ સુદૃઢ બનાવવાની દિશામાં મહત્વપૂર્ણ બની શકે છે.

આ પણ વાંચો: Junagadh News: લીલી પરિક્રમા રૂટનું તંત્ર દ્વારા નિરીક્ષણ, પાણીની વ્યવસ્થા માટે નવા બોર બનાવાશે