Sabarkantha News: સાબરડેરી અને જિલ્લા સહકારી બેન્કની ચૂંટણી મોકૂફ, સહકારી રાજકારણમાં આવ્યો ગરમાવો

Sabarkantha News: સાબરકાંઠા અને અરવલ્લી જિલ્લાના સહકારી ક્ષેત્રમાં મહત્ત્વ ધરાવતી બે સંસ્થાઓની ચૂંટણી છેલ્લી ઘડીએ મોકૂફ રાખવામાં આવતા રાજકીય વર્તુળોમાં ચર્ચાઓ તેજ બની છે. સાબરડેરી અને સાબરકાંઠા જિલ્લા મધ્યસ્થ સહકારી બેન્કના ચેરમેન તથા વાઈસ ચેરમેનની આવતીકાલે યોજાનારી ચૂંટણી મુલતવી રાખવાનો નિર્ણય લેવામાં આવ્યો છે. બંને સંસ્થાઓમાં આગામી અઢી વર્ષની ટર્મ માટે નવા હોદ્દેદારોની પસંદગી થવાની હતી. જોકે, ચૂંટણીની તૈયારીઓ પૂર્ણ થઈ ગયા બાદ ગણતરીના કલાકો પહેલાં જ ચૂંટણી મોકૂફ રાખવામાં આવતા સહકારી ક્ષેત્રમાં અનેક સવાલો ઊભા થયા છે.

રાજકીય વર્તુળોમાં અનેક તર્ક-વિતર્ક શરૂ થયા

મળતી માહિતી મુજબ, બંને સહકારી સંસ્થાઓમાં ચેરમેન અને વાઈસ ચેરમેનની પસંદગી માટે પ્રદેશ ભાજપ દ્વારા સેન્સ પ્રક્રિયા પણ પૂર્ણ કરી દેવામાં આવી હતી. આ પ્રક્રિયા દરમિયાન સંભવિત ઉમેદવારો અને હોદ્દેદારોની પસંદગીને લઈને ચર્ચા-વિચારણા કરવામાં આવી હતી. સેન્સ પ્રક્રિયા પૂર્ણ થયા બાદ હવે ચૂંટણી યોજાશે તેવી અપેક્ષા હતી. પરંતુ અચાનક ચૂંટણી મુલતવી રાખવાનો નિર્ણય સામે આવતા સહકારી રાજકારણમાં ગરમાવો જોવા મળી રહ્યો છે. ખાસ કરીને ચૂંટણીના ગણતરીના કલાકો પહેલાં લેવાયેલા આ નિર્ણયને લઈને રાજકીય વર્તુળોમાં અનેક તર્ક-વિતર્ક શરૂ થયા છે.

ક્યારે થશે નવી તારીખની જાહેરાત?

ચૂંટણી મોકૂફ રાખવા પાછળ ચોક્કસ કારણ શું છે, તે અંગે હાલ કોઈ સ્પષ્ટતા સામે આવી નથી. પરિણામે બંને સંસ્થાઓના નવા ચેરમેન અને વાઈસ ચેરમેન કોણ બનશે તેમજ પસંદગી પ્રક્રિયામાં આગળ શું ફેરફાર થશે તેને લઈને ચર્ચાઓ ચાલી રહી છે. બીજી તરફ, ચૂંટણી માટેની નવી તારીખ ક્યારે જાહેર કરવામાં આવશે તેના પર પણ સૌની નજર મંડાયેલી છે. હાલની સ્થિતિને જોતા દિવાળીના તહેવારો પૂર્ણ થયા બાદ બંને સહકારી સંસ્થાઓની ચૂંટણી યોજાય તેવી શક્યતા વ્યક્ત કરવામાં આવી રહી છે. જોકે, નવી તારીખ અંગે સત્તાવાર જાહેરાત થયા બાદ જ સમગ્ર ચિત્ર સ્પષ્ટ થશે. ત્યાં સુધી સાબરડેરી અને જિલ્લા મધ્યસ્થ સહકારી બેન્કની ચૂંટણીને લઈને સહકારી અને રાજકીય વર્તુળોમાં ઉત્સુકતા યથાવત્ રહેશે.

આ પણ વાંચો: Janjatiya Gaurav Diwas: ગુજરાતમાં 12થી 18 નવેમ્બર સુધી જનજાતિય ગૌરવ દિવસની ઉજવણી, 32,000થી વધુ લાભાર્થીઓને મળશે રૂપિયા 1,500 કરોડના લાભ