Jamnagar Illegal Mineral Transport: જામનગરમાં ખાણ-ખનીજ વિભાગની મોટી કાર્યવાહી, 5 ડમ્પર સહિત રૂ.1.80 કરોડનો મુદ્દામાલ જપ્ત

Jamnagar Illegal Mineral Transport: જિલ્લામાં ગેરકાયદે ખનિજ પરિવહન સામે ખાણ-ખનીજ વિભાગે બે દિવસમાં તાબડતોડ કાર્યવાહી હાથ ધરી છે. ઢીંચડા રોડ અને દરેડ GIDC વિસ્તારમાં કરવામાં આવેલી કાર્યવાહીમાં કુલ 5 ડમ્પર ઝડપી પાડવામાં આવ્યા છે. આ દરમિયાન આશરે રૂ.1.80 કરોડનો મુદ્દામાલ કબજે કરી પોલીસને સોંપવામાં આવ્યો છે.

ઢીંચડા રોડ પરથી 3 ડમ્પર ઝડપાયા

ખાણ-ખનીજ વિભાગની ટીમે ઢીંચડા રોડ પર આકસ્મિક તપાસ હાથ ધરી હતી. તપાસ દરમિયાન 3 ડમ્પરમાં બિનઅધિકૃત રીતે સિલિકા સેન્ડનું પરિવહન થતું હોવાનું સામે આવ્યું હતું. પરિણામે સિલિકા સેન્ડ ભરેલા 3 ડમ્પર સહિત આશરે રૂ.1.20 કરોડનો મુદ્દામાલ જપ્ત કરવામાં આવ્યો હતો. જપ્ત કરાયેલા ત્રણેય ડમ્પરને વધુ કાર્યવાહી માટે સિટી-સી પોલીસ સ્ટેશન ખાતે સોંપવામાં આવ્યા છે.

દરેડ GIDCમાં પણ કાર્યવાહી

આ ઉપરાંત દરેડ GIDC વિસ્તારમાં પણ ખાણ-ખનીજ વિભાગે તપાસ હાથ ધરી હતી. અહીં 2 ડમ્પરમાં બ્લેકટ્રેપનું ઓવરલોડ પરિવહન ઝડપાયું હતું. વિભાગે બંને ડમ્પર સહિત આશરે રૂ.60 લાખનો મુદ્દામાલ જપ્ત કર્યો હતો. બંને ડમ્પરને પંચ-બી પોલીસ સ્ટેશન ખાતે સોંપવામાં આવ્યા છે.

બે દિવસમાં 5 ડમ્પર જપ્ત

આમ, ખાણ-ખનીજ વિભાગે બે દિવસમાં કુલ 5 ડમ્પર જપ્ત કરી આશરે રૂ.1.80 કરોડનો મુદ્દામાલ કબજે કર્યો છે. સમગ્ર કાર્યવાહી ખાણ-ખનીજ વિભાગની ટીમ દ્વારા કરવામાં આવી હતી. તપાસ ટીમમાં નિખીલભાઈ, આનંદભાઈ અને રજનીકાંતભાઈ જોડાયા હતા.