Shravan Utsav Gujarat: પવિત્ર શ્રાવણ માસ દરમિયાન ગ્રામ્ય મહિલાઓને આર્થિક રીતે સશક્ત બનાવવા માટે ગુજરાત સરકાર દ્વારા વિશેષ પહેલ કરવામાં આવી છે. રાજ્યના 7 પ્રમુખ ધાર્મિક સ્થળોએ આગામી 26 ઓગસ્ટથી 7 સપ્ટેમ્બર, 2026 દરમિયાન ‘શ્રાવણ ઉત્સવ’ મેળાનું આયોજન કરવામાં આવ્યું છે. આ મેળામાં સખી મંડળોની બહેનો દ્વારા તૈયાર કરવામાં આવેલા વિવિધ સ્થાનિક ઉત્પાદનોનું વેચાણ કરવામાં આવશે. આ પહેલનો મુખ્ય ઉદ્દેશ્ય ગ્રામ્ય મહિલાઓને સીધા ગ્રાહકો સુધી પહોંચાડીને તેમની આવક અને આજીવિકામાં વધારો કરવાનો છે.

165 સખી મંડળની 300 બહેનોને મળશે તક

‘શ્રાવણ ઉત્સવ’ અંતર્ગત કુલ 165 સખી મંડળની અંદાજે 300 બહેનો ભાગ લેશે. તેમના ઉત્પાદનોના વેચાણ માટે કુલ 165 સ્ટોર તૈયાર કરવામાં આવ્યા છે. આ સ્ટોલ પર ખાદ્ય ઉત્પાદનો, હેન્ડીક્રાફ્ટ, હેન્ડલૂમ, પરંપરાગત વસ્ત્રો, પૂજન સામગ્રી તેમજ ઘર સજાવટની વિવિધ ચીજવસ્તુઓ ઉપલબ્ધ રહેશે. ગુજરાત લાઇવલીહૂડ પ્રમોશન કંપની લિમિટેડ (GLPC) દ્વારા રાષ્ટ્રીય ગ્રામીણ આજીવિકા મિશન (DAY-NRLM) હેઠળ સખી મંડળની બહેનોને વિનામૂલ્યે સ્ટોલ ફાળવવામાં આવશે. આ ઉપરાંત તેમના રહેવા અને જમવાની વ્યવસ્થા પણ કરવામાં આવશે.

7 ધાર્મિક સ્થળોએ યોજાશે ‘શ્રાવણ ઉત્સવ’

શ્રાવણ ઉત્સવના પ્રથમ તબક્કામાં 26થી 30 ઓગસ્ટ દરમિયાન ચાર સ્થળોએ સખી મંડળોના સ્ટોલ કાર્યરત રહેશે.

• ગીર સોમનાથનું સોમનાથ મહાદેવ મંદિર

• ભાવનગરનું જવાહર મેદાન

• રાજકોટનું ઘેલા સોમનાથ મહાદેવ મંદિર

• ભરૂચનું નીલકંઠધામ, પોઇચા

ત્યારબાદ જન્માષ્ટમી પર્વને ધ્યાનમાં રાખીને 2થી 7 સપ્ટેમ્બર દરમિયાન પોરબંદર અને રાજકોટના લોકમેળા તેમજ દેવભૂમિ દ્વારકા ખાતે પ્રદર્શન-સહ-વેચાણના સ્ટોલ યોજાશે.

લાખો શ્રદ્ધાળુઓ સુધી પહોંચશે સ્થાનિક ઉત્પાદનો

શ્રાવણ માસ દરમિયાન સોમનાથ, દ્વારકા સહિતના ધાર્મિક સ્થળોએ મોટી સંખ્યામાં શ્રદ્ધાળુઓ દર્શન માટે પહોંચે છે. આ મેળાઓના માધ્યમથી સખી મંડળની બહેનોને મોટી સંખ્યામાં ગ્રાહકો સુધી પોતાના ઉત્પાદનો પહોંચાડવાની તક મળશે. આ કારણે મહિલાઓને માત્ર વેચાણ માટેનું પ્લેટફોર્મ જ નહીં, પરંતુ પોતાના ઉત્પાદનોની ઓળખ અને બજાર વિસ્તારવાની તક પણ મળશે.

‘વોકલ ફોર લોકલ’ અને ‘લખપતિ દીદી’ અભિયાનને વેગ

રાજ્ય સરકારની આ પહેલથી ‘વોકલ ફોર લોકલ’ અને ‘લખપતિ દીદી’ જેવા અભિયાનોને પણ વેગ મળવાની આશા છે. સ્થાનિક મહિલાઓ દ્વારા તૈયાર કરવામાં આવતા ઉત્પાદનોને પ્રોત્સાહન મળવાથી ગ્રામ્ય સ્તરે રોજગારી અને સ્વરોજગારની તકોમાં વધારો થઈ શકે છે. સરકાર દ્વારા નાગરિકો અને શ્રદ્ધાળુઓને પણ અપીલ કરવામાં આવી છે કે તેઓ ‘શ્રાવણ ઉત્સવ’ની મુલાકાત લઈને સખી મંડળની બહેનો દ્વારા તૈયાર કરવામાં આવેલા સ્થાનિક, હસ્તકળા આધારિત અને ઘરગથ્થુ ઉત્પાદનોની ખરીદી કરે.

મહિલા આત્મનિર્ભરતા તરફ મહત્વપૂર્ણ પહેલ

‘શ્રાવણ ઉત્સવ’ ધાર્મિક પર્વને મહિલા સશક્તીકરણ અને સ્થાનિક ઉત્પાદનોના પ્રોત્સાહન સાથે જોડતી પહેલ બની શકે છે. સીધા ગ્રાહકો સુધી પહોંચવાથી સખી મંડળોની બહેનોને પોતાના ઉત્પાદનો માટે બજાર મળશે અને તેમની આવક વધારવામાં મદદ મળશે.