Vipra Global Business Foundation: અંકલેશ્વરમાં પ્રબુદ્ધ બ્રાહ્મણોનું વિશેષ સંમેલન યોજાયું હતું. સંમેલન દરમિયાન સમાજના લોકોને એક મંચ પર લાવી વ્યવસાય, નોકરી, લગ્ન સંબંધિત બાબતો સહિત વિવિધ ક્ષેત્રે સહયોગ વધારવાના હેતુથી વિપ્ર ગ્લોબલ બિઝનેસ ફાઉન્ડેશનની સ્થાપના કરવામાં આવી હતી.

બ્રાહ્મણ સમાજને એક મંચ પર લાવવાનો પ્રયાસ

સંમેલનમાં ભરૂચ જિલ્લા સહિત ગુજરાતના વિવિધ વિસ્તારોમાં વસતા ભૂદેવો ઉપસ્થિત રહ્યા હતા. સમાજના દરેક વર્ગને જોડીને પરસ્પર સહયોગ વધારવા તેમજ સામાજિક, આર્થિક અને વ્યાવસાયિક ક્ષેત્રે સમાજને વધુ મજબૂત બનાવવા અંગે ચર્ચા કરવામાં આવી હતી. ફાઉન્ડેશન દ્વારા વ્યવસાય કરતા લોકો, નોકરીયાત વર્ગ અને લગ્ન સંબંધિત બાબતોમાં સમાજના લોકોને જરૂરી સહયોગ અને માર્ગદર્શન મળી રહે તે દિશામાં કામગીરી કરવાનો અભિગમ રજૂ કરવામાં આવ્યો હતો.

શિક્ષણ અને રોજગાર ક્ષેત્રે સહયોગ પર ભાર

સંમેલનમાં સરકારી અને બિનસરકારી ક્ષેત્રે કાર્યરત લોકોને પડતી વિવિધ સમસ્યાઓમાં સમાજ તરફથી મદદરૂપ થવા અનુરોધ કરવામાં આવ્યો હતો. સાથે જ યુવાનોને શિક્ષણ અને રોજગાર ક્ષેત્રે વધુ તકો મળી રહે તે માટે પરસ્પર સહયોગનું માળખું ઊભું કરવાની જરૂરિયાત પર ભાર મૂકાયો હતો. સામાજિક અને આર્થિક રીતે નબળા પરિવારોને સહાય મળી રહે તે માટે પણ આગામી સમયમાં આયોજન કરવાની ચર્ચા કરવામાં આવી હતી.

નવી પેઢીને ભારતીય સંસ્કૃતિ સાથે જોડવાનો પ્રયાસ

સંમેલનમાં બ્રાહ્મણ સમાજના સાંસ્કૃતિક વારસાને જાળવી રાખવા અને નવી પેઢીને ભારતીય પરંપરા તથા સંસ્કૃતિ અંગે જ્ઞાન મળે તે માટે વિવિધ પ્રવૃત્તિઓ હાથ ધરવા અંગે પણ ચર્ચા થઈ હતી. સમાજની એકતા અને સંગઠનને મજબૂત બનાવવા માટે વિવિધ ક્ષેત્રમાં કાર્યરત અગ્રણીઓના સૂચનો પણ લેવામાં આવ્યા હતા.

ભરૂચના 16 હજાર પરિવારોની ડિજિટલ ડેટા બેંક બનશે

આ પ્રસંગે ભરૂચ જિલ્લાના આશરે 16,000 બ્રાહ્મણ પરિવારોની ડિજિટલ ડેટા બેંક તૈયાર કરવાનો મહત્વપૂર્ણ નિર્ણય જાહેર કરવામાં આવ્યો હતો. આ ડેટા બેંકના માધ્યમથી સમાજના પરિવારો અને વિવિધ ક્ષેત્રે કાર્યરત વ્યક્તિઓને એકબીજા સાથે જોડવામાં સરળતા રહેશે. આ ઉપરાંત આગામી દિવસોમાં ભરૂચ જિલ્લામાં એક વિશાળ મહાસંમેલન યોજવાની પણ જાહેરાત કરવામાં આવી હતી.

વિવિધ ક્ષેત્રના અગ્રણીઓની ઉપસ્થિતિ

વિપ્ર ગ્લોબલ બિઝનેસ ફાઉન્ડેશનના સંમેલનમાં સામાજિક, શૈક્ષણિક, ઉદ્યોગ અને અન્ય વિવિધ ક્ષેત્રોમાં કાર્યરત તથા ઉચ્ચ હોદ્દા ધરાવતા અગ્રણીઓ ઉપસ્થિત રહ્યા હતા. ઉપસ્થિત મહાનુભાવોએ સમાજના વિકાસ અને સંગઠનને વધુ મજબૂત બનાવવા માટે હકારાત્મક સૂચનો આપ્યા હતા. સંમેલનનો મુખ્ય ઉદ્દેશ્ય સમાજના લોકોને એકબીજા સાથે જોડીને સામાજિક સહયોગ, આર્થિક સશક્તીકરણ અને નવી પેઢીના વિકાસ માટે મજબૂત વ્યવસ્થા ઊભી કરવાનો રહ્યો હતો.