Gujaratમાં UCC કાયદાને રાષ્ટ્રપતિની મંજૂરી, ગેઝેટ પ્રસિદ્ધ; આદિવાસી સમુદાયને અપાઈ મુક્તિ

Gujarat Uniform Civil Code 2026: ગુજરાતમાં સમાન નાગરિક સંહિતા (UCC) વિધેયકને રાષ્ટ્રપતિ દ્રૌપદી મુર્મુની મંજૂરી મળી ગઈ છે. મંજૂરી બાદ કાયદો ગેઝેટમાં પ્રસિદ્ધ કરવામાં આવ્યો છે. ગુજરાત વિધાનસભાએ માર્ચ 2026માં આ વિધેયક પસાર કર્યું હતું. આ કાયદામાં લગ્ન, છૂટાછેડા, ઉત્તરાધિકાર અને લિવ-ઇન સંબંધો સહિતના વિષયો અંગે જોગવાઈઓ કરવામાં આવી છે. કાયદાની જોગવાઈઓ રાજ્ય સરકાર દ્વારા ગેઝેટમાં જાહેર કરવામાં આવનારી અમલવારીની તારીખથી લાગુ પડશે.

આદિવાસી સમુદાયને કાયદામાંથી મુક્તિ

કાયદા મુજબ, બંધારણ હેઠળના અનુસૂચિત જનજાતિના સભ્યો તેમજ બંધારણના ભાગ 21 હેઠળ રક્ષિત પરંપરાગત અધિકારો ધરાવતા કેટલાક સમુદાયો પર આ સંહિતા લાગુ નહીં પડે.

મિલકત અને વારસામાં સમાન અધિકાર

કાયદામાં મિલકત અને ઉત્તરાધિકારને લગતી જોગવાઈઓનો સમાવેશ કરવામાં આવ્યો છે. તેમાં પુત્ર અને પુત્રીના વારસાગત અધિકારોમાં સમાનતા લાવવાની જોગવાઈ છે. સંપત્તિ અને ઉત્તરાધિકાર સંબંધિત બાબતોમાં મહિલાઓના અધિકારોને પણ કાયદાકીય માળખું આપવામાં આવ્યું છે.

લગ્ન અને છૂટાછેડા માટે સમાન કાયદાકીય માળખું

UCCમાં લગ્નની શરતો, લગ્નની નોંધણી અને છૂટાછેડા સંબંધિત જોગવાઈઓનો સમાવેશ કરવામાં આવ્યો છે. આ ઉપરાંત લિવ-ઇન સંબંધોની નોંધણી અને સંબંધિત પ્રક્રિયાઓ અંગે પણ નિયમો નક્કી કરવામાં આવ્યા છે. કાયદાનો અમલ શરૂ થવાની તારીખ અને સંબંધિત નિયમો અંગે રાજ્ય સરકારની સત્તાવાર સૂચનાઓ મહત્વપૂર્ણ રહેશે.