સપ્ટેમ્બર રાજ્ય સ્વાગતમાં 5,057થી વધુ અરજીઓ પર કાર્યવાહી, CM ભૂપેન્દ્ર પટેલે નાગરિકોની રજૂઆતો સાંભળી

Gujarat State Swagat CM Bhupendra Patel: મુખ્યમંત્રી શ્રી ભૂપેન્દ્ર પટેલના અધ્યક્ષસ્થાને સપ્ટેમ્બર-2026નું રાજ્ય સ્વાગત કાર્યક્રમ યોજાયો હતો. રાજ્ય સ્વાગતમાં ભાવનગર, મહેસાણા, જુનાગઢ, મોરબી અને રાજકોટ સહિતના વિસ્તારોમાંથી આવેલા નાગરિકોની રજૂઆતો મુખ્યમંત્રીએ સાંભળી હતી. રજૂઆતોના ત્વરિત નિવારણ માટે સંબંધિત વિભાગો અને જિલ્લા વહીવટી તંત્રને જરૂરી સૂચનાઓ આપવામાં આવી હતી.

દર મહિનાના ચોથા ગુરુવારે યોજાતા રાજ્ય સ્વાગતની સપ્ટેમ્બર મહિનાની કડીમાં 200થી વધુ અરજદારો મુખ્યમંત્રી કાર્યાલયમાં ઉપસ્થિત રહ્યા હતા. જ્યારે સમગ્ર રાજ્યમાં જિલ્લા સ્વાગત હેઠળ કુલ 2,277 અને તાલુકા સ્વાગત હેઠળ 2,780 અરજીઓ પર જરૂરી કાર્યવાહી હાથ ધરવામાં આવી હતી. આમ, કુલ 5,057થી વધુ અરજદારોની રજૂઆતો પર કાર્યવાહી કરવામાં આવી હતી.

ભાવનગરના થળસરમાં ભૂગર્ભ ગટરનો પ્રશ્ન

ભાવનગર જિલ્લાના ભાવનગર તાલુકાના થળસર ગામે ભૂગર્ભ ગટર લાઈનના પ્રશ્ન અંગે રજૂઆત કરવામાં આવી હતી. મુખ્યમંત્રીએ હાલ વૈકલ્પિક વ્યવસ્થા કરવા તેમજ સ્થળ ચકાસણી બાદ ફિઝિબિલિટી મુજબ ગટરલાઈન નાખવા સ્થાનિક વહીવટી તંત્રને સૂચના આપી હતી.

કડીમાં પ્રદૂષિત પાણીના નિકાલ અંગે કડક સૂચના

મહેસાણા જિલ્લાના કડી તાલુકામાં ઔદ્યોગિક એકમો દ્વારા પ્રદૂષિત પાણીના નિકાલ અંગે રજૂઆત થઈ હતી. મુખ્યમંત્રીએ આ બાબતની ગંભીર નોંધ લઈને વન અને પર્યાવરણ વિભાગના અગ્ર સચિવને આવા ઔદ્યોગિક એકમો સામે જરૂરી કડક કાર્યવાહી કરવા સૂચના આપી હતી.

દિવાળી પહેલાં રસ્તાનું કામ પૂર્ણ કરવા તાકીદ

જુનાગઢ જિલ્લાના માંગરોળ તાલુકામાં લાબરકુવા-મેણેજ ગામના રસ્તાનું કામ સ્થાનિક વિરોધના કારણે લાંબા સમયથી પડતર હોવાની રજૂઆત થઈ હતી. મુખ્યમંત્રીએ જિલ્લા કલેક્ટરને દિવાળી પહેલાં રસ્તાની કામગીરી પૂર્ણ થાય તે સુનિશ્ચિત કરવા તાકીદ કરી હતી.

રાજકોટમાં ટ્રાફિકને અડચણરૂપ ભંગારના ધંધા અંગે કાર્યવાહી

રાજકોટ મહાનગરપાલિકા વિસ્તારમાં ભંગારનો ધંધો કરતા વ્યક્તિ દ્વારા ટ્રાફિકને અડચણરૂપ પ્રવૃત્તિ થતી હોવાની રજૂઆત કરવામાં આવી હતી. મુખ્યમંત્રીએ મ્યુનિસિપલ કમિશનરને સત્વરે કાર્યવાહી કરવા સૂચના આપી હતી. જરૂર જણાય તો જગ્યા સીલ કરવાની કાર્યવાહી કરવા તેમજ એક અઠવાડિયામાં રજૂઆતનો નિકાલ કરવા પણ નિર્દેશ આપવામાં આવ્યા હતા.

મોરબીમાં 20 દિવસમાં 900 મીટર પાઇપલાઇન નાખવા સૂચના

મોરબી મહાનગરપાલિકા વિસ્તારમાં ખેડૂતના ખેતરમાં STPનું ગંદુ પાણી આવતું હોવાની રજૂઆત સામે મુખ્યમંત્રી ભૂપેન્દ્ર પટેલે મ્યુનિસિપલ કમિશનરને 20 દિવસમાં 900 મીટર પાઇપલાઇન નાખીને સમસ્યાનું નિરાકરણ લાવવા સૂચના આપી હતી.

બેચરાજી વિસ્તારમાં ત્રણ વર્ષથી અટકેલી બાંધકામ પરમિશન

બેચરાજી એરિયા ડેવલપમેન્ટ ઓથોરિટી હેઠળ ઉદ્યોગને છેલ્લા ત્રણ વર્ષથી બાંધકામ પરમિશન ન મળતી હોવાની રજૂઆત પણ રાજ્ય સ્વાગતમાં કરવામાં આવી હતી. મુખ્યમંત્રીએ શહેરી વિકાસ વિભાગના અગ્ર સચિવ અને ચીફ ટાઉન પ્લાનરને જરૂરી કાર્યવાહી કરીને એક મહિનામાં આ પ્રશ્નનું નિરાકરણ લાવવા સૂચના આપી હતી.

ખેડૂતો અને સામાન્ય નાગરિકોની વિવિધ રજૂઆતોનો ઉકેલ

સપ્ટેમ્બર-2026ના રાજ્ય સ્વાગતમાં ખેડૂતોના ખેતરોમાં વરસાદી પાણીના નિકાલ, સાફ-સફાઈ, દબાણો અને શહેરી વિકાસ સત્તા મંડળને લગતી વિવિધ રજૂઆતો પણ કરવામાં આવી હતી. મુખ્યમંત્રીએ સંબંધિત અધિકારીઓને જરૂરી સૂચનાઓ આપી નાગરિકોની રજૂઆતોના હકારાત્મક અને સમયબદ્ધ નિરાકરણ માટે કાર્યવાહી હાથ ધરાવી હતી.

ટેક્નોલોજીના માધ્યમથી જન ફરિયાદ નિવારણ

‘સ્વાગત’ એટલે કે State Wide Attention on Grievances Through Application of Technology વ્યવસ્થા સામાન્ય નાગરિકોની ફરિયાદો અને રજૂઆતોના નિવારણ માટેનું માધ્યમ બની છે. રાજ્ય સરકારના જણાવ્યા મુજબ, વડાપ્રધાન નરેન્દ્ર મોદીના ગુજરાતના મુખ્યમંત્રી તરીકેના કાર્યકાળ દરમિયાન શરૂ થયેલી આ વ્યવસ્થાના માધ્યમથી નાગરિકોની રજૂઆતોના નિરાકરણ માટે ટેક્નોલોજી આધારિત અભિગમ અપનાવવામાં આવ્યો છે.

હાલ ચાલી રહેલા સેવા સંકલ્પ અભિયાન અંતર્ગત સપ્ટેમ્બર-2026ના રાજ્ય સ્વાગતમાં આવેલી રજૂઆતોના ત્વરિત નિવારણને પણ મહત્વ આપવામાં આવ્યું છે. આ પ્રસંગે મુખ્યમંત્રીના અગ્ર સચિવ સંજીવ કુમાર, અધિક અગ્ર સચિવ ડૉ. વિક્રાંત પાંડે, ખાસ ફરજ પરના અધિકારી ધીરજ પારેખ, રાકેશ વ્યાસ સહિત સંબંધિત વિભાગોના વરિષ્ઠ સચિવો ઉપસ્થિત રહ્યા હતા.