Gandhinagarમાં કોંગ્રેસના ચૂંટણી ઢંઢેરા પર ભાજપનો પ્રહાર, અનિલ પટેલે કર્યા આકરા પ્રહારો

Gandhinagar Congress Manifesto BJP Reaction: ગાંધીનગરના કમલમ ખાતે ભાજપના પ્રવક્તા અનિલ પટેલે કોંગ્રેસના ચૂંટણી ઢંઢેરા અંગે પ્રતિક્રિયા આપતાં અનેક મુદ્દે સવાલો ઉઠાવ્યા હતા. તેમણે આક્ષેપ કર્યો હતો કે કોંગ્રેસના ઢંઢેરામાં એવી બાબતોનો સમાવેશ કરવામાં આવ્યો છે, જે મહાનગરપાલિકાના અધિકારક્ષેત્રમાં આવતી નથી. તેમણે કોંગ્રેસના વચનોને જનતાને ગેરમાર્ગે દોરનારા ગણાવ્યા હતા.

10 હજાર નોકરીઓના વચન અંગે ભાજપે ઉઠાવ્યા સવાલ

અનિલ પટેલે કોંગ્રેસના ઢંઢેરામાં 10 હજાર નોકરીઓ આપવાના વચન અંગે સવાલ ઉઠાવ્યા હતા. તેમણે કહ્યું હતું કે મહાનગરપાલિકા કયા અધિકાર હેઠળ આટલી નોકરીઓ આપવાની વાત કરે છે, તે સ્પષ્ટ થવું જોઈએ. મહિલાઓ અને યુવા પેઢી માટે કરવામાં આવેલી જાહેરાતો અંગે પણ તેમણે ટીકા કરી હતી.

કોંગ્રેસના શાસનકાળ અને હાલના વિકાસની કરી સરખામણી

ભાજપના પ્રવક્તાએ 2011થી 2015 દરમિયાન ગાંધીનગરમાં કોંગ્રેસના શાસનનો ઉલ્લેખ કરીને તે સમયગાળામાં શહેરમાં ધૂળ અને અસુવિધાઓની સ્થિતિ હોવાનો આક્ષેપ કર્યો હતો. તેમણે કહ્યું કે 2015માં ભાજપની બોડી બન્યા બાદ શહેરમાં વિકાસનાં અનેક કામો થયાં છે. સફાઈ માટે મળેલા એવોર્ડનો ઉલ્લેખ કરીને તેમણે શહેરમાં થયેલી કામગીરીનો પણ દાવો કર્યો હતો.

આરોગ્ય અને શિક્ષણની સુવિધાઓનો કર્યો ઉલ્લેખ

અનિલ પટેલે આરોગ્ય સેવાઓ, ઘરે-ઘરે સારવાર, બ્લડ ટેસ્ટ, બાળકોને આર્થિક સહાય અને ટેક્નોલોજી આધારિત શિક્ષણ જેવી સુવિધાઓ અંગે વાત કરી હતી. તેમના જણાવ્યા અનુસાર, ગાંધીનગરની 72થી વધુ શાળાઓમાં આધુનિક ટેક્નોલોજીથી અભ્યાસની સુવિધા છે. યુવાનો માટે યોગ અને ફિટનેસની વ્યવસ્થા, લાઇબ્રેરી, તળાવો તથા બાગ-બગીચાઓનો પણ તેમણે ઉલ્લેખ કર્યો હતો.

ચૂંટણી ઢંઢેરાને લઈને રાજકીય આક્ષેપ-પ્રતિઆક્ષેપ

ભાજપના પ્રવક્તાએ કોંગ્રેસના ચૂંટણી ઢંઢેરાને હાસ્યાસ્પદ ગણાવી તેની ટીકા કરી હતી. તેમણે દાવો કર્યો હતો કે ગાંધીનગરમાં ભાજપના શાસન દરમિયાન થયેલો વિકાસ કોંગ્રેસને દેખાતો નથી. સ્થાનિક સ્વરાજ્યની ચૂંટણીને ધ્યાનમાં રાખીને બંને પક્ષો વચ્ચે ચૂંટણી વચનો અને શહેરના વિકાસના મુદ્દે રાજકીય ચર્ચા વધુ તેજ બનવાની શક્યતા છે.