Dang: આહવામાં રખડતા ઢોરોના કાયમી નિકાલ માટે કાર્યવાહી, હરાજી મોકૂફ

Ahwa Stray Cattle Issue: ડાંગ જિલ્લાના આહવા ખાતે રખડતા ઢોરોને કારણે સર્જાતી મુશ્કેલીના કાયમી ઉકેલ માટે મહત્વપૂર્ણ કાર્યવાહી કરવામાં આવી છે. ગ્રામ પંચાયત દ્વારા રખડતા ઢોરોની હરાજી કરવાની જાહેરાત કરવામાં આવી હતી, પરંતુ જીવદયા પ્રેમીઓની રજૂઆત બાદ હરાજી મોકૂફ રાખવામાં આવી છે.

જીવદયા પ્રેમીઓની રજૂઆત બાદ નિર્ણય

આહવામાં રખડતા ઢોરોની સમસ્યાને લઈને જીવદયા પ્રેમીઓ દ્વારા જિલ્લા કલેક્ટરને રજૂઆત કરવામાં આવી હતી. રજૂઆત બાદ રખડતા ઢોરોને વિવિધ પાંજરાપોળમાં મોકલવાની વ્યવસ્થા કરવામાં આવશે. આ નિર્ણયથી ઢોરોની હરાજી કરવાના બદલે તેમને પાંજરાપોળમાં મોકલીને સાચવવાની દિશામાં કાર્યવાહી હાથ ધરવામાં આવી છે.

250 જેટલા ઢોરો પકડાયા હતા

ગ્રામ પંચાયત દ્વારા ગામમાં રખડતા આશરે 250 જેટલા ઢોરોને પકડીને રાખવામાં આવ્યા હતા. ઢોરોની હરાજીની જાહેરાત કરવામાં આવ્યા બાદ મોટા ભાગના ઢોર માલિકો પોતાના ઢોરને પરત લઈ ગયા હતા. જોકે, કેટલાક ઢોરોને તેમના માલિકો લેવા માટે ન આવતા તેમના કાયમી નિકાલ માટે વૈકલ્પિક વ્યવસ્થા અંગે વિચારણા કરવામાં આવી હતી.

રોજ હજારો રૂપિયાનો ખર્ચ થતો હોવાનો દાવો

આહવા સરપંચના જણાવ્યા મુજબ, પકડાયેલા રખડતા ઢોરોને સાચવવા માટે ગ્રામ પંચાયત દ્વારા દરરોજ હજારો રૂપિયાનો ખર્ચ કરવામાં આવી રહ્યો હતો. ઢોર માલિકોને તેમના ઢોર પરત લઈ જવા માટે અવારનવાર સંદેશા આપવા છતાં કેટલાક માલિકો ઢોર લેવા આવતા ન હોવાનો પણ સરપંચ દ્વારા દાવો કરવામાં આવ્યો છે.

સુરત, નવસારી અને વલસાડથી જીવદયા પ્રેમીઓ પહોંચ્યા

હરાજી મોકૂફ રાખ્યા બાદ બાકીના ઢોરોને પાંજરાપોળમાં લઈ જવા માટે સુરત, નવસારી અને વલસાડના જીવદયા પ્રેમીઓ આહવા પહોંચ્યા હતા. હવે બાકી રહેલા રખડતા ઢોરોને વિવિધ પાંજરાપોળમાં મોકલીને તેમની સંભાળ રાખવાની દિશામાં કામગીરી કરવામાં આવશે.