ગોધરાના રામસાગર તળાવમાં ગણેશ વિસર્જન દરમિયાન અકસ્માત ટળ્યો, ક્રેન પરથી મૂર્તિ નીચે પટકાઈ

Godhra Ganesh Visarjan Crane Accident: ગોધરાના રામસાગર તળાવમાં ગણેશ વિસર્જન દરમિયાન મોડી રાત્રે અચાનક અકસ્માત સર્જાતાં અફરાતફરીનો માહોલ જોવા મળ્યો હતો. મોટી ગણેશ મૂર્તિના વિસર્જન માટે ક્રેનનો ઉપયોગ કરવામાં આવી રહ્યો હતો. આ દરમિયાન ક્રેનનો ખૂણો યોગ્ય ન રહેતા ગણેશ મૂર્તિ સીધી નીચે પડી ગઈ હતી.

ક્રેનનો ખૂણો ખોટો પડ્યો અને મૂર્તિ નીચે પટકાઈ

મોડી રાત્રે રામસાગર તળાવ ખાતે મોટી ગણેશ મૂર્તિના વિસર્જનની કામગીરી ચાલી રહી હતી. ક્રેનની મદદથી મૂર્તિને ઉપાડીને તળાવ તરફ લઈ જવામાં આવી રહી હતી. તે સમયે ક્રેનનો ખૂણો ખોટો પડતાં મૂર્તિ અચાનક નીચે પટકાઈ હતી. ઘટનાને પગલે સ્થળ પર હાજર લોકોમાં થોડા સમય માટે અફરાતફરીનો માહોલ સર્જાયો હતો. જોકે, સદનસીબે આ ઘટનામાં કોઈ વ્યક્તિને ઈજા થઈ નહોતી.

પોલીસ અને ફાયર બ્રિગેડે સંભાળ્યો મોરચો

ઘટનાની જાણ થતાં પોલીસ અને ફાયર બ્રિગેડની ટીમે સ્થળ પર પહોંચી સ્થિતિને કાબૂમાં લીધી હતી. જરૂરી કામગીરી બાદ ગણેશ મૂર્તિનું વિસર્જન શાંતિપૂર્ણ રીતે પૂર્ણ કરવામાં આવ્યું હતું.

મોડી રાત્રે 1:30 વાગ્યા સુધી વિસર્જન

રામસાગર તળાવ ખાતે ગણેશ વિસર્જનની પ્રક્રિયા મોડી રાત્રે 1:30 વાગ્યા સુધી ચાલી હતી. શાંતિ અને ભાઈચારાના વાતાવરણમાં કુલ 85 ગણેશ મૂર્તિઓનું વિસર્જન કરવામાં આવ્યું હતું. આ ઘટનામાં કોઈ જાનહાનિ કે ઈજા ન થતાં તંત્ર અને આયોજકોએ રાહતનો શ્વાસ લીધો હતો.