Ankleshwar: પાનોલી GIDCની સલ્ફર મિલમાંથી ધુમાડાના ગોટેગોટા, સ્ક્રબરનું ઢાંકણું ખુલતાં મટિરિયલ બહાર ફેંકાયું

Panoli GIDC Sulphur Mill Smoke: અંકલેશ્વરની પાનોલી GIDCમાં આવેલી સલ્ફર મિલ લિમિટેડ કંપનીમાં અચાનક પ્લાન્ટમાંથી ધુમાડાના ગોટેગોટા નીકળતાં આસપાસના વિસ્તારમાં ભયનો માહોલ સર્જાયો હતો. આકાશમાં કાળા ધુમાડાના ગોટેગોટા જોવા મળતાં નજીકના લોકોમાં મોટી આગ લાગી હોવાની આશંકા સર્જાઈ હતી. મળતી માહિતી મુજબ, કંપનીના પ્લાન્ટમાં પ્રોસેસ દરમિયાન અચાનક ટેકનિકલ ખામી સર્જાઈ હતી. આ દરમિયાન સ્ક્રબરનું ઢાંકણું ખુલતાં અંદરનું મટિરિયલ બહાર ફેંકાયું હતું, જેના કારણે મોટા પ્રમાણમાં ધુમાડો નીકળ્યો હતો.

કંપનીની ફાયર ટીમે પરિસ્થિતિ સંભાળી

ઘટનાની જાણ થતાં કંપનીની સ્થાનિક ફાયર ટીમ તાત્કાલિક સ્થળ પર પહોંચી હતી અને પરિસ્થિતિને કાબૂમાં લીધી હતી. રાહતની વાત એ છે કે આ ઘટનામાં કોઈ જાનહાનિ થઈ ન હોવાનું સામે આવ્યું છે. જોકે, ઘટનાને પગલે કંપનીની આસપાસના વિસ્તારમાં ચિંતા જોવા મળી હતી. ખાસ કરીને નજીકમાં આવેલા સંજાલી ગામના ગ્રામજનોમાં કંપનીમાં વારંવાર બનતી આવી ઘટનાઓને લઈને રોષ જોવા મળી રહ્યો છે.

કામદારો અને સ્થાનિકોની સુરક્ષા સામે સવાલ

સ્થાનિકોના જણાવ્યા મુજબ, પ્લાન્ટમાં વારંવાર આવી ઘટનાઓ બનતી હોવાના કારણે કામદારોની સાથે આસપાસના રહેવાસીઓની સુરક્ષા અંગે પણ સવાલો ઊભા થઈ રહ્યા છે. કંપનીની સુરક્ષા વ્યવસ્થા અને કથિત બેદરકારી અંગે પણ પ્રશ્નો ઉઠાવવામાં આવ્યા છે. આ ઘટનાને લઈને પર્યાવરણ પ્રેમીઓ દ્વારા પણ વિરોધ વ્યક્ત કરવામાં આવ્યો હોવાનું જાણવા મળે છે.

DISH વિભાગે તપાસ હાથ ધરી

ઘટનાની ગંભીરતાને ધ્યાનમાં રાખીને ઈન્ડસ્ટ્રીયલ સેફ્ટી એન્ડ હેલ્થ (DISH) વિભાગ દ્વારા સ્થળ તપાસ હાથ ધરવામાં આવી છે. તપાસ બાદ ઘટનાની હકીકત અને જવાબદારી અંગે વધુ વિગતો સામે આવી શકે છે. બીજી તરફ, ગુજરાત પ્રદૂષણ નિયંત્રણ બોર્ડ (GPCB)ની કામગીરી અંગે પણ સ્થાનિક સ્તરે સવાલો ઉઠાવવામાં આવ્યા છે. કંપનીને નોટિસ અથવા ક્લોઝર આપવામાં આવ્યા બાદ ટૂંકા સમયગાળામાં ફરી કામગીરી શરૂ કરવાની મંજૂરી આપવામાં આવતી હોવાના આક્ષેપો કરવામાં આવી રહ્યા છે. જોકે, આ અંગે સત્તાવાર તપાસ અથવા સંબંધિત વિભાગનો વિગતવાર પક્ષ સામે આવ્યા બાદ જ સ્થિતિ વધુ સ્પષ્ટ થશે.