Ambaji: ભાદરવી પૂનમે અંબાજીમાં ભક્તોનું ઘોડાપૂર, ‘જય અંબે’ના જયઘોષથી ગુંજી ઉઠ્યું અંબાજી ધામ

Ambaji Bhadarvi Poonam: પાવન ભાદરવી પૂનમના અવસરે આજે અંબાજી ધામમાં આસ્થા અને ભક્તિનો અદભુત માહોલ જોવા મળ્યો હતો. દેશના વિવિધ વિસ્તારોમાંથી મોટી સંખ્યામાં માઈભક્તો માં અંબાના દર્શન માટે અંબાજી પહોંચ્યા હતા. ભક્તોની ભારે ભીડથી સમગ્ર અંબાજી ધામ ભક્તિમય વાતાવરણથી છલકાઈ ઉઠ્યું હતું.

‘જય અંબે’ના જયઘોષથી ગુંજી ઉઠ્યું અંબાજી

ભાદરવી પૂનમના પાવન દિવસે અબાલવૃદ્ધ સહિત મોટી સંખ્યામાં શ્રદ્ધાળુઓ માં અંબાના દર્શન માટે ઉમટી પડ્યા હતા. અંબાજીના માર્ગો, ચોક-ચોરાહાઓ અને આસપાસનો સમગ્ર વિસ્તાર માઈભક્તોની અવરજવરથી ધમધમી રહ્યો હતો. ભક્તો હાથમાં ધજા અને ચુંદડી લઈને તેમજ માં અંબાની ભક્તિમાં લીન થઈ પગપાળા અંબાજીના ચાચર ચોક સુધી પહોંચ્યા હતા. સમગ્ર યાત્રાધામમાં ‘જય અંબે’ના જયઘોષથી ભક્તિમય માહોલ છવાયો હતો.

પદયાત્રાનો થાક ભક્તિ સામે ઓસરી ગયો

માં અંબાના દર્શનની આતુરતા સાથે લાંબી પદયાત્રા કરીને પહોંચેલા ભક્તોમાં પણ ભારે ઉત્સાહ જોવા મળ્યો હતો. પદયાત્રાનો થાક જાણે માં અંબાના દર્શનની આતુરતા અને ભક્તિભાવ સામે ઓસરી ગયો હોય તેવો માહોલ જોવા મળ્યો હતો. અંબાજી પહોંચ્યા બાદ ભક્તોએ માં અંબાના દર્શન કરી તેમના ચરણોમાં શીશ ઝુકાવ્યું હતું. દર્શન બાદ ભક્તોના ચહેરા પર આનંદ અને સંતોષ જોવા મળ્યો હતો.

ભક્તોથી છલકાયું અંબાજી ધામ

ભાદરવી પૂનમના પાવન અવસરે અંબાજી ધામમાં મોટી સંખ્યામાં માઈભક્તો ઉમટી પડતાં સમગ્ર યાત્રાધામ જાણે આસ્થા અને ભક્તિનો મહાકુંભ બની ગયું હતું. ભક્તોએ માં અંબાના દર્શન કરીને ધન્યતા અનુભવી હતી.