Gujarat Rain Update: ગુજરાતમાં ફરી ચોમાસું સક્રિય: અમદાવાદ સહિત 72 તાલુકામાં વરસાદ, 15 સપ્ટેમ્બર સુધી ભારે વરસાદની આગાહી

Gujarat Rain Update: ગુજરાતમાં લાંબા વિરામ બાદ ફરી વરસાદી માહોલ જામ્યો છે. શનિવારે સવારે 6થી સાંજે 6 વાગ્યા સુધીમાં રાજ્યના 72 તાલુકામાં વરસાદ નોંધાયો હતો. અમદાવાદ શહેર સહિત મધ્ય ગુજરાત, દક્ષિણ ગુજરાત અને સૌરાષ્ટ્રના કેટલાક વિસ્તારોમાં હળવાથી મધ્યમ વરસાદના ઝાપટાં પડ્યા હતા. હવામાન વિભાગે આગામી દિવસોમાં પણ રાજ્યના અનેક વિસ્તારોમાં વરસાદની આગાહી કરી છે. 12થી 15 સપ્ટેમ્બર દરમિયાન કેટલાક જિલ્લાઓમાં ભારે વરસાદની શક્યતા વ્યક્ત કરવામાં આવી છે. વરસાદી સિસ્ટમો સક્રિય થતાં દક્ષિણ ગુજરાત અને સૌરાષ્ટ્રના કેટલાક વિસ્તારો માટે એલર્ટ જાહેર કરવામાં આવ્યું છે.

અમદાવાદમાં અનેક વિસ્તારોમાં વરસાદ

અમદાવાદ શહેરમાં શનિવારે અચાનક વાતાવરણમાં પલટો આવ્યો હતો. પાલડી, વિશાલા, વાસણા, બોડકદેવ, રાણીપ, નવાવાડજ, અખબારનગર, મકરબા, સરખેજ અને એસજી હાઈવે સહિતના વિસ્તારોમાં વરસાદ નોંધાયો હતો. લાંબા સમય બાદ વરસાદ થતાં શહેરના વાતાવરણમાં ઠંડક પ્રસરી હતી.

છોટા ઉદેપુરમાં વરસાદથી ખેડૂતોમાં રાહત

છોટા ઉદેપુર જિલ્લામાં પણ લાંબા સમય બાદ વરસાદે હાજરી નોંધાવી હતી. છોટા ઉદેપુર, પાનવડ અને બોડેલી પંથકમાં સવારથી ધીમીધારે વરસાદ પડ્યો હતો. લાંબા સમયથી વરસાદની રાહ જોઈ રહેલા ખેડૂતો માટે આ વરસાદ રાહતરૂપ બન્યો છે. ચોમાસાના પાક માટે વરસાદની ખાસ જરૂરિયાત હોવાથી વરસાદના આગમનથી પાકને ફરી જીવંત થવાની આશા ખેડૂતોમાં જાગી છે.

લુણાવાડામાં વરસાદી ઝાપટું

મહીસાગર જિલ્લાના લુણાવાડામાં પણ વરસાદી ઝાપટું પડ્યું હતું. છેલ્લા કેટલાક સમયથી વરસાદની રાહ જોઈ રહેલા ખેડૂતોમાં વરસાદ થતાં ખુશી જોવા મળી હતી. મધ્ય ગુજરાતના અન્ય વિસ્તારોમાં પણ વાદળછાયું વાતાવરણ અને હળવા વરસાદની સ્થિતિ જોવા મળી હતી.

ગોધરામાં પણ મેઘરાજાની એન્ટ્રી

પંચમહાલ જિલ્લાના ગોધરા શહેર અને આસપાસના ગ્રામ્ય વિસ્તારોમાં વરસાદ વરસ્યો હતો. લાંબા સમયથી વરસાદ ખેંચાતા ખેડૂતો ચિંતામાં હતા. હવે ફરી વરસાદ શરૂ થતાં ખેતીના પાકને ફાયદો થવાની આશા બંધાઈ છે.

અમરેલીમાં વરસાદી ઝાપટાં

સૌરાષ્ટ્રમાં પણ અમરેલી જિલ્લામાં વરસાદી માહોલ જોવા મળ્યો હતો. જાફરાબાદ તાલુકાના ટીંબી, છેલાણા સહિતના ગામોમાં હળવા વરસાદના ઝાપટાં પડ્યા હતા. વરસાદને પગલે વાતાવરણમાં ઠંડક પ્રસરી હતી.

15 સપ્ટેમ્બર સુધી વરસાદની આગાહી

હવામાન વિભાગની આગાહી મુજબ ગુજરાતમાં આગામી દિવસોમાં વરસાદનું જોર વધી શકે છે. 12થી 15 સપ્ટેમ્બર દરમિયાન રાજ્યના કેટલાક વિસ્તારોમાં ભારેથી અતિભારે વરસાદ પડવાની શક્યતા છે. ડાંગ, નવસારી, વલસાડ, અમરેલી અને ભાવનગર સહિતના જિલ્લાઓમાં વરસાદને લઈને ખાસ તકેદારી રાખવાની સૂચના આપવામાં આવી છે. વરસાદી સિસ્ટમો સક્રિય થતાં આગામી દિવસોમાં ગુજરાતના અનેક વિસ્તારોમાં મેઘમહેર જોવા મળી શકે છે. ખાસ કરીને લાંબા સમયથી વરસાદની રાહ જોઈ રહેલા ખેડૂતો માટે આગામી વરસાદ મહત્વનો બની શકે છે.

જુઓ ક્યાં કેટલો વરસાદ?