Illegal Cosmetics Ahmedabad: અમદાવાદમાં ગેરકાયદેસર કોસ્મેટિક્સનું ઉત્પાદન અને રીપેકિંગ કરતી પ્રવૃત્તિ સામે ખોરાક અને ઔષધ નિયમન તંત્ર (FDCA) દ્વારા મોટી કાર્યવાહી કરવામાં આવી છે. FDCAની ટીમે અમદાવાદના ત્રાગડ વિસ્તારમાં આવેલી ‘આનકી હર્બલ’ નામની પેઢી પર સરપ્રાઇઝ ચેકિંગ હાથ ધરી ગેરકાયદેસર રીતે તૈયાર કરવામાં આવતા કોસ્મેટિક્સનો જથ્થો, કાચો માલ, પેકિંગ મટીરીયલ અને છાપેલા લેબલ્સ સહિત રૂ.2.68 લાખથી વધુનો મુદ્દામાલ જપ્ત કર્યો છે.

લાઇસન્સ વગર કોસ્મેટિક્સનું ઉત્પાદન અને રીપેકિંગ

મળતી માહિતી મુજબ, FDCAને મળેલી બાતમીના આધારે 25 ઓગસ્ટ 2026ના રોજ ત્રાગડ વિસ્તારમાં કાર્યવાહી કરવામાં આવી હતી. તપાસ દરમિયાન ‘આનકી હર્બલ’ દ્વારા જરૂરી લાઇસન્સ મેળવ્યા વિના તેમજ ગુણવત્તાનું પરીક્ષણ કરાવ્યા વગર કોસ્મેટિક્સનું ઉત્પાદન અને બલ્ક પેકમાંથી રીપેકિંગ કરવામાં આવતું હોવાનું સામે આવ્યું હતું. તપાસ દરમિયાન અધિકારીઓને વિવિધ પ્રકારના કોસ્મેટિક્સનો જથ્થો મળી આવ્યો હતો.

ફેરનેસ ક્રીમથી લઈને શેમ્પુ-બોડી વોશ સુધીનો જથ્થો જપ્ત

FDCAની કાર્યવાહીમાં સ્થળ પરથી ફેરનેસ ક્રીમ, ડાર્ક સર્કલ ક્રીમ, શેમ્પુ, હેર ઓઇલ, બોડી વોશ, ફેસ વોશ અને સ્ક્રબ સહિતના કોસ્મેટિક્સ મળી આવ્યા હતા. આ ઉપરાંત સોલિડ પરફ્યુમ, ગ્લિસરીન બેઝ સાબુ, કાચો માલ, પેકિંગ મટીરીયલ અને છાપેલા લેબલ્સ પણ મળી આવ્યા હતા. આ તમામ સહિત કુલ રૂ.2.68 લાખથી વધુનો મુદ્દામાલ જપ્ત કરવામાં આવ્યો છે.

ઓઢવની ‘રવી માર્કેટીંગ’ સુધી તપાસ લંબાઈ

FDCAની વધુ તપાસમાં કોસ્મેટિક્સના ઉત્પાદન અને રીપેકિંગ માટેનું બલ્ક મટીરીયલ અમદાવાદના ઓઢવ સ્થિત ‘રવી માર્કેટીંગ’ પાસેથી ખરીદવામાં આવતું હોવાની માહિતી સામે આવી છે. તપાસમાં શિવાન્તા રીગેલના એક ફ્લેટમાં કોસ્મેટિક્સનું રીપેકિંગ અને ગ્લિસરીન સાબુનું ઉત્પાદન કરવામાં આવતું હોવાનું પણ જાણવા મળ્યું છે. આ મામલે FDCA દ્વારા ‘રવી માર્કેટીંગ’ ખાતે પણ તપાસ લંબાવવામાં આવી છે.

10 કોસ્મેટિક પ્રોડક્ટ્સના સેમ્પલ લેવાયા

અધિકારીઓએ સ્થળ પરથી 10 અલગ-અલગ કોસ્મેટિક પ્રોડક્ટ્સના નમૂના લીધા છે. આ નમૂનાઓને ગુણવત્તા અને સંબંધિત માપદંડોની ચકાસણી માટે લેબોરેટરીમાં પૃથક્કરણ અર્થે મોકલવામાં આવ્યા છે. લેબોરેટરી રિપોર્ટ આવ્યા બાદ પ્રોડક્ટ્સની ગુણવત્તા અંગે વધુ સ્પષ્ટતા થઈ શકે છે અને નિયમોના ભંગ અંગે આગળની કાયદેસરની કાર્યવાહી કરવામાં આવી શકે છે.

નકલી દવાઓના કેસમાં પણ મોટી કાર્યવાહી

આ કાર્યવાહી વચ્ચે અમદાવાદ શહેર ક્રાઇમ બ્રાન્ચ અને FDCAના સંયુક્ત ઓપરેશનમાં તાજેતરમાં બ્લડ પ્રેશરની નકલી દવાઓ બનાવતી અને વેચતી આંતરરાજ્ય સિન્ડિકેટનો પર્દાફાશ કરવામાં આવ્યો હતો. આ કેસમાં અમદાવાદ અને લખનઉના કુલ ત્રણ આરોપીઓની ધરપકડ કરવામાં આવી છે. આ સફળ કામગીરી બદલ આરોગ્ય મંત્રી પ્રફુલ પાનશેરીયાએ અમદાવાદ શહેર પોલીસ કમિશનર સહિત ક્રાઇમ બ્રાન્ચ અને FDCAના અધિકારીઓ તથા કર્મચારીઓને અભિનંદન પાઠવ્યા છે.

આરોગ્ય સાથે ચેડાં કરનારાઓ સામે ઝીરો ટોલરન્સ

આરોગ્ય મંત્રી પ્રફુલ પાનશેરીયાએ જણાવ્યું છે કે નાગરિકોના આરોગ્ય અને સલામતી સાથે ચેડાં કરતી ગેરકાયદેસર પ્રવૃત્તિઓ સામે રાજ્ય સરકારનો ઝીરો ટોલરન્સ અભિગમ છે. સરકાર દ્વારા સ્પષ્ટ કરવામાં આવ્યું છે કે લોકોના આરોગ્ય સાથે ચેડાં કરનારા તત્વો સામે કાયદા મુજબ કડક કાર્યવાહી ચાલુ રાખવામાં આવશે. ત્રાગડની કાર્યવાહીમાં લેવાયેલા કોસ્મેટિક્સના સેમ્પલના લેબોરેટરી રિપોર્ટ બાદ મામલે વધુ વિગતો સામે આવવાની શક્યતા છે.