ગુજરાતમાં CCTVનું મજબૂત કવચ બનાવાશે, લોકભાગીદારીથી રાજ્યભરમાં વધારાશે કેમેરા નેટવર્ક

Gujarat CCTV Network: ગુજરાતમાં જાહેર સલામતી વધુ મજબૂત બનાવવા અને ગુનાઓની અટકાયત તથા ઝડપી ડિટેક્શન માટે રાજ્યભરમાં CCTV સર્વેલન્સ નેટવર્કને વધુ વ્યાપક બનાવવાની દિશામાં પોલીસ તંત્ર દ્વારા મહત્વપૂર્ણ પહેલ કરવામાં આવી છે. રાજ્યના પોલીસ વડા જ્ઞાનેન્દ્રસિંહ મલિક દ્વારા નાગરિકો, રહેણાંક સોસાયટીઓ, વેપારી સંગઠનો અને વિવિધ એસોસિએશનોના સહયોગથી CCTV નેટવર્ક વિસ્તૃત કરવા પર ભાર મૂકવામાં આવ્યો છે.

જ્ઞાનેન્દ્રસિંહ મલિક અમદાવાદ શહેરના પોલીસ કમિશનર તરીકે કાર્યરત હતા ત્યારે લોકભાગીદારીથી શહેરમાં 24 હજારથી વધુ CCTV કેમેરા સ્થાપિત કરવામાં આવ્યા હતા. ઉપલબ્ધ અહેવાલો મુજબ, આમાંથી 3 હજારથી વધુ મહત્વપૂર્ણ કેમેરાના ફીડ પોલીસ સ્ટેશનો અને પોલીસ કંટ્રોલ રૂમ સાથે જોડવામાં આવ્યા હતા. આ મોડેલને હવે રાજ્યના અન્ય શહેરો અને જિલ્લાઓમાં પણ વિસ્તારવાનો અભિગમ અપનાવવામાં આવી રહ્યો છે.

‘જેટલું વ્યાપક નેટવર્ક, તેટલી વધુ સુરક્ષા’

પોલીસ તંત્રના અભિગમ મુજબ CCTV નેટવર્ક જેટલું વ્યાપક અને સુવ્યવસ્થિત હશે, તેટલી ગુનાઓની અટકાયત, તપાસ અને આરોપીઓની ઓળખમાં મદદ મળી શકે છે. ખાસ કરીને ચોરી, લૂંટ, ચેઇન સ્નેચિંગ સહિતના ગુનાઓની તપાસમાં CCTV ફૂટેજ પોલીસ માટે મહત્વપૂર્ણ પુરાવો બની શકે છે. આ માટે શહેરોના પોલીસ કમિશનરો અને જિલ્લા પોલીસ વડાઓને સ્થાનિક નાગરિકો, સોસાયટીઓ તથા વેપારી મંડળો સાથે બેઠક અને સંવાદ યોજીને વધુમાં વધુ લોકોને સ્વૈચ્છિક રીતે CCTV સ્થાપિત કરવા માટે પ્રેરિત કરવા માર્ગદર્શન આપવામાં આવ્યું છે.

સોસાયટીની બહાર પણ કેમેરા લગાવવા અપીલ

નાગરિકો દ્વારા સોસાયટી કે કોમર્શિયલ પરિસરમાં CCTV લગાવવામાં આવે ત્યારે કેમેરાની દિશા માત્ર બિલ્ડિંગ અથવા પરિસરની અંદર સુધી મર્યાદિત ન રહે, પરંતુ મુખ્ય રોડ, પાર્કિંગ, એન્ટ્રી-એક્ઝિટ અને અવરજવરના મહત્વપૂર્ણ પોઇન્ટને પણ આવરી લે તે માટે અપીલ કરવામાં આવી છે. સાથે જ રાત્રિના સમયે પણ અસરકારક સર્વેલન્સ માટે નાઇટ વિઝન ક્ષમતા ધરાવતા અને સારી રિઝોલ્યુશનવાળા કેમેરાનો ઉપયોગ કરવા પર ભાર મૂકવામાં આવ્યો છે. પૂરતો વીડિયો બેકઅપ ઉપલબ્ધ રહે તે પણ મહત્વપૂર્ણ ગણાવવામાં આવ્યું છે.

અમદાવાદના મોડેલને સમગ્ર ગુજરાતમાં વિસ્તારવાની દિશા

અમદાવાદમાં નાગરિકો અને વિવિધ સંસ્થાઓના સહયોગથી ઉભું થયેલું CCTV નેટવર્ક પોલીસ માટે ક્રાઇમ પ્રિવેન્શન અને ડિટેક્શનની કામગીરીમાં ઉપયોગી બન્યું હોવાનું પોલીસ તંત્ર દ્વારા જણાવાયું છે. હવે આ લોકભાગીદારી આધારિત મોડેલને સમગ્ર રાજ્યમાં વિસ્તારવાનો પ્રયાસ કરવામાં આવી રહ્યો છે. જૂન 2026માં ગુજરાતના પોલીસ વડા તરીકે ચાર્જ સંભાળ્યા બાદ મલિકે ટેકનોલોજીના ઉપયોગ અને ખાસ કરીને મહત્વના શહેરોમાં CCTV નેટવર્કના વિસ્તરણને પોલીસિંગની પ્રાથમિકતાઓમાં સ્થાન આપ્યું હતું.

‘સુરક્ષિત ગુજરાત’ માટે લોકભાગીદારી પર ભાર

પોલીસ અને નાગરિકો વચ્ચેના પરસ્પર સહયોગથી જાહેર સ્થળો અને રહેણાંક વિસ્તારોમાં સુરક્ષા વધુ મજબૂત બની શકે તે હેતુથી નાગરિકોને પોતાના પરિસરને CCTV નેટવર્કથી સુરક્ષિત બનાવવા અપીલ કરવામાં આવી છે. આ પહેલનો મુખ્ય ઉદ્દેશ્ય ટેકનોલોજી અને લોકભાગીદારીના સંયોજનથી ગુનાઓની અટકાયત, ઝડપી ડિટેક્શન અને તપાસને વધુ અસરકારક બનાવવાનો છે.