Gujarat Police ભરતીમાં 12,733 જગ્યાઓ માટે દસ્તાવેજ ચકાસણી 30 સપ્ટેમ્બરથી, ઉમેદવારોના કોલ લેટર જાહેર

Gujarat Police Recruitment 2026: ગુજરાત પોલીસ ભરતી બોર્ડ દ્વારા લોકરક્ષક કેડરની વર્ષ 2025-26ની ભરતી પ્રક્રિયા અંતર્ગત મહત્વપૂર્ણ જાહેરાત કરવામાં આવી છે. કુલ 12,733 જગ્યાઓ માટે પસંદગી પામેલા ઉમેદવારોની પ્રથમ તબક્કાની દસ્તાવેજ ચકાસણીની પ્રક્રિયા 30 સપ્ટેમ્બર 2026થી 13 ઓક્ટોબર 2026 દરમિયાન યોજાશે. ઉમેદવારો માટે દસ્તાવેજ ચકાસણી અંગેના કોલ લેટર આજથી OJAS વેબસાઇટ પરથી ડાઉનલોડ કરી શકાશે. દસ્તાવેજ ચકાસણીની કામગીરી અમદાવાદ, વડોદરા, રાજકોટ, સુરેન્દ્રનગર અને ગાંધીનગર ખાતે યોજવામાં આવશે.

કઈ કઈ જગ્યાઓ માટે ભરતી?

લોકરક્ષક કેડરની આ ભરતીમાં કુલ 12,733 જગ્યાઓનો સમાવેશ થાય છે. જેમાં:

• બિન હથિયારી પોલીસ કોન્સ્ટેબલ – 6,942 જગ્યાઓ

• હથિયારી પોલીસ કોન્સ્ટેબલ – 2,458 જગ્યાઓ

• જેલ સિપાહી – 331 જગ્યાઓ

• હથિયારી પોલીસ કોન્સ્ટેબલ-SRPF (માત્ર પુરુષ) – 3,002 જગ્યાઓ

દસ્તાવેજ ચકાસણીમાં શું તપાસાશે?

દસ્તાવેજ ચકાસણી દરમિયાન ઉમેદવારોના ઓળખના પુરાવા, શૈક્ષણિક પ્રમાણપત્રો, અનામત વર્ગને લગતા જાતિના પ્રમાણપત્રો તેમજ વધારાના ગુણ મેળવવા માટે રજૂ કરાયેલા પ્રમાણપત્રોની ચકાસણી કરવામાં આવશે. ઉમેદવારોએ પોતાના કોલ લેટરમાં દર્શાવેલા સ્થળ, તારીખ અને સમય મુજબ જરૂરી મૂળ દસ્તાવેજો સાથે હાજર રહેવાનું રહેશે.

ઉમેદવારોએ પસંદગીનો ક્રમ ધ્યાનથી ભરવો

દસ્તાવેજ ચકાસણી દરમિયાન ઉમેદવારો પાસેથી પોસ્ટ માટે Preference Form પણ ભરાવવામાં આવશે. તેમાં પસંદગીનો ક્રમ નીચે મુજબ રહેશે:

• બિન હથિયારી પોલીસ કોન્સ્ટેબલ

• હથિયારી પોલીસ કોન્સ્ટેબલ

• જેલ સિપાહી

• હથિયારી પોલીસ કોન્સ્ટેબલ-SRPF (માત્ર પુરુષ)

મહત્વનું છે કે દસ્તાવેજ ચકાસણી બાદ આપવામાં આવેલો પસંદગીનો ક્રમ અંતિમ ગણવામાં આવશે. આ ક્રમના આધારે આગળની પસંદગી યાદી તૈયાર કરવામાં આવશે.

OJAS પરથી કોલ લેટર ડાઉનલોડ કરી શકાશે

ભરતી પ્રક્રિયામાં સામેલ ઉમેદવારોએ OJAS વેબસાઇટ પરથી પોતાનું કોલ લેટર ડાઉનલોડ કરી તેમાં દર્શાવેલી તારીખ, સમય અને સ્થળની વિગતો ચકાસી લેવાની રહેશે. દસ્તાવેજ ચકાસણી માટે જરૂરી તમામ પ્રમાણપત્રો અને દસ્તાવેજો સાથે સમયસર હાજર રહેવું જરૂરી રહેશે.