EDII ખાતે 'ઝણકાર 26' ગરબા રાત્રિનું ભવ્ય આયોજન, 17 દેશના 68 આંતરરાષ્ટ્રીય પ્રતિનિધિઓ ગરબે ઘૂમ્યા

EDII: એન્ટરપ્રેન્યોરશિપ ડેવલપમેન્ટ ઈન્સ્ટિટ્યૂટ ઓફ ઈન્ડિયા (EDII) દ્વારા 16 ઓક્ટોબર, 2026ના રોજ ‘ઝણકાર 26’ નામે ભવ્ય ગરબા રાત્રિનું આયોજન કરવામાં આવ્યું હતું.

નવરાત્રિના પાવન પર્વ નિમિત્તે યોજાયેલા આ સંગીત અને નૃત્યથી ભરપૂર સાંસ્કૃતિક કાર્યક્રમમાં સંસ્થાના ફેકલ્ટી સભ્યો, વિદ્યાર્થીઓ, ભૂતપૂર્વ વિદ્યાર્થીઓ અને રાજ્ય સરકારના મહાનુભાવો ઉપસ્થિત રહ્યા હતા. આ કાર્યક્રમે સૌને નવરાત્રિના ઉત્સવની ઉમંગભરી ભાવનાનો જીવંત અનુભવ કરાવ્યો હતો.

17 દેશના 68 પ્રતિનિધિઓ બન્યા આકર્ષણનું કેન્દ્ર

આ ભવ્ય ગરબા રાત્રિનું મુખ્ય આકર્ષણ 17 દેશોના 68 આંતરરાષ્ટ્રીય પ્રતિનિધિઓ રહ્યા હતા. આ તમામ આંતરરાષ્ટ્રીય સહભાગીઓ કેડિયાં અને ચણિયા-ચોળી જેવા પરંપરાગત ગુજરાતી પોશાકમાં સજ્જ થઈને ભારતીય સંગીતના તાલે ઉત્સાહભેર ગરબે ઘૂમતા જોવા મળ્યા હતા.

આ પ્રતિનિધિઓ ભારત સરકારના વિદેશ મંત્રાલયના 'ભારતીય ટેકનિકલ અને આર્થિક સહકાર' (ITEC) કાર્યક્રમ હેઠળ EDII ખાતે આયોજિત તાલીમ કાર્યક્રમોમાં ભાગ લેવા આવ્યા છે. આ અંતર્ગત 14થી 27 ઓક્ટોબર, 2026 દરમિયાન ‘નવા ઉદ્યોગોની સ્થાપના અને કૌશલ્યવર્ધન’ તેમજ ‘અનૌપચારિક ક્ષેત્ર, ઉદ્યોગસાહસિકતા અને સ્થાનિક આર્થિક વિકાસ’ વિષય પર તાલીમનું આયોજન કરવામાં આવ્યું છે.

સાંસ્કૃતિક આદાનપ્રદાન અને મૈત્રીપૂર્ણ વાતાવરણ

'ઝણકાર 26' કાર્યક્રમે ઈન્ટરનેશનલ સહભાગીઓને ગુજરાતની સમૃદ્ધ અને જીવંત સાંસ્કૃતિક પરંપરાઓને ખૂબ નજીકથી જાણવાની અને તેનો સાચો અનુભવ કરવાની અનોખી તક પૂરી પાડી હતી. આ પહેલ દ્વારા વિવિધ દેશોના પ્રતિનિધિઓ વચ્ચે પરસ્પર સમજણ, સાંસ્કૃતિક આદાનપ્રદાન અને વૈશ્વિક મૈત્રી ભાવનાને વધુ બળ મળ્યું હતું.

આ પણ વાંચો: Kutch: રાપરના ખેંગારપર ગામે નવજાત શિશુના મોતના કેસનો ભેદ ઉકેલાયો, આરોપીઓની પોલીસે કરી ધરપકડ