JNU મામલે કોંગ્રેસ સામે ભાજપ મહિલા મોરચાનું પ્રદર્શન, સાંસદને બરતરફ કરવાની માગ

BJP Mahila Morcha JNU Protest Ahmedabad: JNUમાં વિદ્યાર્થીનીઓની જાતીય સતામણી અને શારીરિક શોષણના આરોપોના મુદ્દે કોંગ્રેસના નેતાઓની કથિત ચુપકીદી સામે ભાજપ મહિલા મોરચાએ વિરોધ નોંધાવ્યો છે. અમદાવાદના પાલડી વિસ્તારમાં આવેલા ગુજરાત પ્રદેશ કોંગ્રેસ કાર્યાલય ‘રાજીવ ગાંધી ભવન’ની બહાર ભાજપ મહિલા મોરચા દ્વારા ધરણાં-પ્રદર્શન યોજવામાં આવ્યું હતું. આ દરમિયાન કોંગ્રેસ અને રાહુલ ગાંધી સામે નારાજગી વ્યક્ત કરીને સંબંધિત સાંસદને પક્ષમાંથી બરતરફ કરવાની માગ કરવામાં આવી હતી.

ગુજરાત પ્રદેશ ભાજપના મીડિયા વિભાગ દ્વારા જાહેર કરાયેલી અખબારી યાદી અનુસાર, કોંગ્રેસના સાંસદ અગોમચા બિમોલ અકોઇઝમ સામે JNUમાં વિદ્યાર્થીનીઓની જાતીય સતામણી અને શારીરિક શોષણના ગંભીર આરોપોના મુદ્દે આ વિરોધ યોજાયો હતો. પ્રદર્શનમાં ભાજપનાં રાષ્ટ્રીય ઉપાધ્યક્ષ વર્ષાબેન દોશી, રાજ્ય સરકારનાં મંત્રી દર્શનાબેન વાઘેલા, મહિલા મોરચાનાં પ્રદેશ અધ્યક્ષ અંજુબેન વેકરિયા તથા મહિલા ધારાસભ્યો ઉપસ્થિત રહ્યાં હતાં. મોટી સંખ્યામાં મહિલા મોરચાની કાર્યકરોએ વિરોધમાં ભાગ લીધો હતો.

‘મહિલા સુરક્ષા મુદ્દે કોંગ્રેસની ભૂમિકા સ્પષ્ટ કરે’

ભાજપ મહિલા મોરચાનાં પ્રદેશ અધ્યક્ષ અંજુબેન વેકરિયાએ આક્ષેપ કર્યો હતો કે કોંગ્રેસ મહિલા સન્માનની વાતો કરે છે, પરંતુ આવા ગંભીર મુદ્દે પક્ષના નેતાઓનું મૌન અનેક સવાલો ઊભા કરે છે. તેમણે રાહુલ ગાંધી, પ્રિયંકા ગાંધી વાડ્રા અને કોંગ્રેસના અન્ય નેતાઓને આ મામલે સ્પષ્ટ વલણ જાહેર કરવા જણાવ્યું હતું. વેકરિયાએ વધુમાં કહ્યું કે મહિલાઓના સન્માન અને સુરક્ષાનો મુદ્દો કોંગ્રેસ માટે માત્ર ભાષણો અને રાજકીય લાભ મેળવવાનું સાધન બની રહ્યો છે. તેમણે સંબંધિત સાંસદના કથિત કૃત્યની સખત નિંદા કરીને કોંગ્રેસને તેમને પક્ષમાંથી બરતરફ કરવાનો પડકાર ફેંક્યો હતો.

દર્શનાબેન વાઘેલાએ પણ કોંગ્રેસના વલણ પર સવાલ ઉઠાવ્યા

પ્રદર્શનમાં ઉપસ્થિત રાજ્ય સરકારનાં મંત્રી દર્શનાબેન વાઘેલાએ પણ મીડિયા સાથેની વાતચીતમાં આ મામલે કોંગ્રેસના વલણ સામે સવાલો ઉઠાવ્યા હતા અને સાંસદ સામેના આરોપોના મુદ્દે પક્ષની ભૂમિકાની ટીકા કરી હતી. ભાજપ મહિલા મોરચાના આ પ્રદર્શનથી અમદાવાદમાં રાજકીય ગરમાવો જોવા મળ્યો હતો. મહિલાઓની સુરક્ષા અને સન્માનના મુદ્દે ભાજપે કોંગ્રેસને ઘેરવાનો પ્રયાસ કર્યો છે. જોકે, સાંસદ સામેના આરોપો અંગેની તપાસ અને સંબંધિત સત્તાવાળાઓની સત્તાવાર કાર્યવાહી અંગેની વિગતોના આધારે જ મામલાની આગળની સ્થિતિ સ્પષ્ટ થશે.