Ahmedabad એરપોર્ટ પરથી રૂ. 5 કરોડનું કોકેઈન ઝડપાયું, યુગાન્ડાના નાગરિકની ધરપકડ

Ahmedabad: અમદાવાદ એરપોર્ટ પરથી ડ્રગ્સની હેરાફેરીનો પ્રયાસ ઝડપાયો છે. એરપોર્ટ પર તપાસ દરમિયાન 981 ગ્રામ કોકેઈનના જથ્થા સાથે યુગાન્ડાના એક નાગરિકની ધરપકડ કરવામાં આવી છે. જપ્ત કરાયેલા કોકેઈનની અંદાજિત કિંમત આશરે રૂ. 5 કરોડ હોવાનું સામે આવ્યું છે.

ટ્રોલી બેગની તપાસમાં ખુલાસો

મળતી માહિતી મુજબ, મુસાફરની ટ્રોલી બેગની તપાસ દરમિયાન સુરક્ષા એજન્સીઓને શંકા જતા વધુ તપાસ હાથ ધરવામાં આવી હતી. તપાસ દરમિયાન ટ્રોલી બેગના ટેલિસ્કોપિક હેન્ડલમાં કોકેઈન સંતાડવામાં આવ્યું હોવાનું સામે આવ્યું હતું. હેન્ડલમાંથી કોકેઈનનો જથ્થો બહાર કાઢવામાં આવ્યો હતો. ત્યારબાદ કુલ 981 ગ્રામ કોકેઈન જપ્ત કરવામાં આવ્યું હતું.

રૂ. 5 કરોડના કોકેઈન સાથે ધરપકડ

જપ્ત કરાયેલા ડ્રગ્સની બજાર કિંમત આશરે રૂ. 5 કરોડ હોવાનું જાણવા મળ્યું છે. આ મામલે યુગાન્ડાના નાગરિકની ધરપકડ કરવામાં આવી છે અને તેની સામે કાયદેસરની કાર્યવાહી હાથ ધરવામાં આવી છે.

ડ્રગ્સ ક્યાંથી આવ્યું? તપાસ શરૂ

કોકેઈનનો આ જથ્થો ક્યાંથી લાવવામાં આવ્યો હતો અને તેને અમદાવાદમાં કોને પહોંચાડવાનો હતો તે સહિતના મુદ્દે તપાસ હાથ ધરવામાં આવી રહી છે. આરોપી અગાઉથી કોઈ ડ્રગ્સ નેટવર્ક સાથે સંકળાયેલો હતો કે કેમ અને આ હેરાફેરી પાછળ અન્ય કોઈ વ્યક્તિ કે સંગઠનનો હાથ છે કે કેમ તે અંગે પણ તપાસ કરવામાં આવી રહી છે.

એરપોર્ટ પરથી ડ્રગ્સનો મોટો જથ્થો ઝડપાતા સુરક્ષા અને તપાસ એજન્સીઓની કામગીરી વધુ મહત્વપૂર્ણ બની છે. સમગ્ર કેસમાં આગળની તપાસ દરમિયાન ડ્રગ્સ સપ્લાય ચેઇન અંગે વધુ વિગતો સામે આવી શકે છે.

આ પણ વાંચો : Ganesh Visarjan: ‘ગણપતિ બાપ્પા મોરયા’ના ગગનભેદી જયઘોષ સાથે વડોદરામાં શ્રીજીની વિસર્જન યાત્રાઓ