ZairaWasim:‘દંગલ’ની નાની ગીતા ફોગાટથી બોલિવૂડ છોડવા સુધી, આવો રહ્યો ઝાયરા વસીમનો સફર

Zaira Wasim: બોલિવૂડમાં કેટલીક એવી અભિનેત્રીઓ છે, જેમણે નાની ઉંમરે જ પોતાની અભિનય પ્રતિભાથી દર્શકોના દિલમાં ખાસ સ્થાન બનાવ્યું છે. આવી જ એક અભિનેત્રી છે ઝાયરા વસીમ. આમિર ખાનની ફિલ્મ ‘દંગલ’થી ફિલ્મી કરિયરની શરૂઆત કરનાર ઝાયરાએ પોતાની પહેલી જ ફિલ્મથી દર્શકોનું ધ્યાન ખેંચ્યું હતું. તેના અભિનયની પ્રશંસા થઈ અને તેને રાષ્ટ્રીય ફિલ્મ પુરસ્કારથી પણ સન્માનિત કરવામાં આવી. જોકે, કરિયર આગળ વધી રહ્યું હતું ત્યારે જ તેણે બોલિવૂડ છોડવાનો નિર્ણય લઈને સૌને આશ્ચર્યમાં મૂકી દીધા હતા.

શ્રીનગરમાં થયો હતો જન્મ

ઝાયરા વસીમનો જન્મ 23 ઑક્ટોબર, 2000ના રોજ જમ્મુ-કાશ્મીરના શ્રીનગરમાં થયો હતો. તેણે પ્રાથમિક શિક્ષણ પણ કાશ્મીરમાં જ મેળવ્યું હતું. બાળપણથી જ તેને અભિનયમાં રસ હતો. શાળામાં અભ્યાસ દરમિયાન તેને પોતાની પ્રતિભા દર્શાવવાની તક મળી અને ત્યાંથી જ તેના ફિલ્મી સફરની શરૂઆત થઈ હતી.

એક ઇન્ટરવ્યૂમાં ઝાયરાએ જણાવ્યું હતું કે, જ્યારે તે આઠમા ધોરણમાં અભ્યાસ કરતી હતી, ત્યારે તેણે શાળાના એક નાટકમાં ભાગ લીધો હતો. આ દરમિયાન શાળાના આચાર્યને તેની અભિનય ક્ષમતાનો અહેસાસ થયો હતો. ત્યારબાદ કાશ્મીરમાં એક કાસ્ટિંગ ડિરેક્ટર આવ્યા ત્યારે આચાર્યએ ઝાયરાનું નામ સૂચવ્યું હતું. આ રીતે તેને જાહેરાતોમાં કામ કરવાની તક મળી. તેણે માઇક્રોસોફ્ટના મોબાઇલ ફોન અને ટાટા સ્કાય જેવી બ્રાન્ડની જાહેરાતોમાં પણ કામ કર્યું હતું.

‘દંગલ’થી મળી મોટી ઓળખ

ઝાયરા વસીમના કરિયરમાં વર્ષ 2016 મહત્ત્વપૂર્ણ સાબિત થયું હતું. આ વર્ષે તેને આમિર ખાનની ફિલ્મ ‘દંગલ’માં કામ કરવાની તક મળી હતી. કુસ્તીબાજ મહાવીર સિંહ ફોગાટ અને તેમની દીકરીઓના જીવનથી પ્રેરિત આ ફિલ્મમાં ઝાયરાએ યુવા ગીતા ફોગાટની ભૂમિકા ભજવી હતી.

પોતાના પાત્રને સરળતા અને મહેનતથી પડદા પર રજૂ કરીને ઝાયરાએ દર્શકોના દિલ જીતી લીધા હતા. ફિલ્મ બોક્સ ઑફિસ પર પણ સફળ રહી હતી. ‘દંગલ’માં શાનદાર અભિનય માટે વર્ષ 2017માં ઝાયરાને શ્રેષ્ઠ સહાયક અભિનેત્રીનો રાષ્ટ્રીય ફિલ્મ પુરસ્કાર મળ્યો હતો. નાની ઉંમરે આ સન્માન મેળવવું તેના કરિયરની મોટી સિદ્ધિ હતી.

‘સિક્રેટ સુપરસ્ટાર’ અને ‘ધ સ્કાય ઇઝ પિંક’

‘દંગલ’ની સફળતા બાદ ઝાયરા વર્ષ 2017માં આવેલી ફિલ્મ ‘સિક્રેટ સુપરસ્ટાર’માં જોવા મળી હતી. આ ફિલ્મમાં તેણે ઇંશિયાની ભૂમિકા ભજવી હતી. ઇંશિયા ગાયિકા બનવાનું સપનું જોતી યુવતી છે, પરંતુ પરિવારનાં નિયંત્રણોને કારણે તેને પોતાનાં સપનાં પૂરાં કરવામાં મુશ્કેલીઓનો સામનો કરવો પડે છે. ઝાયરાના અભિનયને દર્શકોએ પસંદ કર્યો હતો અને ફિલ્મને પણ સારી સફળતા મળી હતી.

ત્યારબાદ વર્ષ 2019માં ઝાયરા પ્રિયંકા ચોપરા અને ફરહાન અખ્તર સાથે ફિલ્મ ‘ધ સ્કાય ઇઝ પિંક’માં જોવા મળી હતી. આ ફિલ્મમાં તેણે આયેશા ચૌધરીનું પાત્ર ભજવ્યું હતું. આ ફિલ્મ તેના કરિયરની મહત્ત્વપૂર્ણ ફિલ્મોમાંની એક હતી. જોકે, આ જ વર્ષે તેણે ફિલ્મી દુનિયાથી દૂર થવાનો નિર્ણય જાહેર કર્યો હતો.

ધર્મ અને વિશ્વાસને કારણે બોલિવૂડ છોડવાનો નિર્ણય

વર્ષ 2019માં ઝાયરાએ સોશિયલ મીડિયા પર લાંબી પોસ્ટ લખીને ફિલ્મ ઇન્ડસ્ટ્રી છોડવાની જાહેરાત કરી હતી. તેણે જણાવ્યું હતું કે અભિનય ક્ષેત્રમાં આવ્યા બાદ તેને લાગવા લાગ્યું હતું કે તેના કામની અસર તેના ધર્મ અને ઇમાન સાથેના સંબંધ પર પડી રહી છે. તેને એવું અનુભવાયું કે ફિલ્મી દુનિયાનો માર્ગ તેને ઇસ્લામથી દૂર લઈ જઈ રહ્યો છે. તેથી તેણે પોતાના ધાર્મિક વિશ્વાસને અનુરૂપ ફિલ્મી કરિયરથી અલગ થવાનો નિર્ણય લીધો હતો.

ઝાયરાના આ નિર્ણયને લઈને સોશિયલ મીડિયા પર વ્યાપક ચર્ચા થઈ હતી. કેટલાક લોકોએ તેના નિર્ણયનું સમર્થન કર્યું હતું, જ્યારે અન્ય લોકોએ સવાલો પણ ઉઠાવ્યા હતા. જોકે, ઝાયરા પોતાના નિર્ણય પર અડગ રહી હતી અને ફિલ્મોથી અંતર જાળવ્યું હતું.

ફિલ્મોથી દૂર થયા બાદ પણ સોશિયલ મીડિયા પર સક્રિય

ફિલ્મ ઇન્ડસ્ટ્રી છોડ્યા બાદ પણ ઝાયરા વસીમ સોશિયલ મીડિયા પર સક્રિય રહી છે. તે ઇન્સ્ટાગ્રામ પર અવારનવાર પ્રેરણાદાયક વિચારો અને સંદેશો શેર કરતી રહે છે. વર્ષ 2025માં તેણે સોશિયલ મીડિયા પર પોસ્ટ શેર કરીને પોતાના નિકાહ અંગે પણ માહિતી આપી હતી.

નાની ઉંમરે રાષ્ટ્રીય પુરસ્કાર મેળવનારી ઝાયરા વસીમનો સફર ફિલ્મી સફળતા, લોકપ્રિયતા અને પોતાના વ્યક્તિગત વિશ્વાસના આધારે લીધેલા નિર્ણયને કારણે આજે પણ ચર્ચામાં રહે છે.

આ પણ વાંચો : Ahmedabadમાં ₹25 કરોડનું ડ્રગ્સ ઝડપાયું, અમદાવાદ-સુરત ક્રાઇમ બ્રાન્ચની સંયુક્ત કાર્યવાહીમાં 3 આરોપી ઝડપાયા