Sanjay Gupta:‘કાંટે’ અને ‘કાબિલ’ના દિગ્દર્શકનું 59 વર્ષની વયે નિધન, ઘરના બાથરૂમમાં પડી જતાં ગંભીર ઈજા
Sanjay Gupta
Sanjay Gupta:‘કાંટે’ અને ‘કાબિલ’ના દિગ્દર્શકનું 59 વર્ષની વયે નિધન, ઘરના બાથરૂમમાં પડી જતાં ગંભીર ઈજા
Sanjay Gupta
Sanjay Gupta: હિન્દી ફિલ્મજગતમાંથી એક દુઃખદ સમાચાર સામે આવ્યા છે. જાણીતા ફિલ્મ દિગ્દર્શક અને નિર્માતા સંજય ગુપ્તાનું 30 ઓક્ટોબરની રાત્રે 59 વર્ષની વયે નિધન થયું છે. પ્રાથમિક માહિતી અનુસાર, તેઓ શુક્રવારની રાત્રે પોતાના ઘરના બાથરૂમમાં પડી ગયા હતા. આ દરમિયાન તેમના માથામાં ગંભીર ઈજા થઈ હતી. રાત્રે બનેલી આ ઘટનાની જાણ કોઈને થઈ શકી નહોતી અને 31 ઓક્ટોબરની સવારે તેમના નિધનના સમાચાર સામે આવ્યા હતા.
ફિલ્મ નિર્માતા અશોક પંડિતે સોશિયલ મીડિયા પર સંજય ગુપ્તાની તસવીર શેર કરીને તેમના નિધનની પુષ્ટિ કરી હતી. તેમણે ભાવુક પોસ્ટ લખીને સંજય ગુપ્તાને પોતાના નજીકના મિત્ર અને ઉત્તમ દિગ્દર્શક ગણાવ્યા હતા.
અશોક પંડિતે પોતાની પોસ્ટમાં લખ્યું હતું કે, સંજય ગુપ્તાના નિધનના સમાચાર અત્યંત આઘાતજનક અને દુઃખદ છે. તેઓ એક શાનદાર વાર્તાકાર, હંમેશાં જીવનથી ભરપૂર રહેતા વ્યક્તિ અને ફિલ્મો પ્રત્યે સમર્પિત દિગ્દર્શક હતા. તેમના નિધનથી ફિલ્મજગતને મોટું નુકસાન થયું છે. અશોક પંડિતે સંજય ગુપ્તાના પરિવારજનો અને નજીકના લોકો પ્રત્યે સંવેદના વ્યક્ત કરી હતી. તેમના અંતિમ સંસ્કાર અંગેની માહિતી ટૂંક સમયમાં જાહેર કરવામાં આવશે તેમ પણ જણાવ્યું હતું.
વર્સોવા પોલીસે ADR નોંધી, તપાસ શરૂ કરી
આ ઘટના અંગે વર્સોવા પોલીસે અકસ્માતે થયેલા મૃત્યુ અંગેનો અહેવાલ (ADR) નોંધીને તપાસ શરૂ કરી છે. પોલીસના જણાવ્યા અનુસાર, પ્રાથમિક તપાસમાં કોઈ કાવતરું કે અન્ય ગેરરીતિની આશંકા સામે આવી નથી. જોકે, સમગ્ર ઘટનાની તપાસ ચાલી રહી છે.
‘આતિશ’ ફિલ્મથી શરૂ કરી હતી દિગ્દર્શન ક્ષેત્રે સફર
સંજય ગુપ્તાએ વર્ષ 1994માં આવેલી ફિલ્મ ‘આતિશ: ફીલ ધ ફાયર’થી દિગ્દર્શક તરીકે પોતાની કારકિર્દીની શરૂઆત કરી હતી. આ ફિલ્મમાં સંજય દત્ત અને આદિત્ય પંચોલી મુખ્ય ભૂમિકામાં જોવા મળ્યા હતા. ત્યારબાદ તેમણે ‘રામ શાસ્ત્ર’, ‘હમેશા’, ‘જંગ’ અને ‘ખૌફ’ જેવી ફિલ્મોનું દિગ્દર્શન કર્યું હતું.
વર્ષ 2002માં રિલીઝ થયેલી તેમની ફિલ્મ ‘કાંટે’ તેમની કારકિર્દીની સૌથી ચર્ચિત ફિલ્મોમાંની એક રહી હતી. આ ફિલ્મમાં અમિતાભ બચ્ચન, સંજય દત્ત અને સુનીલ શેટ્ટી સહિતના કલાકારો જોવા મળ્યા હતા. સંજય દત્ત સાથેની તેમની જોડીએ પણ દર્શકોનું ધ્યાન ખેંચ્યું હતું. બંનેએ ‘મુસાફિર’, ‘ઝિંદા’ અને ‘શૂટઆઉટ એટ લોખંડવાલા’ જેવી ફિલ્મોમાં સાથે કામ કર્યું હતું.
‘કાબિલ’ અને ‘મુંબઈ સાગા’ જેવી ફિલ્મોનું પણ કર્યું હતું દિગ્દર્શન
સંજય ગુપ્તાએ પોતાની કારકિર્દી દરમિયાન ‘કાબિલ’ અને ‘મુંબઈ સાગા’ જેવી ફિલ્મોનું પણ દિગ્દર્શન કર્યું હતું. દિગ્દર્શન ઉપરાંત તેમણે નિર્માતા અને પટકથા લેખક તરીકે પણ કામ કર્યું હતું. તેમણે ‘દસ કહાનિયાં’, ‘પ્લાન’, ‘વુડસ્ટોક વિલા’, ‘એસિડ ફેક્ટરી’ અને ‘પંખ’ જેવી ફિલ્મોનું નિર્માણ કર્યું હતું.
તેમના છેલ્લાં કામોમાં વર્ષ 2025માં રિલીઝ થયેલી ફિલ્મ ‘ધ મિરાન્ડા બ્રધર્સ’નો સમાવેશ થાય છે. આ ફિલ્મમાં હર્ષવર્ધન રાણે અને મીઝાન જાફરી જોવા મળ્યા હતા. સંજય ગુપ્તાના નિધનના સમાચારથી સમગ્ર ફિલ્મજગતમાં શોકની લાગણી ફેલાઈ છે.
