Bhumi Pednekar Horror Movie: ભૂમિ પેડણેકરની ફિલ્મ 'જાની દુશ્મન'ની જાહેરાત

Bhumi Pednekar Horror Movie: બોલિવૂડ અભિનેત્રી ભૂમિ પેડણેકર હવે હોરર અવતારમાં દર્શકોને ડરાવતી જોવા મળશે. તેમની આગામી ફિલ્મ ‘જાની દુશ્મન: ડર કે આગે મોત’ની જાહેરાત કરવામાં આવી છે. યુનાઇટેડ કિંગડમની પૃષ્ઠભૂમિ પર આધારિત આ ફિલ્મ સુપરનેચરલ હોરર થ્રિલર હશે. ફિલ્મની વાર્તા એક માતા અને દીકરીની આસપાસ વણાયેલી છે, જેમાં પારિવારિક રહસ્યો અને અલૌકિક શક્તિઓ મહત્વની ભૂમિકા ભજવશે.

અભિનેત્રીએ ઇન્સ્ટાગ્રામ પર ફિલ્મનું પોસ્ટર શેર કરીને આ પ્રોજેક્ટની જાહેરાત કરી હતી. પોસ્ટર સાથે તેમણે લખ્યું હતું કે, “દર્દ તો ઘણું જોયું હશે, પરંતુ હવે ખૌફ અનુભવવા માટે તૈયાર થઈ જાઓ. તમારા માટે રજૂ છે ફિલ્મ ‘જાની દુશ્મન: ડર કે આગે મોત’.”

અરશદ સૈયદ કરશે ફિલ્મનું નિર્દેશન

આ ફિલ્મનું નિર્દેશન અરશદ સૈયદ કરી રહ્યા છે, જ્યારે રોબી ગ્રેવાલ ક્રિએટિવ પ્રોડ્યુસર તરીકે જોડાયેલા છે. ફિલ્મનું નિર્માણ ભૂષણ કુમારની ટી-સિરીઝ અને પ્રભલીન સંધુની અલમાઇટી મોશન પિક્ચર દ્વારા સંયુક્ત રીતે કરવામાં આવી રહ્યું છે.

પ્રોડ્યુસર ભૂષણ કુમારે જણાવ્યું હતું કે અલમાઇટી મોશન પિક્ચર તેમની વિશ્વસનીય ક્રિએટિવ પાર્ટનર રહી છે. ‘મેડ ઇન ઇન્ડિયા – અ ટાઇટન સ્ટોરી’ સિરીઝ બાદ ‘જાની દુશ્મન’ માટે ફરી એકવાર તેમની સાથે કામ કરવા તેઓ ઉત્સાહિત છે.

અલમાઇટી મોશન પિક્ચરના ફાઉન્ડર પ્રભલીન સંધુએ પણ ટી-સિરીઝ સાથેના સહયોગને ખાસ ગણાવ્યો હતો. તેમણે કહ્યું કે આ ફિલ્મ દર્શકોને એક અલગ જ સિનેમેટિક અનુભવ આપશે. આ પ્રોજેક્ટ દ્વારા તેઓ રોબી ગ્રેવાલ અને અરશદ સૈયદ સાથે ફરી કામ કરી રહ્યાં છે.

હોલિવૂડના સ્ટંટ ડિરેક્ટર પણ જોડાયા

ફિલ્મમાં રોમાંચક અને હાઇ-ઓક્ટેન એક્શન સિક્વન્સ માટે હોલિવૂડના જાણીતા સ્ટંટ ડિરેક્ટર પીટર પેડ્રેરો પણ ટીમમાં સામેલ થયા છે. તેઓ અગાઉ ‘હેરી પોટર’, ‘ફાસ્ટ એન્ડ ફ્યુરિયસ’, ‘ધ એક્સપેન્ડેબલ્સ’, ‘ગેમ ઓફ થ્રોન્સ’ અને ‘ધ કન્જ્યુરિંગ’ જેવા પ્રોજેક્ટ્સ સાથે કામ કરી ચૂક્યા છે.

ફિલ્મની સમગ્ર વાર્તા યુનાઇટેડ કિંગડમમાં આકાર લેશે. માતા-દીકરીના સંબંધો, પરિવારનાં છુપાયેલાં રહસ્યો અને અલૌકિક શક્તિઓના સંયોજનથી આ હોરર થ્રિલર તૈયાર કરવામાં આવી રહી છે.

ફિલ્મના ક્રિએટિવ પ્રોડ્યુસર રોબી ગ્રેવાલ છે, જ્યારે શિવ ચનાના અને સુનીતા વિનોદ વ્યાસ કો-પ્રોડ્યુસર તરીકે જોડાયેલા છે. ‘જાની દુશ્મન: ડર કે આગે મોત’ વર્ષ 2027માં સિનેમાઘરોમાં રિલીઝ થવાની છે.

આ પણ વાંચો : Andhra Cyclone: આંધ્રપ્રદેશમાં 2 ચક્રવાતથી ભારે નુકસાન, PM મોદીએ સ્થિતિ જાણી