Andhra Cyclone: આંધ્રપ્રદેશમાં 2 ચક્રવાતથી ભારે નુકસાન, PM મોદીએ સ્થિતિ જાણી

Andhra Cyclone: આંધ્રપ્રદેશમાં એક સપ્તાહની અંદર બે ચક્રવાત અર્નબ અને મોરાસુના કારણે થયેલા નુકસાન અંગે વડાપ્રધાન નરેન્દ્ર મોદીએ બુધવારે મુખ્યમંત્રી એન. ચંદ્રબાબુ નાયડુ સાથે ટેલિફોનિક વાતચીત કરી હતી. વડાપ્રધાને અસરગ્રસ્ત વિસ્તારોની સ્થિતિ, નુકસાનની ગંભીરતા અને રાજ્ય સરકાર દ્વારા હાથ ધરવામાં આવેલા રાહતકાર્યો અંગે માહિતી મેળવી હતી.

સત્તાવાર નિવેદન મુજબ, મુખ્યમંત્રી નાયડુએ વડાપ્રધાનને જણાવ્યું હતું કે ભારે વરસાદ અને તેજ પવનને કારણે ખેડૂતોને મોટું નુકસાન થયું છે. આ ઉપરાંત રસ્તાઓ અને વીજળી સહિતના માળખાકીય ક્ષેત્રોને પણ અસર પહોંચી છે. મુખ્યમંત્રીએ નુકસાનને પહોંચી વળવા કેન્દ્ર સરકાર પાસે યોગ્ય સહાયની માગ કરી હતી.

વડાપ્રધાન મોદીએ રાજ્ય સરકાર દ્વારા હાથ ધરવામાં આવેલા રાહતકાર્યોની પ્રશંસા કરી હતી. તેમણે ચક્રવાતથી ઊભી થયેલી પરિસ્થિતિનો સામનો કરવા સતત સતર્ક રહેવા બદલ મુખ્યમંત્રી નાયડુની સરાહના કરી હતી.

અમિત શાહે પણ મુખ્યમંત્રી સાથે કરી હતી વાત

આ પહેલાં મુખ્યમંત્રી નાયડુએ કેન્દ્રીય ગૃહમંત્રી અમિત શાહને પત્ર લખીને ચક્રવાતથી થયેલા નુકસાન અંગે રાજ્યને સહાય આપવા વિનંતી કરી હતી. પત્રમાં અનેક જિલ્લાઓમાં પાક અને સંપત્તિને થયેલા નુકસાન, લોકોને પડી રહેલી મુશ્કેલીઓ તથા રાજ્ય સરકાર દ્વારા હાથ ધરવામાં આવેલા રાહતકાર્યોની વિગતો આપવામાં આવી હતી. મુખ્યમંત્રીએ તાત્કાલિક જરૂરી નાણાકીય સહાય જાહેર કરવાની માગ કરી હતી.

મંગળવારે અમિત શાહે પણ મુખ્યમંત્રીને ફોન કરીને ચક્રવાત મોરાસુની અસર, નુકસાનની હદ અને ચાલી રહેલા રાહતકાર્યો અંગે માહિતી મેળવી હતી. નાયડુએ તેમને રાજ્યની વર્તમાન સ્થિતિથી વાકેફ કર્યા હતા. મુખ્યમંત્રીએ જણાવ્યું હતું કે રાજ્ય ચક્રવાત અર્નબની અસરથી સંપૂર્ણપણે બહાર આવ્યું નહોતું ત્યાં જ મોરાસુના આગમનથી સ્થિતિ વધુ ગંભીર બની હતી.

આઠ સરકારી વિભાગોને રૂ.343.95 કરોડનું નુકસાન

મુખ્યમંત્રીના જણાવ્યા અનુસાર, ચક્રવાત મોરાસુના કારણે રાજ્યના આઠ સરકારી વિભાગોને પ્રાથમિક અંદાજ મુજબ રૂ.343.95 કરોડનું નુકસાન થયું છે. આ નુકસાનમાં લગભગ 94 ટકા હિસ્સો કૃષિ ક્ષેત્રનો છે. સાત જિલ્લાનાં 465 ગામોમાં 50,473 હેક્ટર વિસ્તારમાં ઊભા પાકને નુકસાન થયું છે, જેના કારણે 69,828 ખેડૂતો અસરગ્રસ્ત થયા છે.

નુકસાનગ્રસ્ત પાકમાં 45,900 હેક્ટર વિસ્તારમાં ડાંગરનો પાક સામેલ છે. કૃષિ ક્ષેત્રને થયેલું પ્રાથમિક નુકસાન રૂ.324.22 કરોડ આંકવામાં આવ્યું છે. બાપટલા, કૃષ્ણા અને ગુંટુર જિલ્લાઓમાં બાગાયતી ઉપજ સહિતના પાકને ખાસ્સું નુકસાન પહોંચ્યું હોવાનું મુખ્યમંત્રીએ જણાવ્યું હતું.

12,230 લોકોને સુરક્ષિત સ્થળે ખસેડાયા

ચક્રવાતની અસરને ધ્યાનમાં રાખીને રાજ્ય આપત્તિ વ્યવસ્થાપન સત્તામંડળ, રિયલ-ટાઇમ ગવર્નન્સ સોસાયટી અને ઇમરજન્સી ઓપરેશન સેન્ટરોને હાઇ એલર્ટ પર રાખવામાં આવ્યાં હતાં. રાહત અને બચાવ કામગીરી માટે 11 SDRF તથા 13 NDRF ટીમોને તૈયાર રાખવામાં આવી હતી.

અસરગ્રસ્ત જિલ્લાઓમાં 480 શાળાઓને રાહત કેન્દ્રોમાં ફેરવવામાં આવી છે. અત્યાર સુધીમાં 12,230 લોકોને સુરક્ષિત સ્થળોએ ખસેડવામાં આવ્યા હોવાનું મુખ્યમંત્રી નાયડુએ જણાવ્યું હતું.

આ પણ વાંચો : Gold Silver Price Rise: અમેરિકા ચૂંટણી બાદ સોના-ચાંદીમાં જોરદાર ઉછાળો