Tusshar Kapoor: ટાઈગર શ્રોફની કાર પર ફાયરિંગની ઘટના બાદ તુષાર કપૂરને મળી ધમકી, 5 કરોડ રૂપિયાની ખંડણીની માગ

Tusshar Kapoor: બોલીવુડ એક્ટર ટાઈગર શ્રોફની કાર પર ફાયરિંગની ઘટના બાદ હવે એક્ટર તુષાર કપૂરને પણ ધમકીભર્યો ફોન આવ્યાની માહિતી સામે આવી છે. મીડિયા રિપોર્ટ મુજબ ફોન કરનારે 5 કરોડ રૂપિયાની ખંડણી માગી હતી અને પોતાને લોરેન્સ બિશ્નોઈ ગેંગ સાથે જોડાયેલા ગેંગસ્ટર હેરી બોક્સર તરીકે ઓળખાવ્યો હતો. પરંતુ પ્રાથમિક તપાસમાં આ ફોન પ્રેન્ક કોલ હોવાની શક્યતા સામે આવી છે.

વોઈસ સેમ્પલનું મેચિંગ ન થતાં શંકા વધી

સૂત્રોના જણાવ્યા અનુસાર, ધમકીભર્યા ફોનમાં સંભળાયેલી વ્યક્તિના અવાજ અને મુંબઈ પોલીસ પાસે ઉપલબ્ધ હેરી બોક્સરના વોઈસ સેમ્પલ વચ્ચે મેળ પડ્યો નથી. તેથી પોલીસ તપાસ કરી રહી છે કે શું કોઈ અન્ય વ્યક્તિએ હેરી બોક્સરના નામનો ઉપયોગ કરીને તુષાર કપૂરને ધમકી આપી હતી. આ મામલે અત્યાર સુધી FIR નોંધાઈ નથી.

બોલીવુડ કલાકારોની સુરક્ષાની સમીક્ષા થશે

ટાઈગર શ્રોફની કાર પર ફાયરિંગની ઘટના બાદ બોલીવુડના કેટલાક નિર્માતા, દિગ્દર્શકો અને કલાકારોને ધમકીઓ મળ્યાની માહિતી પણ સામે આવી રહી છે. પરંતુ આ ધમકીઓ પાછળ લોરેન્સ બિશ્નોઈ ગેંગ જ છે કે અન્ય કોઈ વ્યક્તિ કે ગેંગ સામેલ છે, તે હજુ સ્પષ્ટ થયું નથી.

મુંબઈ પોલીસ દિવાળી પહેલાં બોલીવુડના કલાકારોની સુરક્ષાની સમીક્ષા કરવા માટે બેઠક યોજી શકે છે. આ બેઠકમાં કોને વધારાની સુરક્ષા આપવી અને કોને પોલીસ સુરક્ષા પૂરી પાડવાની જરૂર છે તે અંગે ચર્ચા કરવામાં આવશે.

તુષાર કપૂરના બંગલાની બહાર હાલ પોલીસ બંદોબસ્ત નહીં

તુષાર કપૂર અભિનેતા જિતેન્દ્રના પુત્ર અને નિર્માતા-દિગ્દર્શક એકતા કપૂરનો ભાઈ છે. તેઓ મુંબઈના જુહુ વિસ્તારમાં આવેલા કૃષ્ણા બંગલામાં રહે છે. ધમકી મળ્યાના અહેવાલો વચ્ચે પણ હાલમાં તેમના બંગલાની બહાર મુંબઈ પોલીસનો સુરક્ષા બંદોબસ્ત ગોઠવવામાં આવ્યો નથી. પરંતુ કપૂર પરિવાર તરફથી ખાનગી સુરક્ષા ગાર્ડ અને બાઉન્સર તૈનાત કરવામાં આવ્યા છે. બંગલાની અંદર પણ ખાનગી સુરક્ષાની વ્યવસ્થા છે અને મુખ્ય દરવાજા પર બાઉન્સર હાજર છે.

પોલીસે ફરિયાદ કરવા અપીલ કરી

મુંબઈ પોલીસના જણાવ્યા અનુસાર, ધમકી મળનારા લોકોએ આગળ આવીને સત્તાવાર ફરિયાદ નોંધાવવી જોઈએ. ધમકી સંબંધિત ઓડિયો રેકોર્ડિંગ, પત્ર કે ઈમેઈલ પોલીસને આપવાથી તપાસમાં મદદ મળી શકે છે. તપાસના આધારે કોને કેટલી સુરક્ષા આપવી તે અંગે નિર્ણય લેવામાં આવશે. હાલ તુષાર કપૂરને મળેલી ધમકીના મામલે પોલીસ તપાસ કરી રહી છે અને બોલીવુડના કલાકારોની સુરક્ષાને લઈને પણ સતર્કતા રાખવામાં આવી રહી છે.

આ પણ વાંચો: Aman: અમનનું નવું ગીત ‘Tanha Main’ રિલીઝ, રાહ રેકોર્ડ્સે બીજું સિંગલ રજૂ કર્યું