Sanki Movie: ‘સનકી’માં અહાન શેટ્ટી સાથે રોમાન્સ કરશે ‘બોર્ડર 2’ની એક્ટ્રેસ, પાત્ર માટે કરી રહી છે ખાસ તૈયારી

Sanki Movie: બોલીવુડ એક્ટર અહાન શેટ્ટીની અપકમિંગ ફિલ્મ ‘સનકી’ને લઈને નવી માહિતી સામે આવી છે. ફિલ્મમાં તેની સાથે એક્ટ્રેસ મેધા રાણા લીડ રોલમાં જોવા મળશે. મેધા અગાઉ ફિલ્મ ‘બોર્ડર 2’માં પણ જોવા મળી હતી, જેમાં તે વરુણ ધવન સાથે જોવા મળી હતી. હવે ‘સનકી’માં અહાન અને મેધાની જોડી પ્રથમવાર રોમેન્ટિક અંદાજમાં પડદા પર જોવા મળશે.

ફિલ્મનું નિર્દેશન ટીનુ સુરેશ દેસાઈ કરી રહ્યા છે. તેઓ અગાઉ ‘રુસ્તમ’ અને ‘મિશન રાનીગંજ’ જેવી ફિલ્મોનું નિર્દેશન કરી ચૂક્યા છે. મીડિયા રિપોર્ટ મુજબ ‘બોર્ડર 2’ બાદ મેધા રાણા સારી સ્ક્રિપ્ટની રાહ જોઈ રહી હતી અને ‘સનકી’ની વાર્તા પસંદ આવ્યા બાદ તેણે આ ફિલ્મ માટે હા પાડી હતી.

પાત્ર માટે 2 મહિનાથી તૈયારી કરી રહી છે મેધા

મીડિયા રિપોર્ટ મુજબ મેધા છેલ્લા 2 મહિનાથી ફિલ્મની તૈયારી કરી રહી છે. પોતાના પાત્રને સારી રીતે ભજવી શકે તે માટે તે વર્કશોપમાં પણ ભાગ લઈ રહી છે. ફિલ્મમાં મેધા અહાન શેટ્ટીની લવ ઈન્ટરેસ્ટની ભૂમિકા ભજવશે. તેના પાત્રમાં રોમાન્સ અને મોટા એક્શન સીન્સ જોવા મળશે. આ કારણે એક્ટ્રેસે ભૂમિકા માટે ખાસ તૈયારી કરી છે.

30 ઓક્ટોબરથી ભોપાલમાં શૂટિંગ શરૂ

મીડિયા રિપોર્ટ મુજબ ‘સનકી’નું શૂટિંગ 30 ઓક્ટોબરથી મધ્યપ્રદેશના ભોપાલમાં શરૂ થઈ ગયું છે. મેધા રાણાએ પણ ભોપાલમાં અહાન શેટ્ટી સાથે શૂટિંગ શરૂ કર્યું છે. અહાન અને મેધા અગાઉ ‘બોર્ડર 2’માં એક જ ફિલ્મનો ભાગ હતા, પરંતુ બંનેની જોડી તરીકે કોઈ રોમેન્ટિક ટ્રેક ન હતો. હવે ‘સનકી’માં બંને પહેલીવાર એકબીજાની સામે લીડ તરીકે જોવા મળશે. તેથી દર્શકોમાં તેમની ઓનસ્ક્રીન કેમેસ્ટ્રીને લઈને ઉત્સુકતા જોવા મળી શકે છે.

2027માં રિલીઝ કરવાની યોજના

‘સનકી’નું શૂટિંગ શરૂ થઈ ગયું છે અને મેકર્સની યોજના ફિલ્મને વર્ષ 2027માં રિલીઝ કરવાની છે. મીડિયા રિપોર્ટ મુજબ આગામી દિવસોમાં ફિલ્મનો ફર્સ્ટ લુક પણ જાહેર કરવામાં આવી શકે છે. પરંતુ ફિલ્મની ચોક્કસ રિલીઝ તારીખ અંગે સત્તાવાર જાહેરાતની રાહ જોવાઈ રહી છે.

આ પણ વાંચો: Amitabh Bachchan: અમિતાભ બચ્ચનને રાત્રે નથી આવતી ઊંઘ, બ્લોગમાં જણાવી ઉંમરની અસર