NEET UG 2026 Re Exam Date: પરીક્ષા રદ થયા બાદ ફરીથી પરીક્ષા આપનારા લાખો મેડિકલ વિદ્યાર્થીઓ માટે મહત્વપૂર્ણ અપડેટ સામે આવ્યું છે. નેશનલ ટેસ્ટિંગ એજન્સી (NTA) દ્વારા NEET UG 2026ની રી-પરીક્ષા 21 જૂનના રોજ યોજાશે. પરીક્ષા પારદર્શક અને વિદ્યાર્થીઓને અનુકૂળ બને તે માટે ખાસ તૈયારીઓ કરવામાં આવી રહી છે.

આ વખતે NTAનો મુખ્ય ફોકસ વિદ્યાર્થીઓને તેમના હોમ ટાઉન અથવા નજીકના શહેરમાં પરીક્ષા કેન્દ્ર ઉપલબ્ધ કરાવવાનો છે. પરીક્ષા શહેર બદલવા માટે અંદાજે 3.5 લાખ વિદ્યાર્થીઓએ અરજી કરી હતી, જેને ધ્યાનમાં રાખીને વિવિધ શહેરોમાં નવા પરીક્ષા કેન્દ્રો ઉમેરવામાં આવ્યા છે.

NTA દ્વારા 14 જૂન પહેલાં એગ્ઝામ સિટી સ્લિપ જાહેર કરવામાં આવશે. આ સ્લિપ દ્વારા ઉમેદવારોને તેમની પરીક્ષા કયા શહેરમાં યોજાશે તેની માહિતી મળશે. ત્યારબાદ 16 જૂન સુધીમાં એડમિટ કાર્ડ પણ જાહેર કરવામાં આવશે, જેમાં પરીક્ષા કેન્દ્રનું સરનામું અને પરીક્ષાનો સમય દર્શાવવામાં આવશે.

અધિકારીઓના જણાવ્યા અનુસાર, વિદ્યાર્થીઓએ જે શહેર પ્રથમ પસંદગી તરીકે પસંદ કર્યું હશે ત્યાં જ સેન્ટર આપવાનો પ્રયાસ કરવામાં આવશે. જો કોઈ શહેરમાં ક્ષમતા કરતાં વધુ અરજીઓ હશે તો નજીકના શહેરમાં સેન્ટર ફાળવવામાં આવશે.

આ વર્ષે કુલ 22.79 લાખ ઉમેદવારો પરીક્ષામાં સામેલ થવાના છે. સૌથી વધુ ઉમેદવારો ઉત્તર પ્રદેશ, મહારાષ્ટ્ર અને રાજસ્થાનમાંથી છે. તેથી આ રાજ્યોમાં પરીક્ષા કેન્દ્રોની સંખ્યા પણ વધારવામાં આવી છે.

બીજી તરફ, NTAએ સોશિયલ મીડિયા પર ફેલાતી અફવાઓ પર પણ કડક નજર રાખી છે. એજન્સીએ સ્પષ્ટ કર્યું છે કે પરીક્ષાની સુરક્ષા અને પારદર્શિતા માટે વિશેષ વ્યવસ્થા કરવામાં આવી રહી છે, જેથી NEET UG 2026 રી-એગ્ઝામ કોઈપણ વિવાદ વિના સફળતાપૂર્વક પૂર્ણ થઈ શકે.