મોડાસા: રાજ્યમાં ચોમાસું જામી રહ્યું છે ત્યારે અનેક વિસ્તારોમાં ભારે વરસાદના કારણે રસ્તાઓને નુકસાન પહોંચી રહ્યું છે. અરવલ્લી જિલ્લાના મોડાસામાં પણ વરસાદ બાદ રેલ્લાવાડા-મોડાસા રોડ પર પાણી ભરાતા રસ્તાનો ભાગ ધોવાઈ જવાની ઘટના સામે આવી છે.

રસ્તો ધોવાઈ જતાં વાહનવ્યવહાર પ્રભાવિત થયો છે અને રોજિંદા અવરજવર કરતા લોકોને ભારે મુશ્કેલીનો સામનો કરવો પડી રહ્યો છે. ખાસ કરીને બે-વ્હીલર ચાલકો માટે અકસ્માતનો ભય પણ ઊભો થયો છે.

સ્થાનિક લોકોમાં આ ઘટનાને લઈને ભારે રોષ જોવા મળી રહ્યો છે. તેમનું કહેવું છે કે રસ્તાના નિર્માણ પાછળ કરોડો રૂપિયાનો ખર્ચ કરવામાં આવે છે, છતાં પ્રથમ જ વરસાદમાં રસ્તા ધોવાઈ જતાં કામની ગુણવત્તા અંગે ગંભીર સવાલો ઊભા થયા છે. લોકો જવાબદાર અધિકારીઓ સામે યોગ્ય કાર્યવાહી કરવાની અને રોડનું ગુણવત્તાસભર સમારકામ કરવાની માંગ કરી રહ્યા છે.

સ્થાનિકોના જણાવ્યા મુજબ, વરસાદી પાણીના યોગ્ય નિકાલની વ્યવસ્થા ન હોવાને કારણે પણ સ્થિતિ વધુ ગંભીર બની છે. હવે તંત્ર આ મામલે શું પગલાં ભરે છે તેના પર સૌની નજર છે.