માંજલપુરમાં ભાજપનો દબદબો યથાવત, સતીશ પટેલનો ભવ્ય વિજય

વડોદરા: શહેરની હાઇપ્રોફાઇલ ગણાતી માંજલપુર વિધાનસભા બેઠકની પેટાચૂંટણીનું પરિણામ આજે જાહેર થયું છે. મતગણતરીના અંતે ભારતીય જનતા પાર્ટીના ઉમેદવાર સતીશ પટેલે 30,499 મતોની જંગી લીડ સાથે ભવ્ય જીત મેળવી છે. આ જીત સાથે માંજલપુર બેઠક પર ભાજપનો ગઢ ફરી એકવાર અડીખમ સાબિત થયો છે.

પૂર્વ ધારાસભ્ય અને ભાજપના વરિષ્ઠ નેતા યોગેશ પટેલના નિધન બાદ ખાલી પડેલી આ બેઠક પર યોજાયેલી પેટાચૂંટણીમાં સતીશ પટેલે શરૂઆતથી જ પોતાની સરસાઈ જાળવી રાખી હતી. 19મા રાઉન્ડના અંતે જીતની સત્તાવાર જાહેરાત થતાં જ ભાજપના કાર્યકરોમાં ઉત્સાહનો માહોલ જોવા મળ્યો હતો. કાર્યકરોએ ઢોલ-નગારા સાથે વિજયોત્સવ ઉજવીને જીતની ખુશી મનાવી હતી.

સતીશ પટેલની આ જીત સાથે તેમણે યોગેશ પટેલની વિજય પરંપરાને આગળ ધપાવી છે અને માંજલપુરમાં ભાજપનું વર્ચસ્વ યથાવત રાખ્યું છે.