જૂનાગઢ: જૂનાગઢમાં એશિયાટિક સિંહના નર બચ્ચાની હત્યાના મામલે વન વિભાગને મોટી સફળતા મળી છે. ઘટનાના ત્રણ દિવસમાં જ વન વિભાગે પોરબંદરના કુતિયાણા વિસ્તારમાંથી 50 વર્ષીય શખ્સની ધરપકડ કરી છે. આરોપીએ પૂછપરછ દરમિયાન સિંહના બચ્ચાની હત્યા કરી હોવાની કબૂલાત પણ કરી હોવાનું વન વિભાગે જણાવ્યું છે.

વન વિભાગના જણાવ્યા મુજબ, 24 જૂને જૂનાગઢ વન વિભાગની ડુંગર (દક્ષિણ) રેન્જ હેઠળ આવેલા રબારી નેસ નજીક 7થી 8 મહિનાના નર એશિયાટિક સિંહના બચ્ચાનો મૃતદેહ મળી આવ્યો હતો. મૃતદેહ પર ઈજાના નિશાન જોવા મળતાં વન વિભાગે તાત્કાલિક તપાસ શરૂ કરી હતી.

ટેક્નિકલ વિશ્લેષણ, ઘટનાસ્થળેથી મળેલા પુરાવા અને માનવ ગુપ્તચર માહિતીના આધારે તપાસમાં બાવણ પુનાભાઈ ચાવડા (ઉં.વ. 50)નું નામ સામે આવ્યું હતું. આરોપી પોરબંદરના કુતિયાણા તાલુકામાંથી ઝડપાયો છે અને તે જૂનાગઢ નજીકના રબારી નેસનો રહેવાસી છે.

આરોપીને ઝડપી પાડવા માટે જૂનાગઢ વન વિભાગની ત્રણ અલગ-અલગ ટીમોએ કુતિયાણા વિસ્તારમાં સર્ચ ઓપરેશન હાથ ધર્યું હતું. ધરપકડ બાદ આરોપીને વધુ પૂછપરછ માટે જૂનાગઢ લાવવામાં આવ્યો છે.

વન વિભાગના અધિકારીઓના જણાવ્યા મુજબ, પૂછપરછ દરમિયાન આરોપીએ સિંહના બચ્ચાની હત્યા કરી હોવાની કબૂલાત કરી છે. એટલું જ નહીં, તેણે અગાઉ અનેક કૂતરાં અને સાપોને પણ મારી નાખ્યાની કબૂલાત કરી હોવાનું સામે આવ્યું છે, જે પ્રાણીઓ પ્રત્યે તેની હિંસક માનસિકતા દર્શાવે છે.

આરોપી સામે વન્યજીવ સંરક્ષણ અધિનિયમ હેઠળ ગુનો નોંધવામાં આવ્યો છે. હાલ સમગ્ર મામલે વધુ તપાસ હાથ ધરવામાં આવી રહી છે.