રાજકોટ રાજકોટમાં ગાંજાના વાવેતરનો ખુલાસો થયો છે. આજીડેમ પોલીસ મથક હેઠળ આવતા ત્રંબા ગામમાં પિયુષ રૈયાણી નામના શખ્સે પોતાના ખેતરમાં ગાંજાના છોડનું વાવેતર કર્યું હોવાનું સામે આવ્યું છે.

મળતી માહિતી મુજબ, આંબા અને ચીકુના ઝાડ વચ્ચે આ ગેરકાયદેસર વાવેતર કરવામાં આવ્યું હતું. પોલીસને આ અંગે બાતમી મળતા જ તાત્કાલિક કાર્યવાહી હાથ ધરવામાં આવી હતી.

બાતમીના આધારે પોલીસે ખેતરમાંથી કુલ 37 ગાંજાના છોડ કબજે કર્યા છે. પ્રાથમિક તપાસમાં જાણવા મળ્યું છે કે આ વાવેતર છેલ્લા ત્રણ મહિનાથી કરવામાં આવી રહ્યું હતું.

આ મામલે ACP ભાવેશ જાધવે નિવેદન આપ્યું હતું કે ગ્રામ્ય વિસ્તારોમાં આવા ગેરકાયદેસર વાવેતર પર સતત નજર રાખવામાં આવી રહી છે અને જરૂરી કાર્યવાહી કરવામાં આવશે.